ЖъоныгъуакIэм и 21-р – я XIX-рэ лIэшIэгъум щыIэгъэ Кавказ заом хэкIодагъэхэм афэгъэхьыгъэ шъыгъо— шIэжь Маф
Адыгэ Республикэм щыпсэухэу лъытэныгъэ зыфэтшIыхэрэр!
Илъэс къэс жъоныгъуакIэм и 21-м я XIX-рэ лIэшIэгъум щыIэгъэ Кавказ заом хэкIодагъэхэр тыгу къэтэгъэкIыжьых, тарихъ ЧIыгужъыр, ныдэлъфыбзэр, лъэпкъ культурэр, тишэн-хабзэхэр къытфэзыухъумэгъэ тятэжъ пIашъэхэм инэу тызэрафэразэр къэтэIо.
БлэкIыгъэм тыкъыпкъырыкIы зыхъукIэ, мамырныгъэмрэ зэгурыIоныгъэмрэ анахь лъапIэ зэрэщымыIэр нахь куоу зэхэтэшIэ. Тарихъым икъоу ущыгъозэныр, Урысыем щыпсэурэ лъэпкъ зэфэшъхьафхэм азыфагу зыкIыныгъэ пытэ илъыныр – ахэр ары ти Хэгъэгушхо къэралыгъо гъэпсыкIэу иIэм, щыIакIэу илъым алъапсэхэр.
КъыткIэхъухьэрэ ныбжьыкIэхэм яфэшъошэ псэукIэ яIэным, тихэгъэгу хэхъоныгъэхэр ышIынхэм, пшъэрылъышхохэр зэшIохыгъэнхэм ар афэIорышIэ. НепэкIэ пшъэрылъ лъапIэу тиIэр тятэжъ пIашъэхэм къытфагъэнэгъэ культурэ-тарихъ кIэн бай дэдэр къызэтедгъэнэжьыныр, мамырныгъэмрэ зэгурыIоныгъэмрэ тиреспубликэ къыщытыухъумэнхэр, тикIэлэцIыкIухэмрэ типхъорэлъфхэмрэ насыпышIонхэм тишъыпкъэу тыдэлэжьэныр ары. А пшъэрылъыр зэрэдгъэцэкIэщтымкIэ шъутэгъэгугъэ.
ТичIыпIэгъу лъапIэхэр, щыIэкIэ-псэукIэ дэгъу шъуиIэнэу, мамыр огур ренэу шъуашъхьагъ итынэу, шIум шъущымыкIэнэу, Адыгеимрэ Урысыемрэ апае гъэхъэгъакIэхэр шъушIынэу тыгу къыддеIэу тышъуфэлъаIо!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожнэр