Ощххэр зэрэзэпыугъэхэр къызфагъэфедэзэ ти­чIы­гулэжьхэм гъэтхасэхэм яхэлъхьан лъагъэ­кIуатэ. АР-м мэкъу-мэщымкIэ и Министерствэ жъоныгъуакIэм и 17-м тызэрэщигъэгъозагъэмкIэ, гектар 106189-у агъэнэфагъэм щыщэу 47247-р апхъыгъ.

Зэнтхъым, бжыхьэсэ хьэм ыкIи горохым яхэлъхьан аухыгъ. Лэжьыгъэ ашIыщт натрыф гектар 21080-м ызыныкъо нахьыбэр, ар гектар 12061-рэ, хагъэкIыгъ, тыгъэгъазэу 28870-рэ апхъыгъ, пстэумкIи 57760-рэ агъэнэфагъ, сое гектар 11350-у агъэнэфагъэм щыщэу 1383-рэ халъхьагъ.

Джащ фэдэу эфирнэ дагъэ къэзытырэ уц Iэзэгъухэр Джэджэ ыкIи Мыекъопэ районхэм, къалэу Мыекъуапэ ащырапхъынхэу мыгъэ агъэнэфагъ. ПстэумкIи гектар 1148-рэ ар зэрэхъущтыр, 957-рэ хагъэкIыгъ.

Илъэс пчъагъэм къэкIыжьырэ уц гектар 2692-м щыщэу 457-рэ, зы илъэс нахьыбэрэ къэмыкIырэ уцэу 166-рэ тичIыгулэжьхэм апхъыгъ, былымIус ашIыщт натрыфым гектар 1010-рэ хагъэкIыгъ, картоф гектар 39,5-рэ, нэмыкI хэтэрыкIэу гектар 55-рэ агъэтIысыгъ.

Гъэтхасэхэм япхъынкIэ Шэуджэн районыр апэ ит, ащ ичIыгулэжьхэм мыгъэ халъхьэщт гъэтхэсэ гектар 14235-м ипроцент 79-р, ар 10543-рэ, хагъэкIыгъ. Ахэм лэжьыгъэ ашIыщт натрыф гектар 2159-рэ, тыгъэгъазэу 8290-рэ, илъэс пчъагъэм къэ­кIыжьырэ уц гектар 50 апхъыгъ.

Кощхьэблэ районыр ащ ыуж кIэкIэу ит. Ащ ичIыгулэжьхэм мыгъэ агъэнэфэгъэ гъэтхэсэ гектар 16681-м щыщэу 11933-р халъхьэгъах.

Джэджэ районым ичIыгулэжьхэр мы уахътэм ящэнэрэх, гъэтхэсэ гектар 26063-у агъэнэфагъэм хагъэкIыгъэр 13924-рэ мэхъу.

Пынджым ипхъыни лъагъэкIуатэ. Анахьыбэу мы культурэр къызщагъэкIырэ Тэхъутэмыкъое районым мы уахътэм щырапхъыгъэр гектар 330-рэ мэхъу. Красногвардейскэ районми пынджым ипхъын щырагъэжьагъ, ащ щагъэнэфэгъэ гектар 947-м щыщэу 100-р хагъэкIыгъ.

ХЪУТ Нэфсэт.