Москва – Мыекъуапэ – Владикавказ – Грознэр – Дербент – Налщык – Москва – джары «Кавказым иналмэс-налкъут» зыфиIорэ зекIо мэшIокоу зыгъэпсэфакIохэр зезыщэрэм къыкIурэ гъогур зыфэдэр.

Мыгъэ ящэнэрэу жъоныгъуакIэм и 27-м ащ имар­шрут къалэу Мыекъуапэ щыригъэжьэщт. МэшIокумкIэ къэзыкIухьэгъэ зекIохэм яшIоигъокIэ гъогууанэм зэхъокIыныгъэхэр фашIыгъэх. КъэкIогъу пэпчъ зыцIэ къетIогъэ шъолъырхэм афэшъхьафэу Республикэу Темыр Осетиер – Аланиер е Республикэу Ингушетиер (зыгъэпсэфакIохэм зэрызэдаштэрэм тетэу) къыхагъэхъощт, Дагъыстан уахътэу щагъакIорэм рагъэхъущт.

Ыпэрэ илъэсхэм зэрашIыщтыгъэм фэдэу хьакIэхэм мэшIокур къызщыуцурэ къалэхэм ячIыпIэ гъэшIэгъонхэр, паркхэр, музейхэр, тарихъым исаугъэтхэр, нэмыкIхэри къарагъэлъэгъущтых.

Чэщыр мэшIокугъогу станцием тет мэшIокум щырахыщт, зыщагъэпсэфыщт.

Адыгэ Республикэм культурэмкIэ и Министерствэ макъэ къызэригъэIугъэмкIэ, «Кавказым иналмэс-налкъут» зыфаусыгъэ мэшIокур Мыекъуапэ къызысыщт мафэхэр агъэнэфэгъахэх. Ахэр жъоныгъуакIэм и 27-рэ мафэм, мэкъуогъум и 10-м, бэдзэогъум и 1-м, и 8-м, и 22-м, шышъхьэIум и 12-м, и 19-м, Iоныгъом и 9-м, и 29-м атефэх.

ЗекIо турым зызэрэщыбгъэпсэфын плъэкIыщтыр зы тхьамаф (мэфи 7-рэ чэщи 6-рэ). КъакIохэрэм Кавказым щыпсэурэ цIыфхэм агу зэIухыгъэу къазэрапэгъокIыхэрэр зэхашIэ, лъэпкъ шхынхэм ядэгъугъэ агъэшIагъо, уахътэ текIыгъэу къагъэзэжьынхэу къараIо.

Зыгъэпсэфыгъо турым ахъщэу лъыптыщтыр ма­кIэп, ау «Нэм ылъэгъурэр шъхьэм ыуас» аIо, зе­кIохэми Кавказым къагъэзэжьынэу аIозэ, ягъогу лъагъэкIуатэ.