Адыгеим икъэзэкъ ныбжьыкIэхэм я Союз хэт анахь чанхэм Екатерина Загорулько япащэу Хэгъэгу зэошхом ТекIоныгъэр къы­зыщыдахыгъэ мэфэкIым тефэу ветеранхэм ыкIи Ленинград блокадэм хэлэжьагъэхэм адэжь еблэгъагъэх.

Къэзэкъ ныбжьыкIэхэм къэгъагъэхэр, аIэкIэ ашIыгъэ пкъы­гъохэр ыкIи шIухьафтынхэр ветеранхэм аратыгъэх, щыIэкIэшIу тиIэным ахэр зэрэфэбэнагъэхэм фэшI ярэзэныгъэ гущыIэхэр апагъохыгъэх.

— МыщкIэ пшъэрылъэу тиIагъэр мамырныгъэ ыкIи шъхьафит щыIакIэ тиIэным фэбэнагъэхэм тигуфэбэныгъэ зэхяд­гъэшIэныр, дгъэчэфынхэр ары. ТичIыпIэгъу ветеранхэм та- рэгушхо! — къыIуагъ Е. Загорулько.

Апэу Бурдун Николай Борис ыкъом дэжь къэзэкъ ныбжьыкIэхэр еблэгъагъэх. Ащ я 8-рэ классыр къызеухым илъэс 17 хъугъэ къодыеу чIыпIэ военкоматыр къеджагъ. НэмыкIхэм ягъусэу Харьков дзэкIолI ныбжьыкIэ курсым щеджэнэу агъэ­кIуагъ. Илъэсныкъом къыкIоцI илэгъухэм ягъусэу Iашэм ыкIи нэмыкI шхонч хьылъэхэм рыонхэу агъэсагъэх. Еджэныр къызеухым Сандомирскэ плацдармэм щыIэ фронтым агъэкIуагъ, Апэрэ Украинэ фронтым ия 969-рэ шхончэо полкым ия 273-рэ шхончэо девизием къулыкъур щихьыгъ.

ЛIыблэнагъэ зэрэзэрихьагъэм фэшI Николай Борис ыкъом медалэу «За боевые заслуги» зыфиIорэр къыфагъэшъошагъ. Ащ ыуж тIэкIу тешIагъэу Хэ­гъэгу зэошхом иорденэу я 2-рэ шъуа­шэ зиIэр ыкIи медалэу «За победу над Германией», нэ­мыкI тын лъапIэхэри къыратыгъэх.

Станицэу Ханскэм хьакIэ ныбжьыкIэ цIыкIухэм къащыпэгъокIыгъ Хэгъэгу зэошхом хэлэ­жьагъэу, илъэс 98-рэ зыныбжь Бердников Василий Емельян ыкъор. 1943-рэ илъэсым ар фронтым ащагъ. Белорусскэ фронтым ия 3-рэ дивизие ия 389-рэ шхончэо полк хэтэу зэуагъэ. Белоруссием, Польшэм, Чехословакием, Германием ащызэуагъ. Хэгъэгу зэошхом иорденэу я 2-рэ шъуашэ зиIэр, медальхэу «За отвагу», «За боевые заслуги», «За победу над Германией» зыфиIохэрэр, Жуковым имедаль къыфагъэшъошагъэх. ЗэкIэмкIи дзэм илъэс 11-рэ къулыкъур щи­хьыгъ, уIагъэ телъыгъ. Челябинскэ къикIи икIалэ зыщыпсэущтыгъэ Адыгеим псэупIэкIэ къэ­кIожьыгъ. Илъэс заулэ хъугъэу мыIэрысэ чъыгхатэм пылъ.

Ткачев Яков Андрей ыкъор 1943-рэ илъэсым илъэс 18 ыныбжьэу фронтым Iухьагъ. Щынэ ымышIэу, лIыблэнагъэ зэрихьэзэ зэуагъэ, уIагъэ те­лъыгъ. Берлин нэсыгъэхэм ахэ­тыгъ. Медальхэу «За освобождение Варшавы», «За отвагу», Дзэ Плъыжьым иорден, нэмыкI­хэри къыфагъэшъошагъэх.

— Заом анахь къинэу хэтыр уиныбджэгъу дзэкIолIхэр пшIо­кIодынхэр, ахэм уIагъэ атещагъэу плъэгъуныр ары, — еIо Яков Андрей ыкъом.

Песоцкая Валентина Антон ыпхъум къэзэкъ ныбжьыкIэ цIыкIухэм иунэ къаригъэплъы­хьэзэ сурэтхэр къаригъэлъэгъу­гъэх. Заор къызежьэм ащ илъэси 5 ныIэп ыныбжьыгъэр.

ИгукъэкIыжьхэмкIэ ар къадэ­гощагъ.

— Заор къызежьэм сянэ ыкIи сшы нахьыкIэ (илъэси 3 ыныбжьэу) лIагъэх, илъэс 12 зы­ныбжь сшы сигъусэу тыкъэнагъ. А лъэхъаным гъаблэ щыIагъ, ура­мым тытетэу хьалыгъу къы­татынэу тылъаIощтыгъэ. Мэзи 6 тешIагъэу сшырэ сэрырэ Пшызэ итыгъэ кIэлэцIыкIу унэм тыратыгъ. Украинэм щыщ унагъо горэм сишти, сапIугъ, сагъэшхагъ. 1972-рэ илъэсым уз Iае къысхагъэщи, нэшъу сыхъугъ. Операцие ужым мыщ къэзгъэзэ­жьыгъ, ау сянэ-сятэхэр щыIэ­жьыгъэхэп. Ащ къыщегъэжьа­гъэу сизакъоу сэпсэу, — къы­Iуагъ Валентинэ.

КIэлэцIыкIухэм Валентинэ ягъусэу нэпэеплъ сурэтхэр зытырахыгъэх ыкIи Ленинград блокадэм хэтыгъэ бзылъфыгъэр бэгъашIэ хъунэу фэлъэIуагъэх.

Тиветеранхэм, тылым хэтыгъэхэм, Ленинград блокадэм хэлэжьагъэхэм, заом икIэлэцIыкIухэм лIыхъужъныгъэу зэрахьагъэр хэткIи щысэтехыпI.

Екатерина Загорулько.