ТичIыпIэгъу лъапIэхэр!

Тэ, Адыгэ Республикэм ина­хьыжъхэм, Хэгъэгу зэошхом иветеранхэм, Урысые Федерацием и УIэшыгъэ КIуачIэхэм яветеранхэм тышъорэгушхо, социальнэ хъытыу­хэр къызфагъэфедэхэзэ ныбжьыкIэ­хэр агъэплъэхъунхэу зыщыфежьэ­хэрэ, «щыIэкIэ тхъагъом» къы­фэзыщэнхэ зылъэкIыщт амалхэр етIуп­щыгъэу ИнтернетымкIэ зыща­лъагъэIэсырэ лъэхъэнэ гумэкIыгъом Хэгъэгум къулыкъу фэшъухьыныр, ащ шъуфэшъыпкъэныр шъо къыхэшъухыгъ. Тэри, тятэжъхэри Хэгъэгум фэшъыпкъагъэх. Тихэгъэгу ихэбзэ шIагъохэр лъыгъэкIотэгъэнхэм ар игъогу. ШъугукIэ а гъогур къызэрэ­хэшъухыгъэри апэрэ ТекIоныгъэу плъытэн плъэкIыщт.

Советскэ Союзым и ЛIыхъужъэу Андырхъое Хъусен ыцIэкIэ щыт Мыекъопэ артиллерийскэ дивизионым иапэрэ дзэкIолIхэу шъо шъузэ­­рэхъугъэм тырэгушхо. Тятэжъхэм яосыет шъуфэшъыпкъэу шъугу къы­шъуиIуагъэм тетэу шъузекIуагъ. Нэ­мыц фашист техакIохэм шъуя­тэжъхэм хэгъэгур зэращаухъума-гъэм фэдэу, шъори IэкIыб къэрал щынагъоу къыкъокIыгъэм шъупэуцужьыным гу тешъушIыхьагъ. Ти­къэралыгъо игъунапкъэхэр неонацизмэм къызэпемыгъэчыгъэным епхыгъэ пшъэрылъ мыпсынкIэр шъо къышъуфэгъэзагъэ хъугъэ. ШъуилIыхъужъныгъэ зекIуакIэ тырэгушхо!

Сталинград иартиллеристхэу ­Хэгъэгу зэошхом къэгъэзапIэ фэ­хъунымкIэ мэхьанэшхо зиIагъэхэр шъор­кIэ ренэу щысэтехыпIэ орэ­хъух. Ахэм а заом илъэхъан пыим лагъымэ ыкIи топыщэ миллион 13-м ехъу тыратэкъуагъ. Хэгъэгум ахэм осэшхо афишIыгъ ыкIи шэкIогъум и 19-р артиллериемрэ ракетнэ дзэ­хэмрэ я Мафэу хагъэунэфыкIы.

ТилъапIэхэу Хэгъэгум иухъума­кIохэр! Тэщ фэдэхэу заом итхьамыкIагъохэм ащыгъуазэхэмкIэ псынкIагъоп мы сатырхэр тхыгъэнхэр. Шъуянэхэмрэ шъуятэхэмрэ афэдэу тэри тышъуфэгумэкIэу ты­шъулъэплъэ, хэушъхьафыкIыгъэ дзэ операцием ишъолъыр къыщы­хъухэрэми защытэгъэгъуазэ.

Къыжъудэхъурэ пстэуми тагъэгу­шIо. ТичIыпIэгъоу Андырхъое Хъу­сен лIыхъужъныгъэ зыщызэрихьэгъэ Луганскэ Народнэ Республикэм шъузэрэщыIагъэр, ишIэжь зэрэжъу­гъэлъэпIагъэр зымыуасэ щыIэп.

Патриотхэу къэхъухэрэп, патриот хъунхэм фагъасэх! Шъуянэ-шъуя­тэхэу шъузыпIугъэхэм, ти УIэшыгъэ КIуачIэхэм яхэбзэ шIагъохэм шъуа­фэшъыпкъэным зынаIэ тезгъэты­гъэхэм инэу тафэраз.

Тицыхьэ телъ лIыхъужъныгъэ шъухэлъэу шъуипшъэрылъ зэрэжъу­гъэцэкIэщтым! ТекIоныгъэр къызэ­рэдэшъухыщтым техъырэхъышэрэп. Командирхэм шъуядэIу, яунашъохэр жъугъэцакIэ! Шъусакъ! Зым адрэм ыгу къерэIэт!

ТэркIэ шъо зэкIэми Хэгъэгум шъурилIыхъужъ! Хэтрэ цIыфи хэ­гъэгу цIыкIуи, хэгъэгу ини иI. Шъо хэгъэгу цIыкIоу шъуиIэр Адыгеир ары. Ащ ыкъо шIагъоу шъузэрэщытыр къэжъугъэшъыпкъэжь! Шъоры ар джыри нахь дахэ зышIыщтыр, ыпэкIэ лъызгъэкIотэщтыр. Нэбгырэ пэпчъ тышъущыгъуаз ыкIи ТекIоныгъэр къыдэшъухыгъэу, джыри нахь псыхьагъэ шъухъугъэу шъуиджэныкъохэм къафэжъугъэзэжьынэу ты­шъожэ.

Тэ тышъуигъус ыкIи тызэгъусэу ТекIоныгъэр къыдэтхыщт!

ГъукIэлI Нурбый. Нахьыжъхэм я Совет итхьамат.

Къоджэ Аслъан. Ветеранхэм я Совет итхьамат.