Зызэхащагъэр илъэс 99-рэ хъугъэ
Кавказ къэралыгъо биосфернэ заповедникэу Х.Г. Шапошниковым ыцIэ зыхьырэр зызэхащагъэр илъэс 99-рэ зэрэхъугъэр экскурсие гъэшIэгъонхэмрэ къэгъэлъэгъон зэфэшъхьафхэмрэкIэ хагъэунэфыкIыгъ.
[caption id="attachment_132520" align="aligncenter" width="800"] Заповедникым ипресс-къулыкъу.[/caption]
Заповедникым имэфэкI ихэгъэунэфыкIын хэлэжьагъэхэм зэкIэм ыпкIэ хэмылъэу зыфэе лъагъохэр къыхахынэу, мастер- классхэм ахэлэжьэнхэу, заповедникым имузей зыщаплъыхьанэу фитыныгъэ яIагъ, Программэм къыдыхэлъытэгъэ Iофтхьабзэхэр къалэу Шъачэ, Адыгеим ыкIи паркэу «Южные культуры» зыфиIорэм ащырагъэкIокIыгъэх.
«Заповедникым баиныгъэу иIэр тиIофышIэхэу мафэ къэс заповедникым икъэухъумэнрэ къэкIыхэрэмрэ псэушъхьэу хэсхэмрэ якъызэтегъэнэнрэ алъыплъэхэрэр ары. Нэбгырэ пэпчъ сыфэраз. КъэкIорэгъэм заповедникыр зызэхащагъэр илъэси 100 зэрэхъущтым фэгъэхьыгъэ программэу зэхэдгъэуцуагъэм нэмыкIэу къытпыщылъ илъэси 3 — 5-м дгъэцэкIэщт Iофтхьабзэхэри тэгъэнафэх», — къыIуагъ заповедникым ипащэу Сергей Шевелевым.
Экоцентрэу «Лаурэм» щыIэ вольерыр цIыфхэм арагъэлъэгъугъ, кIэлэцIыкIухэм мастер- классхэр афызэхащагъэх. ХьакIэхэр Адыгеим къыщыкIырэ щайуцэу «Адыгейский» зыфиIорэм илъэтегъэуцо къыхагъэлэжьагъэх, ащ идэгъугъэрэ ишIуагъэрэ къафаIотагъэх, иIэшIугъэ арагъэуплъэкIугъ, пстэуми ар агу рихьыгъ.
Гъозэрыплъэрэ Лэгъонакъэрэ ащызэхащэгъэ Iофтхьабзэхэр гъэшIэгъоныгъэх. Заповедникыр зэрэзэхащагъэм ыкIи итарихъ мэфэкIым къекIолIагъэхэр нэIуасэ фашIыгъэх, черкес чъыгхатэхэр мы чIыпIэхэм зэращагъэбагъощтыгъэхэр къафаIотагъ.
«Южные культуры» зыфиIорэ паркым апэрэу ащ фэгъэхьыгъэ къэгъэлъэгъонхэр щыкIуагъэх. Илъэс зэкIэлъыкIохэм паркым щытырахыгъэ сурэтхэр зэрагъапшэхэзэ, апэрэ илъэсхэм ар зыфэдагъэмрэ мы лъэхъаным зэрэхъугъэмрэ уасэ афашIыгъ. Къэлэ-курортэу Шъачэ итарихъ музей чIэлъ сурэтхэм ащыщхэр къэгъэлъэгъонхэм ахагъэлэжьагъэх.
1934-рэ илъэсым тырахыгъэгъэ фильмэу «Кавказский заповедник» зыфиIоу хъарзынэщым къыхагъотэжьыгъэм хьакIэхэр рагъэплъыгъэх. Ащ заповедникым иапэрэ къэралыгъо инспекторхэр, научнэ къулыкъушIэхэр, апэрэ зекIохэм ащыщхэр щалъэгъугъэх.
Шъаукъо Аслъангуащ.