Адыгеим и ЛIышъхьэу КъумпIыл Мурат Iахьзэхэлъ обществэу «Россети Кубань» игенеральнэ пащэ ипшъэрылъхэр зыгъэцакIэу Борис Эбзеевым Правительствэр зычIэт унэм непэ щыIукIагъ. Республикэм и ЛIышъхьэ Iахьзэхэлъ обществэу «Россети Кубань» икъутамэу «Адыгейские электрические сети» зыфиIорэм ипэщакIэу Дмитрий Рязанцевым Iофтхьабзэм нэIуасэ щыфашIыгъ.

[caption id="attachment_132606" align="aligncenter" width="800"] Сурэтыр: А. Гусев[/caption]

ЗэIукIэм хэлэжьагъэх АР-м иминистрэхэм я Кабинет и Тхьаматэ игуадзэу ЛIыхэсэ Махьмуд, АР-м экономикэ хэхъо­ныгъэмрэ сатыумрэкIэ иминистрэу Шэуджэн Заур, Iахьзэхэлъ обществэу «Россети Кубань» игенеральнэ пащэ игуадзэу Эдгар Армаганян.

Iахьзэхэлъ обществэу «Россети Кубань» зыфиIорэм зэдэлэжьэныгъэу дыряIэм зыра­гъэ­ушъомбгъумэ зэрашIоигъор Адыгеим и ЛIышъхьэ къыхигъэ­щыгъ.

«Энергием икъэкIуапIэхэр цыхьэшIэгъоу щымытхэмэ, непэ экономикэми, социальнэ щыIэныгъэми проектышхохэр ащыпхырыпщынхэ плъэкIыщтэп. Промышленностым, мэкъу-мэщым, зекIоным зягъэушъомбгъугъэнымкIэ республикэм бэ щашIэрэр, псэолъэшIынми хэхъоныгъэ рагъэшIы. Республикэм амалэу иIэхэм ахагъахъо зыхъукIэ, энергиер афикъуным мэхьанэшхо зэриIэр зыщыдгъэгъупшэ хъущтэп. Iахьзэхэлъ обществэу «Россети Кубань» инвестиционнэ политикэу Адыгеим щызэрихьэрэр ащ фэIорышIэ. Республикэм иэнергетическэ инфраструктури ащ диштэу хэхъоныгъэ ешIы», — къыIуагъ КъумпIыл Мурат.

Адыгеим энергие къэкIуапIэу иIэхэм зягъэушъомбгъугъэн зэрэфаем тегущыIэхэ зэхъум, кВ 35 — 110-рэ зилъэшыгъэ подстанцие 58-рэ республикэм зэриIэр хагъэунэфыкIыгъ. Подстанцие 21-мэ нахь лъэшэу Iоф ашIэнэу амал яI.

Компаниеу «Россети Кубань» зыфиIорэм 2020-рэ илъэсым адишIыгъэгъэ зэзэгъыныгъэм диштэу сомэ миллиарди 5,6-м ехъу зыосэ энергетическэ псэолъэ 11 Адыгеим щигъэпсын е щигъэкIэжьын фэягъэ. Ахэм ащыщэу подстанции 8-мэ («Черемушки», «Адыгейская», «Северная», «Энем», «Комбизавод», «Кужорская», «Тульская», «Садовая» зыфиIохэрэмкIэ) япхыгъэ IофшIэнхэр аухыгъахэх. 2023 – 2024-рэ илъэсхэм подстанциеу «ИКЕА» зыфиIорэм игъэкIэжьын аухынэу, киловатти 110-рэ зилъэшыгъэ электроэнергие рыкIуапIэу «Новая-Западная-2» зыфиIорэм ишIын ыкIэм нагъэсынэу рахъухьэ.

[caption id="attachment_132607" align="aligncenter" width="800"] Сурэтыр: А. Гусев[/caption]

ЗыгъэпсэфыпIэу «Лэгъона­къэм» иэнергосеть изегъэушъом­бгъункIэ пшъэрылъ гъэнэфагъэ­хэр къафашIыгъэх. Мы Iофым сомэ миллиарди 7 фэдиз пэIуа­гъэхьанэу рахъухьэ. Республикэм иэнергетическэ амалхэм зыкъягъэIэтыгъэнымкIэ компаниеу «Россети Кубань» зыфиIорэм лъэныкъо пстэумкIи иIофшIэн ыгъэлъэшыным мэхьанэшхо зэриIэр Адыгеим и ЛIышъхьэ къыхигъэщыгъ.

Iахьзэхэлъ обществэу «Россети Кубань» ипащэ зэрэхигъэ­унэфыкIыгъэмкIэ, компаниер ишъыпкъэу зыпылъыр инвестиционнэ программэр республи­кэм шIуагъэ къытэу щыгъэцэкIэгъэныр, Адыгеим ихэбзэ къулы­къухэм зэдэлэжьэныгъэу адыряIэр гъэлъэшыгъэныр ары.

«Компанием икъутамэу Адыгеим щыIэм ипащэ опытышхо зиIэ тиспециалистхэм ащыщ, илъэс 25-м ехъугъэу мы лъэныкъом ащ Iоф щешIэ. Пшъэрылъэу къыфашIыхэрэр пэщакIэм зэригъэцэкIэщтхэм сицыхьэ телъ», — къыIуагъ Борис Эбзе­евым.

Дмитрий Рязанцевым Пшызэ къэралыгъо технологическэ университетыр къыухыгъ. 1997-рэ илъэсым «инженер-электрик», 2007-рэ илъэсым «экономист-менеджер» зыфиIорэ квалификациехэр къыфагъэшъо­шагъэх. Электромонтажникэу IофшIэныр ащ ригъажьи, IэнэтIэ зэфэшъхьафхэр ыIыгъыгъэх, энергосистемэ зыкIым ифедеральнэ сетевой компание магистральнэ сетьхэмкIэ и Пшызэ предприятиехэм, Iахьзэхэлъ обществэу «Кубаньэнерго», Iахьзэхэлъ обществэу «Россети Кубань» япэщагъ.

АР-м и ЛIышъхьэ ипресс-къулыкъу