Мыекъопэ къэзэкъ отделым щыщэу нэбгырэ 25-рэ хэушъхьафы­кIы­гъэ дзэ операцием хэлэжьэнхэу ягъогу техьанхэм ыпэкIэ къа­лэу Мыекъуапэ щызэхащэгъэ Iофтхьабзэм гущыIэ фабэхэр ща­пагъо­хыгъэх.

Инспектор купым ипащэу генерал-майорэу Юрий Колягиным гум лъыIэсырэ гущыIэ фабэхэу фильмэу «Офицерхэр» зыфиIорэм къыхафэхэрэр къыкIиIотыкIыжьыгъэх. Япшъэрылъ мыпсынкIэми, афэлъэкIыщтыр зэкIэ зэрашIэщтым ицыхьэ зэрателъыр ащ къыхигъэщыгъ.

Мыекъопэ къэзэкъ отделым иатаманэу Александр Даниловри мы Iофтхьабзэм хэлэжьагъ. «Шъупсаоу, текIоныгъэр къыдэшъухыгъэу къызэрэжъугъэзэ­жьыщтым техъырэхъышэрэп», — къыIуагъ ащ. Мыекъопэ къэзэкъ отделым итамыгъэ гъэнэфагъэу «ЕIолIэнчъэу къулыкъур зэрихьыгъэм фэшI» зыфиIорэр отрядэу «Кубань» хэтыгъэ Василий Быковскэм фагъэшъошагъ, щысэтехыпIэу ипшъэрылъхэр ренэу ащ зэригъэцакIэщтыгъэр А. Даниловым къыхигъэщыгъ.

Адыгэ РеспубликэмкIэ уIэшыгъэ кIуачIэхэм яветеранхэм я Совет итхьаматэу, подполковникэу Анатолий Вербицкэр къызэгущыIэм ныбжьыкIэхэм ыгу зэрафэгъурэр къыхэмыщын ылъэкIыгъэп: «Къэзэкъхэр зэоным фэкъулаех, ау шъо шъушъхьэкIи, шъуиныбджэгъу­хэмкIи зыкъэшъуухъумэжьын зэрэфаер зыщышъумыгъэгъупш, командирхэм шъуядэIумэ, зэкIэ дэгъу хъущт».

Адыгэ ыкIи Мыекъопэ епархием и Свято-Троицкэ чылыс иIофышIэу, протоиерееу Александр къариIуагъэ: «Урысыер непэкIэ къэухъумэгъэн фаеу пшъэрылъ къэуцугъ. Шъори хэгъэгур къызэрэшъущыгугъырэр къэжъугъэшъыпкъэжьын фае. Зыщышъумыгъэгъупш: шъуянэхэр, шъуишъхьэгъусэхэр, шъуикIэлэцIыкIухэр къышъо- жэх, текIоныгъэр шъуигъусэу къэжъугъэзэжьынэу сышъуфэлъаIо».

Iофтхьабзэм ыуж я 227-рэ артиллерийскэ бригадэр маршкIэ къырыкIуагъ.