Мыгъэ Адыгеим ичIыгулэжьхэм гъэтхэсэ гектар 106189-рэ апхъынэу агъэнэфагъ. АР-м мэкъу-мэщымкIэ и Министерствэ жъоныгъуакIэм и 15-м тызэрэщигъэгъозагъэмкIэ, ащ щыщэу 41650-р апхъыгъах.

[caption id="attachment_132504" align="aligncenter" width="800"] «Адыгэ макъэм» ихъарзынэщ.[/caption]

Лэжьыгъэ ашIыщт натрыф гектар 21080-у агъэнэфагъэм щыщэу 11316-р халъхьагъ, тыгъэ­гъазэм гектар 24912-рэ хагъэ­кIыгъ, пстэумкIи 57760-рэ ап­хъын гухэлъ яI, зэнтхъэу чIыгум рагъэкIугъэр гектар 493-рэ мэхъу, хьэу 180-рэ апхъыгъ, горох гектар 1139-рэ халъхьагъ.

Соем рагъэубытынэу мыгъэ агъэнэфагъэр гектар 11350-рэ мэхъу, 696-рэ хагъэкIыгъ, илъэс пчъагъэм къэкIыжьырэ уц гектар 2692-м щыщэу 370-р апхъыгъ, зы илъэс нахьыбэрэ къэмыкIырэ уцэуи 146-рэ халъхьагъ, пстэумкIи 410-рэ агъэнэфагъ, былымIускIэ агъэфедэщт натрыфым гектар 1010-рэ хагъэкIыгъ, картоф гектар 37,5-рэ, нэмыкI хэтэрыкIэу гектари 41-рэ агъэ­тIыс­ыгъ.

Гъэтхасэхэм япхъынкIэ Шэ­уджэн районыр апэ ит, ащ ичIыгулэжьхэм мыгъэ халъхьэщт гъэтхэсэ гектар 14235-м ипроцент 64-р, ар 9070-рэ, хагъэ­кIыгъ. Ахэм лэжьыгъэ ашIыщт натрыф гектар 2059-рэ, тыгъэгъазэу 6882-рэ апхъыгъ.

Кощхьэблэ районыр ащ ыуж кIэкIэу ит. Ащ ичIыгулэжьхэм мыгъэ гъэтхасэхэм гектар 16681-рэ арагъэубытын гухэлъ яI, 10428-р халъхьэгъах.

Джэджэ районыр мы уахътэм ящэнэрэ, гъэтхэсэ гектар 26063-у агъэнэфагъэм хагъэкIыгъэр 13007-рэ мэхъу.

Пынджым ипхъыни рагъэ­жьагъ. Тэхъутэмыкъое районыр ары анахьыбэу мы культурэр къызщагъэкIырэм, гектар 5915-рэ ащ ичIыгулэжьхэр агъэнэфагъ, апэуи фежьагъэх. Мы уахътэм халъхьагъэр гектар 330-рэ мэхъу.

Ощх зэпымыужьым Адыгеим ичIыгулэжьхэр мыгъэ лъэшэу ыгъэохъугъэх, бжыхьасэхэм зэряшIушIэщтхэри, гъэтхасэхэм яхэлъхьани ыгъэгужъуагъэх. ГъэрекIо, джырэ фэдэ уахътэм агъэнэфагъэм ипроцент 60-м ехъур халъхьэгъэхагъ. Арэу щытми, ощххэр зэрэуцугъэхэм, температурэм, мыщ фэдэ уахътэм зэрифэшъуашэм тетэу, зэрэхэхъуа­гъэм чIыгухэр гъушъынхэшъ, гъэт­хэ IофшIэнхэр нахь къыгъэ­псынкIэнхэу гугъапIэ къеты.

ХЪУТ Нэфсэт.