Тыгъуасэ гурыт еджапIэр къэзыухырэ ныбжьыкIэхэм шIокI зимыIэ ушэтынэу урысыбзэр атыгъ. РеспубликэмкIэ нэбгырэ 1710-мэ заушэтыгъ.

[caption id="attachment_133411" align="aligncenter" width="800"] Сурэтыр: А.Лаутеншлегер.[/caption]

Ушэтынхэр зыщатырэ чIыпIэ 11-мэ мы мафэм Iоф ашIагъ, ащ нэмыкIэу къэралыгъо кIэух ушэтыныр чIыпIитIумэ ащатыгъ ыкIи зы нэбгырэ унэм зыщиушэтыгъ.

АР-м и Къэралыгъо аттестационнэ къулыкъу къызэрэщытаIуагъэмкIэ, чIыпIэ пстэуми зыпкъ итэу, рэхьатэу ушэтыныр ащыкIуагъ.

КIэуххэр мы мазэм и 16-м нахь мыкIасэу къараIожьыщтых. Ушэтыныр пкIугъэу алъытэным пае балл 24-рэ нахь мымакIэу къэпхьын фае. Сыхьатищырэ ныкъорэ ныбжьыкIэхэм яIагъ IофшIэнхэр агъэцэкIэнымкIэ. Тест шIыкIэм тетэу IофшIэн 27-рэ ахэм агъэцэкIэн фэягъ, ащ нэмыкIэу сочинение атхынэу щытыгъ.

Мыекъопэ гимназиеу N 5-м ушэтыныр зэрэщыкIорэр зэд­гъэлъэгъунэу мы мафэм тыщыIагъ.

БлэкIыгъэ илъэсхэм ялъытыгъэмэ, ныбжьыкIэхэм нахь рэ­хьатныгъэ ахэлъэу, мыщынэхэу шIэныгъэу аIэкIэлъыр къагъэлъэ­гъоным фэхьазырыгъэх.

— Зэтыгъо къэралыгъо ушэтыныр зэрифэшъуашэу, шъыпкъагъэ хэлъэу зэрэкIощтым ты­наIэ тет. НыбжьыкIэхэми, ны-тыхэми япшъэрылъхэр къагурыIоным пае Iофтхьэбзэ зэфэшъхьафхэр республикэм ренэу щызэхащагъэх, ахэм яшIуагъэ къызэрэкIуагъэр нэры­лъэгъу. БлэкIыгъэ илъэсхэм ябгъапшэмэ, еджапIэр къэзыухыхэрэр нахь рэхьатых, шапхъэхэм адимыштэу зекIон мурад зиIэ тлъэгъурэп, — къы­Iуагъ пунктым ипащэ.

Ушэтыныр зытыщт ныбжьыкIэхэм ятхылъхэр ауплъэкIухэзэ, зырызэу чIагъэхьагъэх. Шапхъэ­хэм къызэрэдалъытэрэмкIэ, къэлэмым нэмыкIэу псы ахэм аIыгъын фит, ау ащ тегъэпкIэгъэ тхылъыпIэхэр тетхъыгъэнхэ фае, къызэраIуагъэмкIэ, ыпэкIэ ащ фэдэ тхьапэм ушэтынымкIэ агъэфедэн алъэкIыщтхэр тыратхэхэу агъэунэфыгъагъ.

Мы еджапIэм чIыпIэу щагъэ­псыгъэм ипащэ тызэрэщигъэгъо­загъэмкIэ, ушэтыныр мыщ щы­зытыгъэр нэбгырэ 187-рэ, нэбгырэ 15 классхэм ачIагъэтIысхьагъэх. ЗэкIэмкIи класс 15-мэ кIэлэеджакIохэр ачIэсыгъэх. ЗипсауныгъэкIэ илэгъухэм акIэмыхьэрэ нэбгыритIоу ушэтыным къекIолIагъэхэр хэушъхьафыкIыгъэ классым чIагъэтIысхьагъэх. Сыхьатитфым къы­кIоцI ахэм яшIэныгъэхэр къагъэлъэгъонэу амал аратыгъ.

Класс пэпчъ кIэлэегъэджэ тIурытIу джащ фэдэу гъунэ алъызыфырэ лъыплъакIохэр ачIэт. Ахэм аудиториехэр ауп­лъэкIугъэх, ныбжьыкIэхэр къы­зэрэчIахьэхэрэр шапхъэхэм адештэмэ еплъыгъэх, ахэм яфитыныгъэхэр амыукъонхэм анаIэ тетыгъ.

Аудиториехэм ачIэт кIэлэ­егъаджэхэм ушэтыныр рамы­гъажьэзэ шапхъэу щыIэхэр джыри зэ ныбжьыкIэхэм агу къагъэкIыжьыгъэх. Сыхьатыр 10-м конвертхэр къызэIуахы­гъэх, IофшIэнхэр рагъэжьагъэх.

УрысыбзэмкIэ атыгъэ ушэтыным изэфэхьысыжьхэр шIэхэу къэнэфэщтых. ЯтIонэрэ шIокI зимыIэ ушэтынэу хьисапыр мэкъуогъум и 1-м атыщт.

ДЕЛЭКЪО Анет.