«ПсэупIэр ыкIи къэлэ щыIакIэр» зыфиIорэ лъэпкъ проектым къыдыхэлъытагъэу зэтырагъэпсыхьажьыщт чIыпIэхэм якъыхэхын пае къэнагъэр мэфэ 15. Онлайн шIыкIэм тетэу зэхащэгъэ мэкъэтыныр жъоныгъуакIэм и 31-м нэс зэрэкIощтыр.

Адыгеим щыпсэоу ащ хэлэжьагъэр мы уахътэм нэбгырэ 27579-рэ зэрэхъу­рэр. Ар макIэп, ау нахь чаныгъэ тичIыпIэгъухэм къызхагъафэу, амакъэхэр атыхэмэ, яшIоигъоныгъи нахь къэлъэгъощт, ащ пае федеральнэ ахъщэ къызэратIупщыщтыри нахь нафэ хъущт.

Мы программэм нэбгырэ мин 20-м къыщымыкIэу зыдэс псэупIэхэр ары къыхиубытэхэрэр. Ащ фэдэу Адыгеим итхэр къалэу Мыекъуапэ, поселкэхэу Яблоновскэмрэ Инэмрэ.

Адыгеим икъэлэ шъхьаIэкIэ общественнэ чIыпIэу мэкъэтыным хагъэлажьэхэрэр станицэу Ханскэм культурэм и Унэу дэтым дэжь щыт скверыр, Мые­къуапэ иплощадэу Лениным ыцIэ зыхьырэр, «55 лет Победы» зыцIэ бульварыр ыкIи саугъэт зэхэтэу заом хэкIодагъэхэм афагъэпсыгъэр.

Бульварыр мы уахътэм апэ ит. Ар агъэкIэжьыным пае нэбгырэ мин 17-м ехъумэ амакъэхэр атыгъэх.

Поселкэу ЯблоновскэмкIэ урамэу Титовым ыцIэ зыхьырэм тет унэу 68/1-м дэжь щыт спорт площадкэр нахьыбэм къыхахыгъ. Мы уахътэм нэбгырэ мини 3,6-рэ мэхъу зымакъэ фэзытыгъэр.

Поселкэу Инэм ичIыпIэу онлайн мэкъэтыным хагъэлажьэхэрэм площадэу «Зэкъошныгъэр» лъэшэу апэ ишъыгъ. Мы псэупIэм дэсэу нэбгырэ минищ фэдизмэ ащ изэтегъэпсыхьажьын игъоу алъытэ.

АР-м и ЛIышъхьэ мыщ фэдэу мэкъэ­тынхэр зэрэзэхащагъэхэм Iофхэр зэрэ­лъыкIуатэхэрэр нахь шъхьэихыгъэ къызэришIырэм, чIыпIэм изэтегъэ­псыхьа­жьынкIэ зэшIуахыхэрэм цIыфхэр алъыплъэнхэ, ахэлэжьэнхэ амал къызэритырэм къыкIигъэтхъыгъ.

Аужырэ илъэситфыр пштэмэ, пстэумкIи чIыпIэ 276-рэ Адыгеим щызэтырагъэпсыхьагъ. Ахэм ащыщэу 182-р фэтэрыбэу зэхэт унэхэм ящагух, 94-р общественнэ чIыпIэх.

БлэкIыгъэ илъэсым изакъоу щагу 32-рэ агъэкIэжьыгъ, чIыпIэ 22-рэ зэтырагъэпсыхьажьыгъ. Мыгъи щагу 30, общественнэ чIыпIэу 10 республикэм имуниципальнэ образованиехэм икIэрыкIэу ащашIыжьыщтых.