«Щынэгъончъэ ыкIи шэпхъэшIухэм адиштэрэ гъогухэр» зыфи­Iо­рэ лъэпкъ проектым къыдыхэлъытагъэу республикэм щагъэцэ­кIэжьыхэрэм ащыщ станицэу Ханскэм икIэу къалэу Шытхьалэ екIуалIэрэр.

[caption id="attachment_133013" align="aligncenter" width="800"] Сурэтыр: «Адыгеяавтодор».[/caption]

Автомобиль гъогухэмкIэ Гъэ­IорышIапIэу «Адыгеяавтодорым» къызэрэщаIуагъэмкIэ, гъогушI хъызмэтшIапIэу N 3-р ары фэгъэзагъэр. Ащ сыдигъокIи ипшъэрылъхэр хэзыгъэ имыIэу егъэцакIэх, шапхъэхэм ыкIи пIалъэхэм адэхырэп.

Лъэпкъ проектэу зигугъу къэтшIыгъэр зыщыIэ уахътэм щегъэжьагъэу мы гъогур хэп­шIыкIэу зэхъокIыгъ. Станицэу Ханскэм иурам шъхьаIэу Верещагиным ыцIэ зыхьырэм иавто­мобиль гъогу ащ хахьэ, ар Iахь-Iахьэу агъэкIэжьыгъ. 2021-рэ илъэсым лъэсрыкIо гъогоу фашIыгъэхэм яшIуагъэкIэ гъогурыкIоныр мы псэупIэм нахь щынэгъончъэ щыхъугъ.

2023-рэ илъэсым гъогум иIахьитIу, ар километри 3,4-рэ, ашIынэу ары зэрагъэнэфагъэр. Ащ пстэумкIи сомэ миллион 50 пэIуагъэхьащт. ПсэолъэшIын Iоф­хэр ыкIэм рафылIагъэх, асфальтым ителъхьан аухыгъэу, гъогу гъунэхэр зэрагъафэх.

Тхьамафэм ыкIэм нэс аухы­нэу гухэлъ яI, нэужым гъогу тамыгъэхэр агъэуцущтых, зыщищыкIагъэм щагъэтхъыщтых.