«Къэралыгъом къыситыгъэ IэпыIэ­гъур мыхъугъэмэ сиунэе Iоф сфе­гъэжьэщтыгъагъэп», — еIо илъэскIэ узэкIэIэбэжьмэ грантэу къыратыгъэм ишIуагъэкIэ ибизнес цIыкIу зыгъэпсыгъэ ТIэшъу Анжелэ.

Социальнэ зэзэгъыныгъэм фэгъэхьыгъэ къэралыгъо программэр ары ар зишIушIагъэр. УФ-м и Президентэу Владимир Путиныр ащ кIэщакIо фэ­хъугъ. Федеральнэ ЗэIукIэм фэгъэзэгъэ джэ­псалъэу къышIыгъэхэм ащыщ зигъот макIэхэм IэпыIэгъоу къэралыгъом аритырэм ар ахэгъэхьэгъэнэу пшъэ­рылъ къыщишIыгъагъ. Программэм къызэрэдэлъытагъэмкIэ, цIыфэу IэпыIэгъу зищыкIагъэм къулыкъу гъэнэфа­гъэм зэзэгъыныгъэм дыкIатхэшъ, ащ къыпкъырыкIхэзэ, ахъщэ гъэнэфагъэ фа­гъакIо.

Анжелэ къызэрэтиIуагъэмкIэ, кIэлэцIыкIу къыфэхъугъэу, ащ зэрэлъыплъэ­рэм фэшI IофышIэ кIощтыгъэп мы социальнэ зэзэгъыныгъэр зэрэщыIэр зызэхехым. Апэ социальнэ IэпыIэгъум фэгъэзэгъэ къулыкъум, «собес» нахь зэрэтшIэрэр, екIолIагъ. Ащ къызэрэщыраIуагъэу, «Мой бизнес» зыфиIорэ Гупчэм зыфигъази, тхылъэу ищыкIагъэ­хэм ягъэхьазырынкIи, грантыр къырихыным пае зэнэкъокъум зэрэхэлэжьэщтымкIи IэпыIэгъу къыщыфэхъугъэх. 2021-рэ илъэсым ыкIэр ары тхылъхэр зитыгъэхэр, 2022-м къэралыгъом IэпыIэгъу къыритыныр игъоу алъыти, сомэ мин 250-рэ къыфатIупщыгъ, ащкIэ гыкIапIэ (прачечная) ыгъэпсыгъ.

ГыкIапIэр бэрэ тызэрихьылIэу, жъугъэу къызэIуахыхэрэм ащыщэп. Ыгу къэзгъэкIыгъэу, ащ къыщыуцуным ушъхьагъу фэхъугъэмкIэ Анжелэ теупчIыгъ. Джа жъугъэу зэрэщымытыр ары кIэзгъэгушIугъэр. Илъэс пчъагъэ хъугъэу ащ кIэхъопсэу ыгу илъыгъ, ау ищыкIагъэр къыщэфын амал иIагъэп.

Джы ар ежь-ежьырэу IофшIэн къыз­фэзгъотыжьыгъэхэм ащыщ, лэжьапIэм Iутэу иунэе Iофи иIэнэу законым фитыныгъэ къыреты. Арышъ, кIэлэцIыкIум зыщылъыплъэрэ уахътэр зеухым IофышIэ ежьэжьыгъ, ар Мыекъуапэ икIэлэцIыкIу IыгъыпIэу N-у 33-м икIэлэпIу. ГыкIапIэр иунэ щигъэпсыгъ. Ахъщэу къыратыгъэм­кIэ зэрэгыкIэщт ыкIи ыгыкIыгъэр зэригъэгъушъыжьыщт машинэхэр, ут тедзапIэр, нэмыкIэу ищыкIэгъэщтхэр къыщэфыгъэх.

Бысымгуащэм къызэрэтиIуагъэмкIэ, цIыфхэм къыфахьыхэрэр зэригыкIыхэрэм ыкIи зэригъэгъушъыжьыхэрэм ямыза­къоу, ут атыредзэжьы, зэрищыкIагъэм тетэу зэрегъафэх, зэкIоцIещыхьэхэшъ аретыжьых.

— Симашинкэхэри, сиутхэри промышленнэхэп, унагъохэм агъэфедэхэрэм афэдэх, ау лъэшэу къыздеIэх, — еIо Анжелэ. — СиIоф лъыкIуатэу, сигъот хахъомэ, зыкIуачIэ нахь ин оборудование къэсщэфынышъ, зысыушъомбгъунэу сыфай.

Анжелэ игыкIапIэ илъэс хъугъэ Iоф зишIэрэр, ифэIо-фашIэхэр зыгъэфедэнэу къеуалIэхэрэм япчъагъэ хэхъо зэпыт. Арышъ, охътабэ темышIэу зиушъомбгъу­шъунэу, игухэлъхэр къыдэхъунхэу тэри тыфэлъаIо.

ЦIыфыр фаемэ IофшIэни, ахъщэ къэ­кIуапIи къыгъотыщт, пIэ зэтедзагъэу ущымысымэ, къэралыгъоми ишIуагъэ къыуигъэкIыщт. АщкIэ шIыкIэ зэфэшъхьафыбэ щыIэ хъугъэ, уфэенэу ары ныIэп ищыкIагъэр.

ХЪУТ Нэфсэт.