ЖъоныгъуакIэм и 21-м Адыгэ Республи­кэм и Къэралыгъо филармоние я XIX-рэ лIэшIэгъум щыIэгъэ Кавказ заом хэкIодагъэхэм яшIэжь зыщагъэлъэпIэрэ зэхахьэ щыкIуагъ.

Адыгеим и ЛIышъхьэу КъумпIыл Мурат ыцIэкIэ къэзэрэугъоигъэхэм закъыфигъэзагъ АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыны­гъэхэмкIэ ыкIи къэбар жъугъэм иамалхэмкIэ и Комитет ипащэу Шъхьэлэхъо Аскэр.

ЛIышъхьэм иджэпсалъэ къыщеIо непэрэ лъэхъаным псэу­хэрэм Кавказ заом иилъэсхэм фэхыгъэхэр агу къагъэкIыжьызэ, тятэжъ пIашъэмэ хэкужъыр, ащ игъусэу ныдэлъфыбзэр, лъэпкъ культурэр, лIэшIэгъу пчъа­гъэ зыныбжь шэн-хабзэхэр къызэрагъэнагъэхэм афэшI шъхьэкIафэ зарафашIырэр.

«БлэкIыгъэм идесэхэм тахаплъэзэ, тэ нахь лъэшэу зэхэтэшIэ мамырныгъэмрэ зэгурыIоныгъэмрэ анахь лъапIэ зэрэщымыIэр», — къыIуагъ Шъхьэ­лэхъо Аскэр.

Ащ къыкIэлъыкIоу гущыIэр ыштагъ АР-м и Къэралыгъо Совет — Хасэм и Тхьаматэ игуадзэу, Урысыем и ЛIыхъу­жъэу Цэй Эдуард.

Ащ хигъэунэфыкIыгъ Адыгеим ис лъэпкъхэм ятарихъ шIэ­жьым шъхьэкIэфэныгъэ фашIэу, зэгурыIоныгъэ азыфагу илъэу зэрэдэпсэухэрэр, ар зыпкъитыныгъэм, мамырныгъэм алъапсэу зэрэщытыр. Адыгэ Хасэм итхьа­матэу ЛIымыщэкъо Рэ­мэзан къызэгущыIэм къыхи­гъэщыгъ адыгэхэр хэгъэгу шъэ­ныкъом ехъумэ зэращыпсэухэ­­­рэр, тыдэ щымыIэхэми ялъэпкъ шэн-ха­бзэхэр къызэраухъумэхэрэр.

 АР-м илъэпкъ театрэу Цэй Ибрахьимэ ыцIэ зыхьырэмрэ ­ансамблэу «Ислъамыемрэ» яартистхэм къагъэхьазырыгъэ шIэжь къэгъэлъэгъоным цIыфхэр еплъыгъэх.