Гъэтхапэм и 1-м 2023-рэ илъэсым къыщегъэжьагъэу машIом пэшIуе­кIогъэным фытегъэпсыхьэгъэ шапхъэхэм зэхъокIыныгъэхэр афэ­хъу­гъэх, ахэр зыфэгъэхьыгъэр дачэм машIо зэрэщашIырэр ары.

Ащ ыпэкIэ машIор ячIыгу Iахь зэрэщашIыщт шIыкIэм дачникхэр къыкIэупчIэщтыгъэх. Мэзаем и 28-м, 2023-рэ илъэсым нэс агъэфедэщтыгъэ шапхъэм елъы­тыгъэу пкIашъэхэр, чъыг къутамэхэр, уцыжъхэр агъэстыжьын­хэм фэшI унэхэм ыкIи псэуа­лъэхэм метрэ 50-кIэ къакIэ­лъырыкIынхэу щытыгъэх. Дачэ Iахьхэр зэрэцIыкIухэм къыхэкIэу ар гъэцэкIэгъуае хъущтыгъ, нахьыбэрэмкIэ бгъэфедэшъунэу щытыгъэп.

ШэпхъакIэу щыIэм ишIуагъэ­кIэ машIом ишIын епхыгъэ  Iоф­хэр нахь агъэушъэбыгъэх. Псэу­пIэхэм, чъыгхатэхэм, хатэ­хэм пкIашъэхэр, чъыг къутамэхэр ыкIи уц гъугъэхэр ащыбгъэ­стыжьынхэм пае унэ-псэуа­лъэхэм метрэ 15-кIэ уакъыкIэлъырыкIымэ джы икъущт. Ау ма­шIор гъучI пхъэчаим (шъондырым) ыкIоцI ипшIыхьагъэмэ, метри 7,5-м нахь чыжьэу псэуа­лъэхэм уаIумыкIыми хъунэу шэпхъакIэм къыщеIо.

Упщэрыхьаным фэшI мангалхэм, нэмыкI хьакухэм машIо арыпшIыхьащтмэ, чIыгу Iахьым тет унэм метри 5-кIэ укъыкIэрыкIынэу щыт, метри 2-м къыщымыкIэрэ радиусым щыфэ гъэстыныпхъэхэр ащыбгъэфедэхэ хъущтэп.

МашIор щынэгъончъэнымкIэ шапхъэхэр зыукъохэрэм апае агъэнэфэгъэ тазырхэр:

— цIыфым ышIэрэр зэрэмытэрэзымкIэ макъэ рагъэIу е тазырэу сомэ мини 5-м къыщегъэжьагъэу мин 15-м нэс тазыр тыралъхьэ, ау машIом пэшIуекIорэ режимыр шъолъырым зыщагъэцакIэрэ уахътэм шапхъэр ыукъуагъэмэ, тазырэу цIыфым тыралъхьэрэр зыфэдизыр сомэ мини 10-м къыщегъэжьагъэу мин 20-м нэсы;

— IэнатIэм Iутым ышIэрэр зэрэмытэрэзымкIэ макъэ ра­гъэIу, е тазырэу сомэ мин 20-м къыщегъэжьагъэу сомэ мин 30-м нэс тыралъхьэ, ау машIом пэшIуекIорэ режимыр шъолъырым зыщагъэцакIэрэ уахътэм шапхъэр ыукъуагъэмэ, тазырэу IэнатIэм Iутым тыралъхьэрэр зы­фэдизыр сомэ мин 30-м къыщегъэжьагъэу мин 60-м нэс;

— юридическэ лъапсэ зимыIэ предприниматель IофшIэным фэгъэзагъэм ышIэрэр зэрэмы­тэрэзымкIэ макъэ рагъэIу, е тазырэу сомэ мин 40-м къыще­гъэжьагъэу сомэ мин 60-м нэс тыралъхьэ, ау машIом пэшIуе­кIорэ режимыр шъолъырым зыщагъэцакIэрэ уахътэм шап­хъэр ащ фэдэм ыукъуагъэмэ, тазырэу тыралъхьащтыр зыфэдизыр мин 60-м къыщегъэжьагъэу сомэ мин 80-м нэс;

— юридическэ лъапсэ зиIэм ышIэрэр зэрэмытэрэзымкIэ ма­къэ рагъэIу, е тазырэу сомэ мин 300-м къыщегъэжьагъэу мин 400-м нэс рагъэты, ау машIом пэшIуекIорэ режимыр шъолъырым зыщагъэцакIэрэ уахътэм шапхъэр ащ фэдэм ыукъуагъэмэ, тазырэу ащ тыралъхьащтыр сомэ мин 400-м къыщегъэжьагъэу мин 800-м нэс;

— машIор щынэгъончъэнымкIэ унашъохэр зыукъуагъэу, ащ къыхэкIэу зыгорэм имылъку зэ­рар езыхыгъэм, е цIыфым ипсауныгъэ мылъэшым къыщыублагъэу хьылъэм нэсэу иягъэ езыгъэкIыгъэм тазырэу тыралъхьащтыр сомэ мин 40-м къыщегъэжьагъэу мин 50-м нэс.

Бэрзэдж Ренат.

Мыекъуапэ ыкIи Мыекъопэ районым машIом лъыплъэгъэнымкIэ ядознаватель шъхьаI.