ЧIыфэр игъом птыжьын фае
Республикэм икъэлэ шъхьаIэ щыпсэурэ хъулъфыгъэм хэбзэIахьхэр игъом зэримытыжьыгъэхэм ыкIи гъогурыкIоныр щынэгъончъэным ишапхъэхэр гъогогъу пчъагъэрэ зэриукъуагъэхэм къыкIэлъыкIоу къытыралъхьэгъэ тазырхэр зэримыпщыныжьыгъэхэм афэшI хьыкум приставхэм агъэпщынагъ.
Хъулъфыгъэм Iоф къызэрэфызэIуахыгъэр раIуагъ, уахътэу фагъэнэфагъэм ехъулIэу ипшъэрылъхэр зимыгъэцакIэкIэ чIыфэм дакIоу хьыкум приставхэм Iофыр къызэрэзэIуахыгъэм тефэу аугъоирэ ахъщэри зэрэрагъэпщыныщтыр гурагъэIуагъ. Ау хьыкум приставхэм къаIуагъэм ар едэIугъэп. Ащ къыхэкIыкIэ иавтомобилэу ВМW-р ыгъэфедэн фимытынэу, джащ фэдэу исчет илъыгъэ ахъщэр рахынэу хэбзэухъумакIохэм унашъо ашIыгъ.
Мы IофшIэным ыуж хьыкум приставхэр джыри зэ хъулъфыгъэм дэгущыIагъэх, изекIуакIэ зэрэмытэрэзыр гурагъэIуагъ. Ащ дакIоу административнэ пшъэдэкIыжьым къыдэлъытагъэхэр зимыгъэцакIэкIэ Урысыем игъунапкъэ зэпичын зэримылъэкIыщтыр раIуагъ.
Хъулъфыгъэм сомэ мини 114-м ехъу зытефэрэ тазырхэр къыпщыныгъэх, ащкIэ Iофыр зэфашIыжьыгъ.
Хьыкум приставхэм я Федеральнэ къулыкъу АдыгеимкIэ и ГъэIорышIапIэ ипресс-къулыкъу.