УФ-м и УIэшыгъэ КIуачIэхэм дзэ къулыкъур ащыхьыгъэ­ныр хэгъэгум икъэухъумэн лIыгъэ хэлъэу еуцолIэрэ хъулъфыгъэ шъыпкъэхэм къыхахы. ЗэзэгъыныгъэкIэ къулы­къур зыхьынэу кIэтхагъэхэм ащыщэу Борис К. ищыIэныгъэ пытэу къулыкъушIэныр зэрэхэтыр, граждан пшъэдэкIыжьэу иIэр гъэзетэу «Адыгэ макъэм» иеджакIохэм къафиIотагъ.

[caption id="attachment_132983" align="aligncenter" width="800"] Сурэтыр: А. Гусев.[/caption]

— ЗэзэгъыныгъэкIэ къулыкъу пхьыныр сыдым къыхэкIэу ипхъухьагъа?

— Урысыем и УIэшыгъэ КIуачIэхэм къулыкъур ащыхьыгъэныр хъулъфыгъэ пэпчъ ипшъэрылъ, сыд фэдэрэ лъэхъани ар агъэлъапIэ. ДзэкъулыкъушIэхэм я Къэралыгъо шIулъэгъоу фыряIэр сыд фэдэрэ мылъку къэкIуапIи ебгъэпшэшъу­щтэп. Сыдэущтэу укъызщыхъугъэ, узщапIугъэ хэгъэгум икъэухъумэн ухэмы­лэжьэщта? Ащ къыхиубытэрэр чIыгу закъоп, мыщ унагъори хэт: ны-тыхэр, ны къылъфыгъэхэр, шъхьэгъусэр, кIэлэцIыкIухэр… Ахэм тафэбэнэным мэхьанэшхо иI. Титарихъ шIэжь, Хэгъэгу зэо­шхом илъэхъан тихэгъэгу къэзыухъумагъэхэм ялIыхъужъныгъэ дгъэлъэпIэн фае. — Ащ фэдэ лъэбэкъу пшIынымкIэ щысэтехыпIэ горэ уиIэу щытыгъа?

— СиунагъокIэ дзэ Iофым феджагъэу зыпари къахэкIыгъэп, ау сицIыкIугъом къыщегъэжьагъэу гухэлъ чыжьэу зыдэсIыгъыгъэхэм ащыщ дзэкъулыкъушIэ сыхъумэ сшIоигъоу. СятэжъитIум ятэхэр фашизмэм ебэныгъэхэм ащыщыгъэх. Зыр десантникэу щытыгъ, «Малая земля» зыфиIорэм икъэухъумэн щыхэкIодагъ. ЯтIонэрэр Пшызэ къэзэкъыдзэм и ХышIуцIэ отдел иесаулыгъ. Шыудзэм хэтэу Кавказ къушъхьэтхыр къыухъумагъ, Краснодар краир ыкIи Адыгеир шъхьафит шIыжьыгъэнхэм хэлэжьагъ. Дзэ-патриотическэ пIуныгъэу къысхалъхьагъэр а лъэбэкъур сшIыным иушъхьагъоу сэлъытэ. СиеджэпIэ гупсэ тичIыгу итарихъ, тятэжъ пIашъэхэм зэрахьэгъэ лIыхъужъныгъэм афэгъэхьыгъэ Iофтхьабзэхэм лъэшэу анаIэ щытетыгъ. Джыри сыцIыкIузэ сихэгъэгу шIу зэрэслъэгъурэр къызгурыIуагъ, дзэм къулыкъур щысхьыным сыкIэхъопсыщтыгъ. Джы ар къыз­дэ­хъунэу, дзэ-учетнэ сэнэхьатэу зэзгъэ­гъотыщтыр къулыкъум имызакъоу, щы­Iэныгъэми щызгъэфедэжьышъунэу амал сиIэ хъугъэ.

— Зэзэгъыныгъэ шIыкIэм тетэу къулыкъур пхьыныр зэрагъэлъапIэрэм дакIоу, ахъщэ тын гъэнэфагъэхэр ыкIи фэгъэкIотэн зэфэшъхьафхэр къыды­хэлъытагъэх. Къэралыгъо IэпыIэгъоу дзэкъулыкъушIэхэм аратырэм шъо шъуиунагъокIэ ишIуагъэ къышъокIа?

— Ары, къэралыгъом фэлъэкIыщтыр къытфешIэ. Дзэ частым сыщэIэфэ ахъщэм, псэупIэ Iофыгъохэм сямыгупшы­сэми хъущт. ГущыIэм пае, медицинэ фэIо­-фэшIэ зэфэшъхьафхэр сфагъэцакIэх. СикIэлитIу фэгъэкIотэныгъэхэр къа­лъэIэсых, чэзыум хэмытхэу зыфэехэ гъэсэныгъэ учреждением ыкIи кIэлэ­цIыкIу IыгъыпIэм чIыпIэ щагъотыщт. ДзэкъулыкъушIэхэм яшъхьэгъусэхэми фэгъэкIотэныгъэхэр яIэх, ищыкIагъэмэ IофшIэн арагъэгъотыщт.

— УикIалэхэм мы лъагъор къыха­хынэу уфэещта?

— Ары. Ау сыдэу хъугъэми, сэнэхьат къыхэхыныр шъхьадж ежь ишIоигъоныгъэ диштэнэу щыт. Сэ сфэлъэкIыщтыр ахэр патриотэу згъэсэнхэр арышъ, джащ ыуж сит. Еджагъэхэу, хэткIи щысэте­хыпIэхэу згъэсэщтых. Сыд фэдэрэ егъэ­жьапIэу ашIыщтымкIи сакъоуцощт. Уры­сыем и УIэшыгъэ КIуачIэхэр, къэра­лыгъомкIэ мэхьанэ зиIэ нэмыкI къулы­къухэр къыхахынхэкIи хъун.

— Плъыр-стыр чIыпIэхэм къулыкъур ащыпхьыгъэу щыта?

— ХэушъхьафыкIыгъэ дзэ операциер зыщыкIорэм дзэ пшъэрылъхэр щызгъэцэкIагъэх. УIагъэ къызэрэстращагъэм къыхэкIыкIэ сипсауныгъэ зыпкъ есэгъэу­цожьы, нэужым синыбджэгъухэм сагоу­цожьын гухэлъ сиI.

— Шъуашэхэр, Iашэхэр икъоу шъо­гъотыха?

— ИщыкIагъэр зэкIэ игъом къытIэкIагъахьэ, гъомылапхъэми тыщагъакIэрэп.

— Адэ шIушIэ IэпыIэгъур къышъу­IукIэщтыгъа?

— Урысые дзэр лъэпкъым идзэу щыт. Арышъ, тылым щыIэхэм яIэпыIэгъу тищыкIагъ, зэолIхэм агу ащ къыдещае. ШIушIэ IэпыIэгъур зэпымыоу къытIэ­кIахьэщтыгъ.

Шъугу къэдгъэкIыжьын, илъэс 18 — 60 зыныбжьыхэу Урысые Федерацием щыпсэухэу гурыт гъэсэныгъэ зиIэхэр дзэкъулыкъушIэ хъунхэ алъэкIыщт. НыбжьыкIэхэу къулыкъур ахьынэу зиуахътэ къэсыгъэхэр зы илъэсым ычIыпIэ илъэ­ситIу зэзэгъыныгъэм кIэтхэнхэ амал яI. Урысыем и Президентэу Владимир Путиным иунашъокIэ, къулыкъур зэзэгъы­ныгъэ шIыкIэм тетэу ыхьыным апэрэу кIатхэрэм зэтыгъо ахъщэу сомэ мини 195-рэ, Адыгеим и ЛIышъхьэу КъумпIыл Мурат иунашъокIэ зэтыгъоу сомэ мини 150-рэ араты.

ЗэзэгъыныгъэкIэ къулыкъур зыхьы зышIоигъохэр зыщыпсэухэрэм елъытыгъэу дзэ комиссариатхэм зафагъэзэн алъэкIыщт. ЗэкIэ ахъщэ тынхэм ыкIи фэгъэкIотэныгъэу щыIэхэм япхыгъэ къэбарыр нахь игъэкIотыгъэу зэзгъашIэ зышIоигъохэм телеграм-каналэу «Адыгея — Служу Родине» зыфиIорэм рагъо­тэщт.