Гъатхэр къызысыкIэ дунаир къэфэбэжьэу хабзэ, ау мыгъэ тифабэ нахь лъыкIотагъ. Ащ пае къэмынэу ощх зэпымычыжьхэм апкъ къикIыкIэ уцыр нахь къэкIэу фежьагъ, ащ лъыпытэу уз щынагъохэр зезыхьэрэ хьацIэ-пIэцIэ лъэпкъэу бамыкIым Адыгеим ичIыпIэхэм защиушъомбгъугъ.

БамыкIым зэрихьэрэ уз щынагъохэм якъыхэгъэщын, а IофымкIэ Адыгеим иэпидемиологическэ зытет къытедгъэгущы­Iагъ щэфакIохэм яфитыныгъэхэр ыкIи цIыфым игупсэфыныгъэ къэухъу­мэгъэнхэмкIэ Федеральнэ къулыкъум и ГъэIорышIапIэу Адыгэ Республикэм щыIэм ипащэу Сергей Завгороднер.

— ЖъоныгъуакIэм и 15-м ехъулIэу къытIэ­кIэхьэгъэ къэбарымкIэ, мы илъэсыр къызихьа­гъэм къыщегъэжьагъэу бамыкIыр къяцэкъагъэу нэбгырэ 130-м ехъумэ медицинэ учреждениехэм зафагъэзагъ, ахэм ащыщэу 62-р илъэс 14 мыхъугъэ кIэлэцIыкIух. БлэкIыгъэ илъэсым мыщ фэдэ иуахътэ нэбгырэ 85-мэ бамыкIыр яцэкъагъэу агъэунэфыгъагъ, 49-р — кIэлэцIыкIух. Зэрэхъу­рэмкIэ, мыгъэ бамыкIыр къызэцэкъагъэхэм япчъагъэ хэхъуагъ. А пчъагъэр джыри зэрэнахьыбэм сицыхьэ телъ, сыда пIомэ зэкIэми медицинэ учреждениехэм зафагъа­зэрэп, — къыIуагъ респуб­ликэм исанитар врач шъхьаIэ.

ТигущыIэгъу зэрэхигъэунэфыкIыгъэмкIэ, Кощхьэблэ районым нэмыкIэу, бамыкIыр къыщяцэкъа­гъэу адрэ районхэм зэкIэми ащагъэунэфыгъ.

АР-м къэбзэныгъэмрэ эпидемиологиемрэкIэ и Гупчэ илабораторие бамыкIхэм яуплъэкIун зэрэфэхьазырыр, зыгъэпсэфыгъо мафэхэми ащ Iоф зэришIэрэр къыхигъэщыгъ Сергей Завгороднем. Ыпэрэ илъэсхэм Гупчэм ышIыгъэ уплъэкIунхэм къызэрагъэлъагъорэмкIэ, Адыгэ Республикэм бамыкI лъэпкъ 24-рэ щагъэунэфыгъ. Ахэм анахьэу зэрахьэрэ уз щынагъохэр «клещевой боррелиоз» ыкIи «гранулоцитарный анаплазмоз» зыфиIохэрэр ары. Ау къызэцэкъэ­гъэ цIыфхэм мы узхэр яIэхэу джыри агъэунэфыгъэп. Джащ фэдэу цIыфыр зэрылIыкIын ылъэ­кIыщт уз щынагъоу «клещевой энцефалиткIэ» заджэхэрэр бамыкIхэм зэрахьэ, ар Адыгеим ишъолъыр зэ нэмыIэми щагъэ­унэфыгъэп.

КъэIогъэн фае мы уз щынагъом пэуцужьырэ прививкэ зэрэщыIэр. Ау «энцефалитыр» республикэм зэрэщымыIэм къы­хэкIыкIэ, ар жъугъэу ахалъхьэ­рэп. Чыжьэу кIохэзэ мэзхэм, чIыпIэ щынагъохэм Iоф ащызышIэхэрэм ежь яшIоигъоныгъэ­кIэ прививкэр арагъэшIы.

— ЦIыфхэм джыри зэ агу къэзгъэкIыжьымэ сшIоигъу бамыкIыр щынагъоу зэрэщытыр, ащ ыпкъ къикIыкIэ зэпахырэ узхэр къяузынхэ зэрилъэ­кIыщтыр, — къеIуатэ Сергей Завгороднем. — Арышъ, бамыкIыр цIыфым къецэкъагъэмэ, псынкIэу медицинэм иIофышIэхэм зафигъазэмэ нахьышIу. Ау ежь-ежьырэу зыхэзыхыжьыхэрэр щыIэх. Ащ фэдэ зыхъу­рэм бамыкIыр зышъхьэ теуIубэгъэ апч бэшэрэбым ижъугъэтIысхьи, урамэу Гагариным ыцIэ зыхьырэм, унэу N 74-м АР-м къэбзэныгъэмрэ эпидемиологиемрэкIэ и Гупчэ илабораторие уплъэкIунхэр щяжъугъэшIымэ нахь тэрэз.

ЦIыфхэм япсауныгъэ къэухъу­мэгъэным, бамыкIхэм зэрахьэрэ узхэм ахэр ащыухъумэгъэнхэм афэшI Роспотребнадзорым и ГъэIорышIапIэу АР-м щыIэм унашъохэр ышIыгъэх. Ахэм къа­щыгъэнэфагъэх бамыкIхэм апкъ къикIыкIэ цIыфхэм уз зэфэ­шъхьафхэр къямыузынхэм пае министерствэхэм, къулыкъухэм, муниципальнэ образованиехэм зэшIуахын фэе Iофтхьабзэхэр. Пстэуми апэ рагъэшъырэр цIыф­хэм зызыщагъэпсэфырэ, спорт Iофтхьабзэхэр зыщыкIонхэу щыт чIыпIэхэр укъэбзыгъэнхэр, бамыкIхэр зыгъэкIодырэ щэнаутхэр атеутхэгъэнхэр ары. Джащ фэдэу кIэлэцIыкIу зыгъэпсэфыпIэ ыкIи былымхэр зыщагъэхъурэ чIыпIэхэри агъэкъабзэх.

А зэпстэуми адакIоу санитар врач шъхьаIэм къыхигъэщыгъэр къэзыкIухьэрэ цIыфхэр нахь зыфэсакъыжьынхэ, бамыкIыр къыозымыгъэкIолIэрэ шIыкIэхэр агъэфедэнхэр ары. Ащ пае кIы­шъор чIэзыгъэбылъыхьэрэ щыгъын фыжьхэр, лъэкъопылъхьэ зэфэшIыгъэхэр зыщалъэнхэу щыт, бэрэ Iэпкъ-лъэпкъхэр къаплъыхьанхэ фае. БамыкIыр къы­зыплъэгъукIэ, пкъышъолым псынкIэу къытепхымэ ыкIи медицинэ учреждением охътэ кIэкIым уекIуалIэмэ нахьышIу.

«Линие плъырым» Iоф ешIэ

2023-рэ илъэсым жъоныгъуа­кIэм и 15-м къыщегъэжьагъэу и 26-м нэс «клещевой энцефалит» зыфиIорэр ыкIи нэмыкI узхэу бамыкIхэм зэрахьэхэрэр цIыфхэм къапымыхьанхэм яIо­фы­гъохэм афэгъэзэгъэ «линие плъырыр» Роспотребнадзорым зэхищагъ.

Зигугъу къэтшIырэ хьацIэ-пIэцIэ лъэпкъым зызэрэщаухъумэщтыр, ар къахэхьагъэмэ зэрэзекIощтхэ шIыкIэхэр, нэмыкI упчIэу зыгъэгумэкIыхэрэр ведомствэм испециалистхэм афагъэзэн алъэкIыщт.

Шъолъыр «линие плъырхэм» ятелефонхэр Роспотребнадзорым игъэIорышIапIэхэм ясайтхэм арыжъугъотэщт. Федеральнэ Роспотребнадзорым и ЗыкI гупчэ чэщи мафи къэбарыр къыщы­шъуа­Iощт, телефоныр: 8-800-555-49-43-рэ (ыпкIэ хэлъэп).