Хабзэ зэрэхъугъэу, «Добро в село» зыфиIо-рэ шIушIэ Iоф­тхьабзэр Адыгеим джыдэдэм щызэхащэ. ПсауныгъэмкIэ ыкIи медицинэ профилактикэмкIэ Адыгэ республикэ гупчэм испе­циалистхэмрэ волонтер-медикхэмрэ псэупIэ Iудзыгъэхэм кIохэзэ, цIыфхэм ящыкIэгъэ медицинэ IэпыIэгъур арагъэгъоты.

Мобильнэ бригадэр апэу зыдэщыIагъэр Тэхъутэмыкъое районымкIэ псэупIэу Псэйтыку ары. Гу-лъынтфэ узхэр зиIэхэр специалистхэм мыщ къыщыхагъэщыгъэх.

— Фэе пстэуми амал яIагъ япсауныгъэ изытет арагъэуплъэкIунэу: лъыдэкIуаем, инфарктым, инсультым, шъоущыгъу узым, нэмыкIхэми узэряIэзэщт шIыкIэр зэрагъэшIэнэу, — къытыгъ АР-м псауныгъэр къэухъумэгъэнымкIэ и Министерствэ ипресс-къулыкъу.

Волонтер-медикхэм гурыт еджапIэм чIэсхэми мастер-класс афызэхащагъ, лъыдэкIуаер зэрэбгъэунэфыщт шIыкIэр ахэм арагъэлъэгъугъ. ГуфакIохэр щагу пэпчъ дэхьэхэзэ, цIыфхэм игъорыгъозэ зызэрарагъэуплъэкIун, спортым зэрэпылъынхэ фаер къафаIотагъ.

— Мы охътэ благъэм тиреспубликэ ирайон зэфэшъхьафхэм яфельдшер-мамыку IэзапIэхэм алъыIэсынхэу, псауныгъэр гъэпытэгъэным тегъэпсыхьэгъэ Iофтхьабзэхэр зэрахьанхэу, цIыфхэм адэгущыIэнхэу рахъухьэ. ШэкIогъум нэс Iофтхьабзэр лъагъэкIотэщт, — къыIуагъ профилактикэмкIэ отделением ипащэу Керим-Заде Джульеттэ.