Урысыем и Президентэу Владимир Путиныр орденэу «Родитель­ская слава» зыфиIорэр Шишкинхэу Ильярэ Елизаветэрэ афэгъэ­шъошэгъэным фэгъэхьыгъэ Указым кIэтхэжьыгъ.

[caption id="attachment_133332" align="aligncenter" width="800"] Сурэтыр: А. Гусев.[/caption]

Унагъом игъэпытэнрэ кIэлэцIыкIухэм япIунрэ алъэныкъокIэ гъэхъагъэу яIэхэм апае ар афагъэшъошагъ. Урысые Федерацием и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновыр Адыгеим къэкIуагъ, Шишкинхэм яунагъо IукIагъ ыкIи орденыр ахэм аритыжьыгъ. Мы Iофтхьабзэм хэлэжьагъ Адыгеим и ЛIышъхьэу КъумпIыл Мурат.

Владимир Устиновым ны-ты­хэм ыкIи кIэлэцIыкIухэм закъы­фигъазэзэ къафэгушIуагъ тын лъапIэм, джащ фэдэу кIэлэцIыкIухэм якъэухъумэн и Мафэу къэблагъэрэм афэшI. Полно­мочнэ лIыкIом къызэрэхигъэщыгъэмкIэ, унагъом ихэхъоныгъэрэ кIэлэцIыкIухэр пIугъэнхэмрэ мэхьанэшхо яIэу щыт.

«Унагъор — анахь лъапIэу тиIэр ары. Шъо шъуиунагъоу кIэлэцIыкIу 11 шIагъо зыщы­шъупIурэр а лъэныкъомкIэ щы­сэу щыт. Ахэр ппIунхэмкIэ щэ­Iэгъэшхуи уиIэн, къиныби плъэгъун фаеу мэхъу. Сэ сыщы­гъуаз шъуипшъэрылъ дэгъу дэ­дэу зэрэжъугъэцакIэрэм. Шъуи­кIэлэцIыкIухэм сэнаущыгъэ ахэлъ, ахэр творчествэм пылъых, зэнэкъокъу, фестиваль зэфэшъхьафхэм ахэлажьэх, те­кIоныгъэхэри къащыдахыхэу къыхэкIы. Сыгу къыздеIэу шъуи­унэгъошхо сыфэгушIо орденэу «Родительская слава» зыфи­Iорэр къызэрэфагъэшъошагъэм пае», — къыIуагъ Владимир Устиновым.

Зэшъхьэгъусэхэу Ильярэ Ели­заветэрэ кIэлэцIыкIу 11 апIу, а унэгъо зэгурыIожьыр псэупIэу Ханскэм щэпсэу. Елизаветэ — унэгъо хъызмэтышI, апшъэрэ гъэсэныгъэ иI. Илья водителэу мэлажьэ. Зэшъхьэгъусэхэр щы­IэкIэ-псэукIэ тэрэз зэряIэщтым дэшъхьахыхэрэп, кIэлэцIыкIухэм псауныгъэ яIэным, гъэсэныгъэ ягъэгъотыгъэным, цIыф тэрэз хъунхэм яшъыпкъэу ыуж итых. КIэлэцIыкIухэр янэрэ ятэрэ адеIэх, ялэгъухэмкIи щысэтехыпIэх: Полинэ, Владимир, Эмилие, Аннэ, Софие, Авенир ыкIи Евэ еджапIэм макIох, нахьыкIэхэу Елисей, Аделинэ, До­ме­ник ыкIи Александр анаIэ аты­рагъэты. Ащ нэмыкIэу япшъэ­шъэжъые анахьыжъэу Полинэ кIэлэцIыкIу художественнэ еджа­пIэм макIо, сурэтшIыным зыфегъасэ. Владимир аккор­деоным феджэ ыкIи гъэхъэ­гъэшIухэр ышIыгъэх, зэнэкъокъу ыкIи фестивалыбэмэ чIыпIэ гъэнэфагъэхэр къащихьыгъэх. НахьыкIэхэри нахьыжъхэм акIэ­рэплъых, искусствэхэмкIэ еджа­пIэм щеджэх, творчествэм пы­лъых, ны-тыхэм адеIэх.

Орденэу «Родительская слава» зыфиIорэр ахэм янэрэ ятэрэ къаратыжьыгъ. Ащ игъус сомэ мин 500-у зэтыгъо кIэ­гъэгушIун фэдэу къаратыгъэр. Адыгэ Республикэм и ЛIышъхьэу КъумпIыл Мурат тын лъапIэм пае унагъом фэгушIуагъ. ШIу­хьафтынэу сабыибэ зэрыс уна­гъом микроавтобус, кушъхьэфа­чъэхэр, самокатхэр, кIэлэцIыкIу пэпчъ джэгукIэ ыкIи джэголъэ зэфэшъхьафхэр къаратыгъ.

«Унэгъошхо зэгурыIожьхэр зэ­рэтиIэхэм лъэшэу тырэгушхо. ШIулъэгъум ыкIи лъытэныгъэм щымыкIэхэу кIэлэцIыкIухэм пIуныгъэ арагъэгъоты. Обществэм ихэхъоныгъэкIи ащ фэдэ унагъохэм мэхьанэшхо яIэу щыт. КIэлэцIыкIухэр цIыфыгъэ шэпхъэ дахэхэм ахэшъощэх, хэгъэгум играждан шъыпкъэу хъунхэм шъунаIэ тешъогъэты, IофшIэным зыщамыдзыенэу ыкIи пшъэдэкIыжь ахьынэу шъогъа­сэх. Ащ фэдэ унагъохэр арых къэралыгъом ипытапIэхэр. Арышъ, унагъохэм IэпыIэгъу ятыгъэныр, сабыибэ зэрыс унагъохэм афэгумэкIыгъэныр апшъэрэ мэхьанэ зэттырэ лъэ­ныкъохэм ащыщых», — къыхигъэщыгъ КъумпIыл Мурат.

Шъугу къэтэгъэкIыжьы: ны­хэмрэ сабыибэ зэрыс унагъо­хэмрэ IэпыIэгъу ятыгъэнымкIэ Iофтхьэбзэ зэфэшъхьафыбэ республикэм щызэшIуахы. Ана­хьэу анаIэ зытырагъэтыхэрэр сабыибэ зэрыс унагъохэр ары, непэкIэ ахэм япчъагъэ хьазырэу 8000-м нэсыгъ.

АР-м и ЛIышъхьэ ипресс-къулыкъу