Адыгэ Республикэм идзэ комиссариатхэм яIофшIэн мы гъатхэ нахь гъэлъэшыгъэу ащызэхащагъ.

Зэзэгъыныгъэ шIыкIэм тетэу къулыкъум кIощт цIыфхэм яугъоин респуб­ликэм идзэ комиссариатхэм зэшIуахы. Iофыр зэрэлъыкIуатэрэм къытегущыIагъ АР-м идзэ комиссариат цIыфхэр дзэм дэщыгъэнхэмкIэ ыкIи ухьазырыгъэнхэмкIэ иотдел ипащэ игуадзэу Сергей Мозгачевыр.

Пшъэрылъыр зэрагъэцакIэрэр

— УФ-м зыкъэухъумэжьынымкIэ и Министерствэ изэхэсыгъохэм ащыщ УIэшыгъэ КIуачIэхэм зэзэгъыныгъэ шIыкIэм тетэу къулыкъур ащызыхьыхэрэм ыкIи илъэс дзэ къулыкъур зыхьыщтхэм япчъагъэ ахэгъэхъогъэн фаеу пшъэрылъ министрэм къыщигъэуцугъ. Мы илъэсыр екIыфэ республикэмкIэ зэзэгъыныгъэ къулыкъум ащэн фаер нэбгырэ мин 1,5-м ехъу. А пшъэрылъыр гъэцэкIэгъэным пае шIыкIэ гъэнэфагъэ­хэр, екIолIакIэхэр къэтэгъотых. IофшIэкIо куп 75-рэ респуб­ликэм щызэха­щагъ, ащ щыщэу 18-мэ Мыекъуапэ Iоф щашIэ. Ахэм япшъэры­лъыр зэзэгъыныгъэ шIыкIэм тет къулыкъур зыщыщыр, ащ шIуагъэу пылъхэр цIыфхэм къафаIотэныр ары.

Непэ ехъулIэу зэзэгъыныгъэкIэ къулыкъур ахьынэу нэбгырэ 200-м ехъу кIэтхагъэх, — къы­Iуагъ Сергей Мозгачевым.

Дивизионэу «Майкопскэр»

ТигущыIэгъу къызэрэхигъэщыгъэмкIэ, «именные подразделения» зыфаIохэрэм афэдэ (цIэ гъэнэфагъэ иIэу шъолъыр пэпчъ ащызэхащэхэрэр) Адыгеим щыгъэпсыгъэным мы уахътэм анахьэу ыуж итых. Мыщ зэзэгъыныгъэ шIыкIэм тетэу гуфит нэбгыри 120-м ехъу хэхьащтых. А пчъагъэр зэзэгъы­ныгъэ шIыкIэм тетэу къулыкъум ащэн фэе нэбгырэ мин 1,5-м ехъурэмэ къахахыщт.

— Федеральнэ гупчэм къыгъэ­нэфэгъэ пшъэрылъым тетэу АР-м и ЛIышъхьэ унашъо къытфишIыгъ «именное подразделение» зыфиIорэр тишъолъыр бэдзэ­огъум ехъулIэу щыгъэпсыгъэн фаеу. Ащ зэреджагъэхэр «именной реактивнэ дивизионэу «Майкопский». Мыекъопэ дзэ гарнизоным ичастьхэм ащыщ мыр щыIэщт, ащ игъэпсын ыуж тит. Къэралыгъо хабзэм икъулыкъухэм мы дивизионым тапэкIэ анаIэ тырагъэтыщт. Джащ фэдэу мыщ хэхьэрэ къулыкъу­шIэхэр зыпч- зыпчэгъоу зэхэтыщтых, нэбгырэ зырызэу тыди ащэщтхэп, — къы­Iуагъ Сергей Мозгачевым.

Хэгъэгур зылъэшыщтыр пытэу ухъумагъэ зыхъукIэ ары. Къэра­лыгъом ищынэгъончъагъэ ухъумэгъэныр дзэм ипшъэрылъ. Ащ хэт нэбгырэ пчъагъэм хэгъэхъо­гъэным мы зэпстэур фэIорышIэ.

Мыекъуапэ Iоф щашIэ

Мэлылъфэгъум и 15-м къыщегъэжьагъэу зэзэгъыныгъэкIэ къулыкъум кIощтхэр зыщаугъоихэрэ пунктым (ипащэр Валерий Островскэр) Мыекъуапэ Iоф щешIэ, ащ агитационнэ куп 18 епхыгъ. Джащ фэдэу жъоныгъуакIэм и 9-м, ТекIоныгъэм и Мафэ зыщыхагъэунэфыкIыгъэм, къэлэ паркым кощырэ пункт къыщызэIуахыгъагъ. А мафэм нэбгырэ 450-рэ мыщ къеолIагъ. Ахэм ащыщэу нэбгыри 6-р зэзэгъыныгъэкIэ къулыкъур ахьыным кIэтхагъэх, нэбгыри 2-р — бзылъфыгъэх.

Аленэ медицинэ IофышI, пса­уныгъэр къэухъумэгъэнымкIэ учреждениехэм ащыщ Iоф ще­шIэ. Ащ фэдэ унашъо зэришIыгъэм ушъхьагъу гъэнэфагъэ иI.

— Сишъхьэгъусэ радиоэлектроннэ дзэхэм ащыщ Iоф щешIэ. ХэушъхьафыкIыгъэ дзэ операциер зырагъэжьэгъэ апэрэ мафэхэм къащегъэжьагъэу ар хэлажьэ. Лъэшэу сыфэгумэкIы ыкIи сыригъусэу къулыкъур схьымэ нахь тэрэзэу сеплъыгъ, сыдигъокIи медикхэр дзэм ищыкIагъэх, — еIо Аленэ.

Къулыкъур зыхьыщтхэм якъыхэхын

Сергей Мозгачевым къызэриIуагъэмкIэ, дзэ-учетнэ сэнэ­хьат зэфэшъхьаф зиIэ къулыкъушIэхэр ящыкIагъэх, анахьэу артиллеристхэр. УIэшыгъэ КIуа­чIэхэм къулыкъур ащызыхьы­гъэм зыщыпсэурэ чIыпIэм елъы­тыгъэу дзэ комиссариатым зыфигъэзэн ылъэкIыщт. Къулыкъум щымыIагъэхэри джы фаехэу къяуалIэх. Ащ фэдэ къызы­хэкIырэм, ушъхьагъоу иIагъэр зэхафы, ипсауныгъэ зэрифэшъуа­шэм тетэу ауплъэкIу, нэужым ищыкIэгъэ унашъор ашIы.

— Кандидатхэм якъыхэхынкIэ сэнэхьат-психологическэ уплъэ­кIуным лъэшэу тынаIэ тетэгъэты, — къеIуатэ Сергей Мозгачевым. – Унагъо иIэмэ, ащ изытет, нэбгырэ пчъагъэу исым, гъэсэныгъэу иIэм тахэплъэ. А къэбархэм атетэу зэзэгъыныгъэм кIэтхэщт цIыфым иунэе тхылъхэр тэгъэпсых. ЗэзэгъыныгъэкIэ къулыкъур зыхьымэ зышIоигъоу къакIохэрэм анахьыбэм аныбжь илъэс 25-м къыщегъэжьагъэу илъэс 40-м нэс. Хэбзэгъэуцугъэм къызэрэдилъы­тэрэмкIэ, къулыкъум ащэхэрэр илъэс 18-м къыщегъэжьагъэу 60-м нэс зыныбжьхэр ары.

Ахъщэ тынхэр

ТигущыIэгъу къызэрэхигъэщыгъэмкIэ, цIыфхэр дзэ комиссариатым ителефонхэм къатеох, зэзэгъыныгъэ шIыкIэм тетэу къулыкъур зыхьыхэрэм ахъщэ тынэу аратыхэрэм къыкIэупчIэх.

Мыхэр тигъэзет къыхиуты­гъагъ, ау джыри зэ шъугу къэд­гъэкIыжьыных. УФ-м ихэбзэгъэ­уцугъэ тетэу къулыкъур зэрихьыщтым апэрэу зэзэгъыныгъэм кIатхэрэм зэтыгъоу сомэ мини 195-рэ раты. Адыгеим и ЛIышъхьэу КъумпIыл Мурат иунашъокIэ ахъщэ тедзэ зэтыгъоу сомэ мини 100 ащ фытырагъахъо. Егъэджэн гупчэхэм, полигонхэм ухьазырыныгъэ щакIуфэ яоклад сомэ мин 40-60 фэдиз. Зэзэгъыны­гъэм кIэтхэгъэ къулыкъушIэр хэушъхьафыкIыгъэ дзэ операцием щыIэ зыхъукIэ мазэ къэс сомэ мини 195-м къыщегъэжьагъэу къыраты, званиеу иIэм елъытыгъэу ащ къыхэхъо. Джащ фэдэу зэпэуцужьхэм, чIыпIэ плъырхэм аIутхэм, пыим итехникэ зэхэзыкъутэхэрэм нахьыбэ афыхагъахъо.

Зэзэгъыныгъэм зэрэкIатхэ­хэрэ пIалъэр зэфэшъхьаф —илъэсныкъом къыщегъэжьагъэу ыкIи нахьыбэу.

ЗэкIэ ахъщэ тынхэм ыкIи фэгъэкIотэнэу щыIэхэм япхыгъэ къэбарыр нахь игъэкIотыгъэу зэзгъашIэ зышIоигъохэм телеграм-каналэу «Адыгея — Служу Родине» зыфиIорэм рагъотэщт.

Iэшъынэ Сусан.