Къоджэ псэупIэхэм хэхъоныгъэхэр ашIынхэу
АР-м и ЛIышъхьэу КъумпIыл Мурат къоджэ псэупIэхэм хэхъоныгъэ ягъэшIыгъэным фэгъэхьыгъэ къэралыгъо программэр гъэцэкIагъэ зэрэхъурэм къытегущыIагъ.
[caption id="attachment_132724" align="aligncenter" width="800"] Ар-м и ЛIышъхьэ ипресс-къулыкъу.[/caption]
— Инфраструктурэм зегъэушъомбгъугъэныр, социальнэ мэхьанэ зиIэ псэуалъэхэр гъэуцугъэнхэр, къоджэдэсхэмкIэ мэхьэнэшхо зиIэ проектхэр пхырыщыгъэнхэр Адыгеим щыпсэухэрэм ящыIакIэ нахьышIу шIыгъэным пае пшъэрылъ шъхьаIэу зыфэдгъэуцужьхэрэм ащыщых. «Къоджэ псэупIэхэм хэхъоныгъэ ягъэшIыгъэныр» зыфиIорэ программэм ишIуагъэкIэ, УФ-м и Президентэу Владимир Путиныр, Правительствэр тиIэпыIэгъухэу, аужырэ илъэсхэм социальнэ псэолъэ зэфэшъхьафыбэ тшIыгъэ е дгъэцэкIэжьыгъ. Мы илъэсми IофшIэнхэр лъытэгъэкIуатэ, — къыIуагъ КъумпIыл Мурат.
Программэм щыгъэнэфагъэу мы илъэсым зэшIуахыщтхэм сомэ миллиардрэ миллион 230-рэ апаIуагъэхьащт. Программэм къыдыхэлъытагъэу Мыекъопэ районым гъэсэныгъэм игупчэ, кIэлэцIыкIу IыгъыпIитIумэ апай кательнэхэр, спорткомплекситIу щырагъэжьагъ, псым икIуапIэхэу километрэ 22,9-рэ, гъэстыныпхъэ шхъуантIэм икIуапIэу километри 4,8-рэ щагъэцэкIэжьы.
Джащ фэдэу Шэуджэн районымкIэ къуаджэу Пщычэурэ селоу Заревэмрэ ащырагъэжьэгъэ кIэлэцIыкIу IыгъыпIитIур мыгъэ аухын гухэлъ яI. IыгъыпIэ пэпчъ нэбгыри 120-м телъытагъ. Мы муниципальнэ образование дэдэм икъуаджэу Хьатыгъужъыкъуае культурэм и Унэ щашIы, Красногвардейскэ районымкIэ селоу Еленовскэм ащ фэдэ псэуалъэу щырагъэжьагъэр аухыгъ. Гъогу инфраструктурэм ишIыни республикэм щылъагъэкIуатэ. Къоджэ псэупIэхэм ягъогу километрэ 12 фэдиз мы илъэсым ыкIэм нэс агъэцэкIэжьыщт.
Гухэлъхэм ащыщ программэм къыдыхэлъытагъэу Мыекъопэ районым ит станицэу Дахъом дэт скверыр, Красногвардейскэ районымкIэ къуаджэу Улапэ испорт площадкэ ыкIи кIэлэцIыкIу джэгупIэм язэтегъэпсыхьан.
— Мыхэр «Къоджэ псэупIэхэм хэхъоныгъэ ягъэшIыгъэныр» зыфиIорэ программэм къыдыхэлъытагъэу зэшIохыгъэ хъухэрэм язы Iахьых ныIэп. ПсэолъакIэу тшIыхэрэр, дгъэцэкIэжьыхэрэр цIыфхэм ящыIакIэ нахьышIу, нахь Iэрыфэгъу хъуным зэрэфэIорышIэщтхэм сицыхьэ телъ, — къыкIигъэтхъыгъ АР-м и ЛIышъхьэ.