Зэпахырэ узэу шъогъазэр (корь) къызэузыхэрэм япчъагъэ Урысыем щыхахъоу федеральнэ къэбар жъугъэм иамалхэм къа­тэу зэхэтхыгъ. АщкIэ Адыгеим иIофхэм язытет тыкIэупчIагъ. ЩэфакIохэм яфитыныгъэхэр ыкIи цIыфым игупсэфыныгъэ къэухъумэгъэнхэмкIэ Федеральнэ къулыкъум и ГъэIорышIапIэу Адыгэ Республикэм щыIэм ипащэу Сергей Завгороднем къызэ­риIуагъэмкIэ, мы уахътэм тишъо­лъыр а узыр щагъэунэфыгъэп.

— 2023-рэ илъэсым мэзаем икъихьагъум мы узыр нэбгыри 4-мэ яIэу агъэу­нэфыгъагъ, ащ ыуж мыщ епхыгъэ хъугъэ- шIагъэ къыхагъэщыгъэп, — къеIуатэ санитар врач шъхьаIэм. — Сымаджэу агъэунэфыгъэхэр Тэ­хъутэмыкъое районым щыщых. Къэбарыр къызэрэтлъыIэсыгъэм тетэу эпидемием пэуцужьырэ Iофтхьабзэхэр зэкIэ сыхьат 72-м къыкIоцI зетхьагъэх. Игъом ар къы­зэтедгъэуцон тлъэ­кIыгъ.

Шъогъазэр зэпахырэ уз щынагъоу, лIэныгъэр къыхэкIэу зэрэщытыр пстэуми къагуры­Iонэу щыт ыкIи ащ пэуцужьырэ закъор вакцинэр ары. Сергей Завгороднем къызэриIуагъэмкIэ, УФ-м исанитар врач шъхьаIэ иунашъокIэ шъогъазэм пэуцу­жьырэ вакцинэр ахалъхьанымкIэ «подчищающая иммунизация» зыфиIорэр бэмышIэу Адыгеим щырагъэжьагъ. Ащ къикIырэр «иммунизацием итхьамафэ» къыхимыубытагъэхэм (е сы­мэджа­гъэха, е а уахътэм дэмысыгъэха, е нэмыкI ушъхьагъухэм япхыгъэу прививкэр ахамылъхьагъа) джы шъогъазэм пэуцужьырэ прививкэр афэшIыгъэныр ары. ПстэумкIи прививкэр зыфашIынэу щытыр нэбгырэ 2574-рэ, 1195-р — кIэлэцIыкIух.

— Мы уахътэм иммунизациер жъугъэу макIо. Жъо­ныгъуакIэм, кIэлэцIыкIухэр лагерьхэм мыкIохэзэ прививкэр ахэтлъхьан фае. Унашъом къызэрэдилъытэрэмкIэ, илъэсыр екIыфэ на­­- хьы­жъхэр къызэлъедгъэ­убытыхэмэ хъущт, — хигъэу­нэфыкIыгъ Сергей Завгороднем.

Iэшъынэ Сусан.