Бизнес цIыкIум ыкIи гурытым IэпыIэгъу ягъэгъотыгъэным, предпринимательхэм кIэщакIо зыфэхъухэрэр пхыращынхэмкIэ адеIэгъэным фытегъэпсыхьэгъэ лъэпкъ проектым къыдыхэлъытагъэу шъолъырхэм ащагъэпсыгъэ гупчэхэм яшIуагъэ къызэрэкIорэр уахътэм къыгъэлъэгъуагъ.

[caption id="attachment_132938" align="aligncenter" width="800"] Дыхъу Саидэ ихъарзынэщ.[/caption]

Мы лъэныкъор мылъку къэ­кIуапIэу къыхэзыхымэ е ригъэ­жьагъэр лъигъэкIуатэмэ зышIоигъо нэбгырабэм тхылъхэм ягъэхьазырынкIэ, ябизнес зи­ушъомбгъунымкIэ, бэдзэршIыпIэхэм чIыпIэ ащаубытынымкIэ ахэр IэпыIэгъу афэхъух.

АР-м предпринимательхэм IэпыIэгъу ятыгъэнымкIэ и Гупчэ ащ фэдэу зыдеIагъэхэм ащыщ Дыхъу Саидэ. Ар поселкэу Псэкъупсэ щэпсэу, юридическэ офис Адыгэкъалэ къыщызэIуихыгъ. УФ-м и Президентэу Владимир Путиныр кIэщакIо зыфэхъу­гъэ программэу социальнэ зэ­зэгъыныгъэм фэгъэхьыгъэр ары зыхэлэжьагъэр. ЦIыфэу IэпыIэгъу зищыкIагъэр ащ фэгъэзэгъэ къулыкъум зэзэгъыныгъэм дыкIэтхэнышъ, ахъщэ гъэ­­нэфагъэ грантэу къыратынэу ащ къыдэлъытагъ. IофшIэнымкIэ ыкIи цIыфхэр социальнэу къэ­ухъумэгъэнхэмкIэ Министерствэр ары мыщ игъэцэкIэн фэгъэзагъэр.

Саидэ къызэриIуагъэмкIэ, мы программэр зэрэщыIэр нахьыпэкIэ хэлэжьагъэу, къызышъхьэ­пагъэхэм къыраIуагъ. Ащ ыуж зехьэм «Мой бизнес» зыфиIорэ Гупчэр къызэрэдеIэщтыми къы­щагъэгъозагъ.

— Мы Гупчэм Iоф щызышIэ­хэрэм лъэшэу сафэраз, — еIо Саидэ. — ЯIофшIэн хэшIыкI зэрэфыряIэр, агу етыгъэу яп­шъэ­рылъхэр зэрагъэцакIэхэрэр сэ сшъхьэкIэ згъэунэфыгъ. Да­хэу къыбдэгущыIэх, Iофым хэлъыр къыпфаIуатэ. Охътабэ рамыгъэхьэу тхылъэу ищыкIагъэхэр къыздагъэхьазырыгъэх, грантыр къысатыным пае зэ­нэкъокъум сызэрэхэлэжьэщтымкIэ къыздеIагъэх. ЕтIани мы Гупчэм ыпкIэ хэмылъэу фэIо-фашIэхэр егъэцакIэх.

БлэкIыгъэ 2022-рэ илъэсыр ары программэм Саидэ зыхэлэжьагъэр. Ащ иIоныгъо мазэ грантэу сомэ мин 350-рэ къыратыгъ. АщкIэ офисым псэуа­лъэу, техникэу ищыкIагъэр къы­щэфи, къызэIуихыгъ. КъызэриIуагъэмкIэ, мы илъэсым ишышъхьэIу мазэ ыкIэм нэс ахъщэр зэригъэфедагъэм АР-м IофшIэнымкIэ ыкIи социальнэ хэхъоныгъэмкIэ и Министерствэ щигъэгъозэн фаеу программэм къыдэлъытагъ.

Саидэ юридическэ гъэсэныгъэ зызэригъэгъотыгъэр 2006-рэ илъэсыр ары. УФ-м хэгъэгу кIоцI IофхэмкIэ и Министерствэ иакадемиеу Краснодар дэтыр къыухыгъ. Ащ ыуж мы къэлэ дэдэм иIофшIэн щыригъажьи, илъэс 15-рэ чIыфэ къэзытырэ организациехэм юрист сэнэ­хьатэу зэригъэгъотыгъэмкIэ ащылэжьагъ. Юридическэ отделым ипэщэ IэнатIэм нэсыгъэу кIэлэцIыкIу къыфэхъуи, иIофшIэн зэпигъэун фаеу хъугъэ. Сабыим зыщылъыплъэрэ уахътэм банкэу зыщылажьэщтыгъэр истыхьа­гъэу зэфашIыжьи, IофшIапIэ имыIэу къэнагъ. Джащыгъур ары исэнэхьат епхыгъэ бизнес ригъэ­жьэным гу зытыришIыхьагъэр.

— Иунэе Iоф къызэIуихымэ шIоигъоу, ау тещыныхьэхэрэм, анахьэу бзылъфыгъэхэр ары, емынэгуехэу ыуж ихьанхэу ясIомэ сшIоигъу. «Iоф мыублэм блэ хэс» аIуагъ адыгэхэм, емыгъэжьагъэм сыдигъокIи утещыныхьэ, ау ыуж уимыхьэуи ар къыбдэхъущтмэ къэпшIэщтэп. Сэри илъэс пчъагъэрэ сыгу илъэу къыздесхьакIыгъ, сыщынэщтыгъ… Сэ зэрэсымыIоу Iофыр зэпыфагъ.

Ебгъажьэмэ, пIэ зэ­телъэу ущымысымэ, къэралыгъори къыбдеIэщт, ащ сэ сыришыхьат, — къыIуагъ ащ.

Саидэ ежь-ежьырэу IофшIэн къызфэзгъотыжьыгъэхэм ащыщ. Офисыр къызызэIуихыгъэр бэшIагъэп нахь мышIэми, юридическэ фэIо-фашIэхэр цIыфхэм зафигъэцакIэхэрэр илъэс заулэ хъугъэ, зэлъашIэнэуи игъо ифагъ. Ар «кредитнэ юрист», банкхэм чIыфэ къаIызыхыгъэу, ащ иты­жьынкIэ гумэкIыгъо зиIэхэм адеIэ.

Джащ фэдэу ар унэгъо Iужъу зиIэ бзылъфыгъ, сабыищ епIу. IофшIэнымрэ кIэлэцIыкIухэм япIунрэ зэрэзэдигъэцэкIэшъу­рэмкIэ теупчIыгъ. Пшъэшъэ нахьыжъымрэ ащ ыуж къэкIырэ шъаомрэ зихэхъогъух, ежь ауж итын зэримыщыкIэгъэжьым имызакъоу, анахьыкIэ цIыкIоу илъэситIум ехъу нахь зымыныбжьым ипIункIи IэпыIэгъу къы­фэхъухэу ары къызэриIуагъэр.

ЕтIани, Краснодар кIозэ Iоф ышIэн имыщыкIэгъэжьэу, зыдэс псэупIэм пэблагъэу IофшIапIэ къызэIуихын зэрилъэкIыгъэм ишIогъэшхо къэкIуагъ. Къэралыгъо IэпыIэгъур лъэшэу къызэришъхьэпагъэр ащи къеушы­хьаты.

ХЪУТ Нэфсэт.