КIэлэегъэджэ анахь дэгъу
«2023-рэ илъэсым Адыгеим икIэлэегъадж» зыфиIорэ зэнэкъокъум щытекIуагъэр къэнэфагъ. Ар Тэхъутэмыкъое районым ит къуаджэу АдыгеякIэм иеджапIэу N 27-м ублэпIэ классхэмкIэ икIэлэегъаджэу Елена Мосоловар ары.
Джащ фэдэу къыхагъэщыгъэхэм ащыщых: Теуцожь районым ит къуаджэу ПчыхьалIыкъуае ия 3-рэ еджапIэу Нэхэе Даутэ ыцIэ зыхьырэм географиемкIэ икIэлэегъаджэу Маргарита Фарафоновар; Красногвардейскэ районым ит къуаджэу Хьатикъуае иеджапIэу N 2-м биологиемкIэ икIэлэегъаджэу Наталья Логачевар; Мыекъуапэ илицееу N 19-м ублэпIэ классхэмкIэ икIэлэегъаджэу Анатолий Казаковыр; Адыгэкъалэ иеджапIэу N 1-м ублэпIэ классхэмкIэ икIэлэегъаджэу Шэуджэн Самэт.
Москва хэкум щыкIощт Урысые зэнэкъокъум икIэух едзыгъо Елена Мосоловар хэлэжьэщт ыкIи тишъолъыр ащ къыщигъэлъэгъощт. Ар илъэс 32-рэ хъугъэ кIэлэегъаджэу зылажьэрэр. Ащ сабыеу ригъаджэхэрэр ыкIи ыпIухэрэр хэушъхьафыкIыгъэх, япсихолого-физиологическэ лъэныкъохэр къыдилъытэхэзэ иIофшIэн егъэпсы. Ащ кIэлэеджакIохэр зэрэригъаджэхэрэ шIыкIэри хабзэу щыIэхэм атекIы, гъэсэныгъэ программэм щыгъэгъозэгъэнхэм, цIыфым иуцун ыкIи игъэпсын афытегъэпсыхьэгъэ методикэр егъэфедэ.