Предпринимательхэм IэпыIэгъу ятыгъэнымкIэ АР-м и Гупчэ бизнесым пылъхэм яшIэныгъэхэм ахагъэхъоным фытегъэпсыхьэгъэ Iофтхьабзэ мы тхьамафэм зэхищэщт.

Унэе хъызмэтшIэпIэ цIыкIухэм компание ыкIи корпоратив инхэм зэпхыныгъэ адашIынымкIэ IэпыIэгъу афэхъугъэным фытегъэпсыхьэгъэ хэушъхьафыкIыгъэ программэу «Акселератор роста малого бизнеса» зыфиIорэм къыдыхэлъытагъ мэфэку мафэм, жъоныгъуакIэм и 18-м, Гупчэр зычIэт Унэм щыкIощтыр. Программэм иегъэджакIоу, Сыбыр лъэныкъом щагъэфедэрэ гъомылэпхъэ лъапIэхэм ыкIи шIухьафтынхэм ябрендэу «Вкус Тайги» зыфиIорэр зыгъэпсыгъэ Олеся Ушаковам ежь ибизнес зэрэзэхищагъэр ыкIи федеральнэ бэдзэршIыпIэм ихьан, чIыпIэ гъэнэфагъэ щиубытын зэрилъэ­кIыгъэр къыIотэщт.

Предпринимателэу шIоигъоныгъэ зиIэр зэкIэ мыщ рагъэблагъэ. Бизнесыр мылъку къэкIуапIэу къыхэзыхымэ зышIоигъоу, изыхъухьэхэрэм къащегъэжьагъэу, илъэсыбэ хъугъэу Iоф зышIэрэ хъызмэтшIапIэхэм япащэхэм анэсыжьэу ашIогъэшIэгъоныщт. Уиунэе Iоф зэребгъэ­жьэщтым, узтещыныхьанэу, узфэсакъынэу ащ хэлъхэм, амалыкIэу щыIэхэм, бэдзэршIыпIэм непэ изытет, узхэуцон чIыпIакIэу иIэхэм, уипродукт федэ къыхьыным зэрэфытегъэпсыхьагъэр анализ зэрэпшIыщтым, непэ зигъохэм, хабзэ хъугъэхэм, нэмыкIыбэхэм ащ щатегущыIэщтых. Къэбарым нахь игъэкIотыгъэу зыщызгъэгъуазэмэ зышIоигъохэр мы телефонымкIэ къытеонхэ алъэкIыщт: 8(800)550-57-00. Электроннэ почтэмкIи зэрагъэшIэн амал щыI. Мары адресыр: go@federalbusiness.ru.