Пионер организациеу В. И. Лениным ыцIэ зыхьыщтыгъэр СССР-м зыщызэхащэгъагъэр непэ илъэси 101-рэ мэхъу. Ар 1922-рэ илъэсым жъоныгъуакIэм и 19-м Компартием иныбжьыкIэ организацие (ВЛКСМ-м) иунашъокIэ зэхащэгъагъ. Пионер организациер щэIэфэкIэ кIэлэцIыкIу миллионхэр ыпIугъэх, ахэм хэгъэгур шIу алъэгъунэу ыкIи къаухъумэнэу ыгъэсагъэх.

Организациер щымыIэжьми, илъэс къэс пионерхэм я Мафэ тихэгъэгу щыхагъунэфыкIы. Галстук плъыжьыр яцIыкIугъом зыпшъэ дэлъыгъэхэу, зыныбжь хэкIотагъэхэри мэфэкIым ягуапэу пэгъокIых, илъэс къэс зыхэтыгъэхэ организациер агу къагъэкIыжьы.

Организацием ыпIу­гъэхэм тащыщыгъ

Тэ, тызэлэгъу-зэныбджэгъу­хэм, пионер ухъуным мэхьанэ ин еттыщтыгъ, гущыIэу ттыгъэр зэрэдгъэцэкIэжьын фаер зыщыдгъэгъупшэщтыгъэп. ШIэгъэн фаехэм ащыщыгъэх еджэным уегугъуныр, къэбзэныгъэмрэ дисциплинэмрэ уалъыплъэныр, нахьыжъхэм шъхьакIэфэныгъэ афэпшIыныр. Пионерым ыIорэр къыгъэшъыпкъэжьын фэягъ, «Тимур икомандэ» тыхэтэу сыма­джэхэм, зизакъоу псэурэ нэжъ-Iужъхэм IэпыIэгъу тафэхъу­щтыгъ.

«Миллион стране» зыфиIорэ къэралыгъо Iофтхьабзэм гъэ къэс тыхэлажьэщтыгъ, цIыфхэм амыгъэфедэжьырэ гъучIыжъхэм­рэ тхылъыпIэжъхэмрэ хабзэм къыфэтыугъоищтыгъ.

Пионер чанхэм язекIуакIэ щысэ тетхынэу кIэлэегъаджэхэм къытаIощтыгъ. ЗэкIэми еджэным­кIэ, спортымкIэ, дисциплинэмкIэ тызэнэкъокъущтыгъ. В. И. Лениныр къызыхъугъэ ыкIи пионер­хэм ямафэхэм тяжэщтыгъ. Еджэгъу илъэсым щыщэу а мэфитIур ары кIэлэцIыкIухэр пионер организацием заштэщтыгъэхэр.

Пионерхэр зэкIэми къахэзыгъэщыхэрэм щыщыгъэх галстук плъыжьыр, пионерхэм ягимн («Взвейтесь кострами»), бгъэхалъхьэр, быракъыр ыкIи барабаныр. Ахэр хэмытэу, Iофтхьабзэу зэхатщэхэрэр къамыгъэ­дахэу зыкIи къыхэкIыгъэп.

Пионер организациер щэIэфэ­кIэ кIэлэцIыкIухэм япIуныгъэ-гъэ­сэныгъэкIэ ишIогъэшхо къэ­кIуагъ. IофшIагъэу иIэхэм афэшI тIогъогогъурэ, 1962-рэ ыкIи 1972-рэ илъэсхэм Лениным иорден къыфагъэшъошагъ.

ЩыIэкIакIэм дыра­гъаштэ

Непэ щыIэкIакIэу тызхэтым пионерхэм я Мафэ хэтыжьэп, 1991-рэ илъэсым ар зэбгыратIупщыжьыгъагъ, къэралыгъо мэфэкI­хэми ахахыжьыгъ. 2015-рэ илъэсым къыщыубла­гъэу кIэлэцIыкIу организацие зэфэшъхьафхэр зэхащагъэх, анахь иныгъэр «Российское движение школьников» зыфиIорэр ары. Урысые Федерацием исенатор­хэм ягукъэкIыкIэ «Российское движение детей и молодежи» зыфиIорэ проектыр УФ-м и Къэ­ралыгъо Думэ ыштагъ, ащ зэ­ре­джагъэхэр «Движение первых».

Мы лъэхъаным движением икъутамэхэр Урысыем ишъолъыр­хэм къащызэIуахых. Ахэм ахэт­хэм пионерхэм агъэцакIэщтыгъэ Iофыгъохэр гъашIэм щылъагъэ­кIуатэ.

Пионерхэм я Мафэ игъэкIотыгъэу хамыгъэунэфыкIыжьырэми, организацием хэтыгъэхэм агу илъыщт, движениякIэм имэфэкIи илъэс къэс жъоныгъуа­кIэм и 19-м хагъэунэфыкIыщт.

Шъаукъо Аслъангуащ.