АР-м хэгъэгу кIоцI IофхэмкIэ и Министерствэ зызэхащагъэр непэ,  илъэс 31-рэ хъугъэ. Мы мэфэкIым тефэу полицием иIофышIэ ныбжьыкIэ 30-м ехъоу ясэнэхьаткIэ еджэныр къэзыухыгъэхэм присягэр аштагъ. Тихэгъэгу фэшъыпкъэхэу къызэрагъэгъунэщтыр, цIыфхэм ярэхьатныгъэ къызэраухъумэщтыр мэфэкI Iофтхьабзэм къыщаIуагъ.

[caption id="attachment_132780" align="aligncenter" width="800"] Сурэтыр: А. Iэшъын.[/caption]

Iофтхьабзэм ипэублэ полицием иIофышIэхэу къулыкъур ахьызэ хэкIодагъэхэм ясаугъэтэу ведомствэм ищагу къыщызэIуа­хыгъэм къэгъагъэхэр кIэлъыралъхьагъэх, хэкIодагъэхэм яшIэжь агъэлъапIэзэ шъхьащэ афашIыгъ.

Нэужым УФ-м и Конституцие къыгъэнэфэрэ лъэныкъо пстэури шIокI имыIэу зэрагъэцэкIэщтымкIэ, яхэгъэгу шъхьэкIафэ фашIызэ къулыкъур зэрахьыщтымкIэ, цIыфхэм яфитыныгъэхэр къызэраухъумэщтымкIэ, зыщыпсэухэрэ къэралыгъом хэхъоныгъэхэр ышIынхэм зэрэфэлэжьэщтхэмкIэ ныбжьыкIэхэм гущыIэ къатыгъ, присягэр аштагъ.

АР-м хэгъэгу кIоцI IофхэмкIэ иминистрэу Олег Безсмельницыныр ведомствэр зызэхаща­гъэр илъэс 31-рэ зэрэхъугъэм фэгъэ­хьыгъэ мэфэкIымкIэ хэгъэгу кIоцI къулыкъум иветеранхэм ыкIи икъулыкъушIэхэм къафэгушIуагъ. ХэбзэухъумакIохэм ясатыр къыхэуцорэ ныбжьыкIэхэм хэбзэшIоу нахьыжъхэм къагъэнагъэр зэрэлъагъэкIотэщтым ицыхьэ зэрэтелъыр ипсалъэ щыхигъэунэфыкIыгъ. Пшъэрылъэу апашъхьэ итхэр зэрифэшъуашэу агъэцэкIэнхэр, цIыфхэм яфитыныгъэхэр къэухъу­мэгъэнхэм анаIэ тырагъэтыныр анахь шъхьаIэу къыгъэнэфагъэх.

— Полицием къулыкъур щыпхьыным фэшI пшъэдэкIыжь, шъыпкъэныгъэ, зэфагъэ пхэ­лъынхэ ыкIи цIыфхэм лъытэныгъэ афыуиIэн фае. Шъуисэнэхьат фэIэпэIасэ шъухъуным пае шъу­лъэкI ешъухьылIэнэу щыт. ЦIыф­хэм шъуафэлажь, бзэджашIэхэм ащышъуухъумэх. Хэгъэгу кIоцI къулыкъум иIофышIэ щытхъуцIэр сыдигъуи чIэшъумын, — къы­Iуагъ министрэм.

Присягэ зыштагъэхэм къафэгушIуагъэх отставкэм щыIэ полицием иполковникэу ХъутIыжъ Азмэт, министерствэм епхыгъэу зэхащэгъэ Общественнэ советым итхьаматэу Хъунэго Рэщыдэ. ЯщыIэныгъэ гъогу зэрапхыгъэ къулыкъум ухэтыныр къин нахь мышIэми, ныбжьыкIэхэм гъэхъэ­гъэшIухэр зэрашIыщтхэм, къэралыгъом, республикэм ярэхьатныгъэ, цIыфхэм яфитыныгъэхэр къызэраухъумэщтхэм яцыхьэ зэрателъыр къаIуагъ. КъяуалIэ­хэрэм шъхьэкIафэ афашIыныр, цIыфыгъэр чIамынэныр, хэбзэгъэуцугъэм къыдилъытэрэ лъэныкъо пстэури агъэцэкIэныр япшъэрылъ шъхьаIэу зэрэщытыр агу къагъэкIыжьыгъ.

АР-м хэгъэгу кIоцI IофхэмкIэ и Министерствэ ипресс-къулыкъу ипащэу Гъомлэшк Байзэт къызэ­риIуагъэмкIэ, присягэ зыштэгъэ ныбжьыкIэхэр ясэнэхьат епхыгъэ гупчэхэу Краснодар ыкIи станицэу Ханскэм адэтхэм ащеджагъэх. Ахэм ахэтых участковэ уполномоченнэм, патруль-постовой къулыкъум, уголовнэ лъыхъу­ным иIофышIэхэр, следовательхэр ыкIи оперативникхэр.

— Къулыкъу пхьыныр зэрэмыпсынкIэр, арэу щытми ащ ухэхьагъэу, шъуашэр зыщыплъа­гъэу, тэмэтелъ зытеплъхьагъэмэ угу етыгъэу Iоф зэрэпшIэн фаер ащымыгъупшэнэу, къулыкъум пшъэдэкIыжьышхо зэрэпылъыр къагурыIонэу тащэгугъы, — къы­Iуагъ Б. Гъомлэшкым.

КIАРЭ Фатим. Сурэтыр: А. Iэшъын.