Адыгеим и ЛIышъхьэу КъумпIыл Мурат Кощхьэблэ районым щыIагъ къуаджэу Фэдз гумэкIыгъоу зыхэфагъэр зэригъэлъэгъунэу ыкIи псынкIэу зэшIохыгъэн фэе IофхэмкIэ къулыкъу гъэнэфагъэхэр ыгъэгъозэнхэу.

ПэшIорыгъэшъэу макъэ къызэрагъэIугъэмкIэ, ощхым ыпкъ къикIыкIэ Фэдз иунэе псэупIи 110-мэ ыкIи ахэм къапэIулъ чIыпIэхэм псыр къакIэуагъ. ПсэупIэм ошIэ-­дэмышIэ Iофым ирежим щагъэуцугъ. ГумэкIыгъом идэ­­гъэзыжьын нэбгырипшI пчъагъэ, техникэ 20, Уры­сыем ошIэ-дэмышIэ IофхэмкIэ и Министерствэ итехники ахэм зэрахэтэу, дэлажьэ. Унэхэм зэхэкъутагъэ зи къа­хэкIыгъэп, зы къакъыр зэ­хэуагъэ. Къоджэдэсхэм япсау­ныгъэ зи къегоуагъэп, пIэлъэ гъэнэфагъэкIэ цIыфхэр зыдащэн фэе чIыпIэхэр агъэпсынхэр ищыкIагъэу щытэп. Псыр щагухэм адэкIыжьэу ыублагъ. ЧIэнагъэу къоджэ­дэсхэм ашIыгъэм икъидзэнкIэ комиссием IофшIэныр лъегъэ­кIуатэ.

[caption id="attachment_133340" align="aligncenter" width="800"] Сурэтыр: А. Гусев.[/caption]

«Тэ мызэу, мытIоу чIыопс тхьамыкIагъохэм тяуталIэу хъу­гъэ, тызэрэзекIон фэе шIыкIэр тэшIэ. Псыкъиуным тхьамыкIагъоу къыздихьыгъэхэр пIэлъэ кIэкIым дагъэзыжьынэу, чIэнагъэу ашIыгъэр къырадзэнэу пшъэрылъ афэсшIыгъ. ДемыIэхэу зы нэбгыри къагъэнэщтэп. Комиссиер щагу пэпчъ дэхьащт, цIыфхэм ящыкIагъэр зэригъэшIэщт, ахэм IэпыIэгъу аригъэгъотыщт. ОшIэ-дэмышIэ тхьа­мыкIагъом къыздихьыгъэхэр зыдагъэзыжьхэкIэ зэIукIэ зэ­хэтщэщт. Пшъэрылъхэм язэшIохынкIэ лъэныкъо пстэури къыдэтлъытэщт, ощхыпсыр зэ­рылъэдэрэ, псыр зэрэIуащырэ псэуалъэхэри зэблэтхъущтых», — къыIуагъ КъумпIыл Мурат.

ОшIэ-дэмышIэ гумэкIыгъом икIэуххэм ядэгъэзыжьынкIэ штаб къыщызэIуахыгъ. Ащ иIоф­шIэн хэлэжьагъэх Адыгэ Рес­публикэм и Къэралыгъо —Совет Хасэм и Тхьаматэ игуа­дзэу Iэщэ Мухьамэд, ошIэ-­дэ­мышIэ IофхэмкIэ Министерствэм и ГъэIорышIапIэу АР-м щыIэм ипащэу Станислав Илю­щенкэр, АР-м и ЛIышъхьэрэ АР-м иминистрхэм я Кабинетрэ я Администрацие ипащэу игуадзэу Къонэ Заур, АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэу Валерий Картамышевыр, АР-м ошIэ-дэмышIэ Iоф­хэмкIэ и Комитет итхьаматэу Вячеслав Лотаковыр, Кощхьэблэ районым ипащэу Хьамырзэ Заур.

Зэфэхьысыжьхэр зашIы нэ­ужым Адыгэ Республикэм и ЛIышъхьэ унэшъо гъэнэфагъэхэр афишIыгъэх. ОшIэ-дэмышIэ Iофэу Фэдз къыщыхъугъэм идэгъэзыжьынкIэ техникэу щы­Iэр зэкIэ Адыгеим инэмыкI районхэм къаращынышъ къыращэлIэщт. ЦIыфхэм яхатэхэм ыкIи губгъохэм къыщагъэкIыгъэ лэжьыгъэр къэгъэнэжьы­гъэным, зэщыкъогъэ гъогухэр ыкIи коммуникациехэр гъэцэ­кIэжьыгъэнхэм апае амалэу яIэр зэкIэ рахьылIэщт.

АР-м и ЛIышъхьэ ипресс-къулыкъу Сурэтхэр: А. Гусев.