КIэлэцIыкIу мини 7-м ехъумэ защагъэпсэфыщт
[caption id="attachment_132721" align="aligncenter" width="800"] «Адыгэ макъэм» ихъарзынэщ.[/caption]
КIэлэцIыкIухэм языгъэпсэфыгъо гъэмэфэ уахътэ изэхэщэн республикэм игъэкIотыгъэу зыщыфагъэхьазыры.
Республикэм ипащэ къызэрэхигъэщыгъэмкIэ, мэкъуогъум и 1-м къыщегъэжьагъэу Адыгеим игурыт еджапIэхэм кIэлэцIыкIухэр мафэрэ зыдэщыIэщтхэ лагерьхэр къащызэIуахыщтых. Джащ фэдэу республикэмрэ ХышIуцIэ Iушъомрэ ялагерьхэм Iоф ашIэу аублэщт.
«Мыгъэ кIэлэцIыкIу мини 7,4-рэ фэдизмэ загъэпсэфыщт, япсауныгъэ агъэпытэщт. Апэрэ чэзыоу путевкэхэр зэратыщтхэр хэушъхьафыкIыгъэ дзэ операцием хэлажьэхэрэм якIэлэцIыкIухэр ыкIи гъот макIэ зиIэ унагъохэм арысхэр ары. ГъэрекIо зэрэтшIыгъагъэм фэдэу Херсон хэкумкIэ Геническэ районым ис кIэлэеджакIохэми Адыгеим зыщядгъэгъэпсэфын тимурад.
КIэлэцIыкIу лагерьхэр щынэгъончъэнхэу, Iофтхьэбзэ гъэшIэгъонхэр, концертхэр, экскурсиехэр, спорт зэнэкъокъухэр зэхащэнхэу ведомствэ гъэнэфагъэхэм япащэхэм пшъэрылъ афэсэшIы», — къаригъэхьагъ КъумпIыл Мурат социальнэ хъытыухэм.