Мы мафэхэм Къыблэ-Урысые парламент Ассоциацием хэтхэр Адыгеим ихьакIэх. Я XXXVIII-рэ конференциеу тишъолъыр щызэхащагъэм хэлэжьэнхэу ахэр къэкIуагъэх.

[caption id="attachment_132807" align="aligncenter" width="800"] Сурэтыр: А. Гусев.[/caption]

Конференцием ишапхъэхэм къызэра­дэлъытагъэмкIэ, илъэс къэс субъектэу ар зыщыкIорэр зэфэшъхьаф. Пандемием илъэхъан Ассоциацием иIофшIэн зэпимыгъэоу, онлайн шIыкIэм тетэу конференциехэр иIэщтыгъэх. Ащ тетэу зичэзыу зэхэсыгъохэм ащыщ Адыгеим и Парламент зызэхещэм, АР-м и ЛIышъхьэу КъумпIыл Мурат шIуфэс псалъэу къыщишIыгъэм, пандемиер текIэу, дунаир зырэхьатыжькIэ Адыгеим очнэ шIыкIэм тетэу Iофтхьабзэр щызэхащэнэу къызэ­рэригъэблагъэхэрэм къыкIигъэтхъыгъагъ. Ащ тетэу зичэзыу зэIукIэгъур хэбзэгъэ­уцухэм Адыгеим къахьынэу хъугъэ.

Пстэумэ апэу Ассоциацием хэт хэбзэгъэуцу къулыкъухэм япащэхэр зэIукIагъэх. Iофтхьабзэр зэрищагъ Адыгеим и Парламент и Тхьаматэу Владимир Нарожнэм. АР-м и ЛIышъхьэ ыцIэкIэ ащ хьакIэхэм шIуфэс къарихыгъ, язэIукIэгъу шIуагъэ къытэу зэхэщагъэ хъунэу къафэлъэIуагъ.

Нэужым Адыгеим къэралыгъо гъэпсыкIэ зиIэр илъэси 100, республикэм и Парламент зызэхащагъэр илъэс 30 зэрэхъугъэм афэгъэхьыгъэ документальнэ фильм къагъэлъэгъуагъ. Республикэм хэхъоныгъэу ышIыгъэхэм, псэолъакIэу щагъэуцугъэхэм, чIыпIэу зэтырагъэ­псыхьажьыгъэхэм ащ хьакIэхэр нэIуасэ фишIыгъэх.

Хэбзэгъэуцухэм язэIукIэгъу хэлэ­жьагъ АР-м и ЛIышъхьэрэ министрэхэм я Кабинетрэ я Администрацие ипащэу Владимир Свеженец. ШIуфэс псалъэу ащ къышIыгъэм Ассоциацием шъолъырхэм язэдэлэжьэныгъэ гъэпытэгъэнымкIэ, социальнэ-экономикэ ыкIи гуманитар зэпхыныгъэу яIэм зиушъомбгъунымкIэ мэхьэнэшхо зэриIэр къыщыхигъэщыгъ.

— Ассоциацием хэбзэ гъэцэкIэкIо ыкIи лIыкIо къулы­къухэм зэпхыныгъэ адыриIэу, ащ къыпкъырыкIызэ иIофшIэн зэхещэ. А зэпстэур тичIыпIэхэм хэхъоныгъэхэр ашIынхэм, лъэпкъ пшъэрылъхэр гъэцэкIэгъэнхэм фэIорышIэ, — къыIуагъ ащ.

Iофтхьабзэм икIэухым Адыгеим къэралыгъо гъэпсыкIэ зиIэр илъэси 100 зэрэхъугъэм фэгъэхьыгъэ юбилейнэ медалэу ыкIи нэпэеплъ шIухьафтынэу хэбзэгъэуцу къулыкъухэм ялIыкIохэм афагъэхьазырыгъэхэр аратыжьыгъэх.

Ащ ыужым Ассоциацием икомитетхэм зэхэсыгъохэр яIагъэх. Шъхьадж зыфэгъэзэгъэ лъэныкъом елъытыгъэу шъо­лъыр­хэм яхэбзэгъэуцу къулыкъухэр кIэ­щакIо зыфэхъугъэ джэпсалъэхэм, законопроектхэм ахэр атегущыIагъэх. ПстэумкIи Iофыгъо 70-рэ хэбзэгъэуцу­хэм къагъэ­хьазырыгъагъ, инахьыбэм ады­рагъэ­штагъ.

Урысыем и Къыблэ шъолъыр ипарламентхэм я Ассоциацие и Совет зэхэ­сыгъоу нэужым иIагъэм тхьамэтагъор щызэрихьагъ АР-м и Къэралыгъо Совет — Хасэм и Тхьаматэу Владимир

Нарожнэм. Пленарнэ зэхэсыгъом пае комитетхэм къагъэхьазырыгъэ повесткэм Советыр тегущыIагъ, Iофыгъоу ащ щыгъэнэфагъэхэм зэкIэми ягъоу зэдаш­тагъ.

Мы мэфэ дэдэм хэбзэгъэуцухэу Адыгеим щызэIукIагъэхэм Гупчэ сау­гъэт зэхэтэу Мыекъуапэ дэтым къэгъагъэхэр кIэралъхьагъэх. Джащ фэдэу респуб­ликэм ичIыпIэ дахэхэр хьакIэхэм арагъэлъэгъугъ.

Пленарнэ зэхэсыгъоу зэпстэур зыщызэфахьысыжьыщтэу, пшъэрылъхэр зыщагъэнэфэщтыр непэ щыIэщт. ХЪУТ Нэфсэт.