Адыгэ къэралыгъо университетым и Мыекъопэ къэралыгъо гуманитар-техническэ колледж Урысыем шIэныгъэмкIэ ыкIи апшъэрэ гъэсэныгъэмкIэ и Министерствэ зэхищэгъэ зэнэкъокъум щытекIуагъэхэм ащыщ хъугъэ ыкIи федеральнэ проектэу «Профессионалитет» зыфиIорэм хэхьэрэ зекIо лъэныкъом гъэсэныгъэ-къыдэгъэкIын кластер щызэхэщэгъэ­ным пэIуигъэхьанэу грантэу сомэ миллион 70-рэ къыратыщт. ЗекIоным хэщагъэхэр кластерым изэхэщэн къыхагъэлэжьэщтых.

Федеральнэ проектэу «Профессионалитет» зыфиIорэр IэпэIэсэныгъэ зыхэлъ кадрэхэм ягъэхьазырын дэлажьэ, колледжхэм ачIэсхэр лъэныкъо зэфэшъхьафхэмкIэ рагъаджэх. Гъэсэныгъэмрэ къыдэгъэ­кIынымрэ проектым зэрепхых, шъолъырыр зыщыкIэрэ кадрэхэм ягъэхьазырын, ахэм IэпэIэсэныгъэшхо ахэлъыным ар фэIорышIэ.

Кластерэу «Адыгэ Республикэм зекIонымкIэ игъэсэ­ныгъэ гупч» зыфиIорэм къыдыхэлъытагъэу гъэсэныгъэ организации 5, джащ фэдэу бизнес цIыкIум ыкIи гурытым хэщэгъэ хъызмэтшIэпIэ 14 зэхащэщт. Адыгэ къэралыгъо университетым и Мыекъопэ къэралыгъо гуманитар-техническэ колледж епхыгъэу гъэсэныгъэ площадкэхэр агъэпсыщтых, ахэм студентхэр ащырагъэджэщтых.

ЗекIоным илъэныкъуибгъукIэ егъэджэнхэр рагъэ­кIокIыщтых: хьакIэщ комплексым игъэIорышIакIу, хьакIэхэм яфэIо-фашIэхэм ыкIи ягъэшхэн пылъыщтыр, инструктор-зещакIу, зекIо зыщэщтхэр, гъомылапхъэ­хэм, псы зэфэшъхьафхэм, шхыныгъохэм ягъэхьазырын дэлэжьэщтыр, IэшIу-IушIу гъомылапхъэмэ ыкIи десертмэ яшIын фэгъэзэгъэщтыр, этно-шапхъэхэр ыгъэфедэзэ Iэмэ-псымэхэр зышIыщтыр, фитнес-инструкторыр, псауныгъэм игъэпытэн пылъыщтыр.

Проектым игъэцэкIэн къэкIощт илъэс еджэгъум Адыгэ къэралыгъо университетым и Мыекъопэ къэралыгъо гуманитар-техническэ колледж щырагъэжьэнэу агъэнафэ, нэбгырэ минитIум ехъумэ зигугъу къэтшIыгъэ сэнэхьатхэр арагъэгъотынэу рахъухьэ.

Шъугу къэтэгъэкIыжьы:

Федеральнэ проектэу «Профессионалитет» зыфиIорэр 2022-рэ илъэсым ищылэ мазэ атIупщыгъ, ар Урысые Федерацием 2030-рэ илъэсым нэс социальнэ-экономикэ хэхъоныгъэ егъэшIыгъэным фэгъэ­хьыгъ. Проектыр щыIэ зыкIэхъугъэр сэнэхьат хэхыгъэхэу непэрэ уахътэм ящыкIагъэхэм афытегъэпсыхьэгъэ специалистхэр агъэхьазырынхэу, экономикэм щыкIа­гъэу иIэхэм ащыщхэр ащкIэ дэгъэзыжьыгъэнхэр ары.

2022-рэ илъэсыр пштэмэ, федеральнэ проектыр зэрагъэцакIэрэм ишIуагъэкIэ гъэсэныгъэ кластер 71-рэ шъолъыр 43-мэ ащызэхащагъ, ахэр экономикэм илъэныкъуи 9-мэ афэгъэзагъэх: атомнэ промышленностым, мэшIокугъогу транспортым, металлургием, машинэшIыным, мэкъу-мэщым, промышленность псынкIэм, транспортым, химическэ ыкIи фармацевтическэ отраслым.

2023-рэ илъэсым джыри гъэсэныгъэ-производственнэ кластер 70-рэ зэхащэнэу агъэнафэ, ахэр шъолъыр 40-мэ ащагъэцэкIэщтых, лъэныкъуибгъумэ афэгъэзэгъэщтых: къэбарлъыгъэIэс технологиехэм, мэз промышленностым, радиоэлектроникэм, гъэстыныпхъэ-энергетическэ комплексым, электротехническэ промышленностым, нэмыкIхэм.

Адыгэ къэралыгъо университетым ипресс-къулыкъу