«Адыгэ шыуджэгу» зыфиIорэ зэнэкъокъухэр Тэхъутэмыкъое районым ит шыгъэчъэ-спорт комплексэу «Щагъдый» зыфиIорэм щыкIуагъэх. ЯтIонэрэ илъэс хъугъэу ахэр зэхащэх. Мызэгъогум зэнэкъокъухэр Хэгъэгу зэошхом ТекIоныгъэр къызыщыдахыгъэр  илъэс 78-рэ зэрэхъугъэм фэгъэхьыгъагъэх.

Адыгеим, Къэрэщэе-Щэрджэсым, Къэбэртэе-Бэлъкъарым къа­рыкIыгъэ шыу купхэр ащ хэлэжьагъэх. Тэхъутэмыкъое районым ыкIи Тэхъутэмыкъое къоджэ коим япащэхэу Шъэо Аскэррэ Нэужьрэкъо Алыйрэ яIэпыIэгъукIэ шыгъачъэхэр «Шыу Хасэм» зэхищэгъагъэх. Зэхэт шIухьафтын фондым сомэ мин 300 илъыгъ. Теуцожь районым ишыу купэу «Бжъэдыгъухэр», Тэхъутэмыкъое районым ишыгъэчъэ-спорт комплексэу «Щагъдый», «Шыу заф», Къэрэщэе-Щэрджэс Республикэм ишыу купэу «Къэсэй», зэкIэмкIи купиплIыр шыу 16 хъухэу, «Чыхъожь», «ШыудэкI», «Быракъ- зехь», «Щэбзэоныр» зыфиIохэрэмкIэ, метрэ 1800-рэ хъурэ гъогууанэм щызэпэчъэнымкIэ ыкIи «Шыу джэгу» зыфиIорэмкIэ анахь шыу пэрытхэр къыхагъэщыгъэх.

Зэнэкъокъухэм нахь къащыхэщыгъэр Къэрэщэе-Щэрджэсым ит къуаджэу Хьабэз къикIыгъэ шыу купэу «Къэсэй» зыфиIорэр ары. Апэрэ чIыпIитIурэ ятIонэрэ чIыпIитIурэ купым зэнэкъокъу­хэм къащыдихыгъ. Тэхъутэмыкъое районым ыгъэнэфэгъэ зэIэпахырэ кубкэу «Шыу Хасэ – Адыгэ шыуджэгу» зыфиIорэр купым джащ фэдэу къыдихыгъ. Тэхъутэмыкъое районым ишыу купэу «Шыу заф» апэрэ, ятIонэрэ ыкIи ящэнэрэ чIыпIэхэр къыфагъэшъошагъэх. Шыу купэу «Щагъдый» ахэм ауж ит. Теуцожь районым ишыу купэу «Бжъэдыгъухэр» зыфиIорэм зэнэкъокъухэм ящэнэрэ чIыпIэр зэ къащыдихыгъ. «Шыу Хасэм» ипащэу Тхьапшъэ­къо Альберт къызэриIуагъэмкIэ, «Адыгэ шыуджэгу» зыфиIорэ зэнэкъокъухэр илъэс къэс зэхащэхэзэ ашIынэу, шыоу хагъэлажьэхэрэми япчъагъэ хагъэхъонэу ямурад.