«Щынэгъончъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектым ипшъэрылъ шъхьаIэхэм ащыщ лъэмыджхэр шапхъэхэм адиштэу шIыгъэнхэр.

[caption id="attachment_132547" align="aligncenter" width="800"] Сурэтыр: «Адыгеяавтодор»[/caption]

Ащ къыдыхэлъытагъэу икIыгъэ мэлылъфэгъу мазэм псы­хъоу Джаджэ телъ лъэмыджым игъэцэкIэжьын Джэджэ районым щырагъэжьагъ. Автомобиль гъогухэм я ГъэIорышIапIэу «Адыгеяавтодорымрэ» гъогу­рыкIоныр щынэгъончъэнымкIэ Къэралыгъо инспекцием и Гъэ­IорышIапIэу АР-м щыIэмрэ яшIэ хэлъэу ар зэрэщытэу зэфашIыгъэу, псэолъэшIын IофшIэнхэр щэкIох. ПсэупIэхэм узэрякIо­лIэщт нэмыкI гъогухэр зэрэщыIэхэм ащ фэдэ амал къы­тыгъ.

Мы лъэмыджыр блэкIыгъэ лIэшIэгъум ия 70-рэ илъэсхэм ашIыгъагъ, агъэкIэжьын зищыкIэ­гъагъэр бэшIагъэ, лъэпкъ проек­тым ишIуагъэкIэ ыуж ихьагъэх. ПсэолъэшIхэм автомобиль рыкIуапIэри, пкъэоу чIэтхэри Iуа­хыгъэх, икIэрыкIэу ахэр ашIы­жьынхэу рагъэжьагъ. IофшIэнхэр заухыкIэ, лъэмыджыр нахь ­лъагэ ыкIи нахь кIыхьэ хъущт, тонн 12— 15 ыIыгъыщтыгъэмэ, 20 — 25-м къыщымыкIэу кIуачIэ иIэщт. 2023-рэ илъэсым ишэ­кIогъу мазэ нэс аухынэу ары проектым къызэрэдэлъытагъэр.

Шъугу къэдгъэкIыжьын, «Щы­нэгъончъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектым ишIуагъэкIэ мы илъэсым Джэджэ районымкIэ псыхъоу Фарзэ, Тэхъутэмыкъое районымкIэ псыхъоу Чыбый ателъ лъэмыджитIур джыри ащагъэцэкIэжьыщт.

ПстэумкIи 2023-рэ илъэсым мыщ фэдэ псэуалъэхэм ягъэ­кIэжьын сомэ миллион 425-рэ республикэм щыпэIуагъэхьащт.