2022-рэ илъэсым ибюджет гъэцэкIагъэ зэрэхъугъэм фэгъэхьыгъагъ «публичнэ едэIунхэу» АР-м иминистрэхэм я Кабинет зэхищэгъагъэр. АР-м и Къэралыгъо Совет — Хасэм и Тхьаматэ игуадзэу, бюджет-финанс, хэбзэIахь ыкIи экономикэ политикэмкIэ, предпринимательствэмкIэ, IэкIыб зэпхыныгъэхэмкIэ и Комитет ипащэу Iэщэ Мухьамэд ащ тхьамэтагъор щызэрихьагъ.

Iофтхьабзэм Парламентым идепутатхэм ащыщхэр, муниципальнэ образованиехэм, къулыкъу зэфэшъхьафхэм, общест­веннэ организациехэм ялIыкIохэр, студентхэр, нэмыкIхэр хэлэжьагъэх.

Iэщэ Мухьамэд ипэублэ пса­лъэ «едэIунхэр» бюджет политикэм къыщыдэлъытэгъэ Iоф­тхьабзэу, шIокI имыIэу гъэцэкIэгъэн фаехэм зэращыщыр къыщыхигъэщыгъ.

— Республикэм щыпсэухэрэм бюджет ахъщэр зыдакIорэр, зыпэIухьэрэр ашIэнэу фиты­ныгъэ яI, — къыIуагъ Премьер­министрэм игуадзэ. — «Публичнэ едэIунхэм» ащ фэдэ амал къаты. Бюджет мылъкур гъэфедагъэ зэрэхъугъэр цIыф­хэм алъыгъэIэсыгъэныр Уры­сыем исубъектхэм зэрагъэцакIэрэр икIыгъэ илъэсым зызэрагъапшэм, анахь шъхьэихыгъэу, зэIухыгъэу, зытетым тетэу ар къэзыгъэлъагъохэрэмкIэ Адыгеир апэ хъугъэ. Ащ къеушыхьаты зыпари шъэф е чIэу­къощагъэ хэмылъэу бюджет мылъкур зищыкIагъэм зэрэпэ­Iухьэрэр. «ЕдэIунхэмкIэ» бюджет ахъщэр зыдэкIуагъэр зэралъыдгъэIэсырэм имызакъоу, республикэм иинтернет нэкIубгъо шъхьаIи, финансхэмкIэ Министерствэм инэкIубгъуи къарэхьэ. ШIоигъоныгъэ зиIэ пстэур ахэмкIи хэплъэнхэ, ­яшIошIхэр къыраIотыкIынхэ алъэ­кIыщт, амалэу щыIэмкIэ къы­дэлъытагъэ хъущтых.

АР-м финансхэмкIэ иминистрэу Виктор Орловым 2022-рэ илъэсым бюджетыр гъэцэкIагъэ зэрэхъугъэм нэIуасэ фи­шIыгъэх. УФ-м и Президент лъэпкъ гухэлъхэм, нэмыкI социальнэ лъэныкъохэм афэгъэ­хьыгъэ унашъоу къышIыгъэхэм, АР-м и ЛIышъхьэ пшъэрылъэу къыгъэуцухэрэм, федеральнэ министерствэхэм адашIыгъэ зэзэгъыныгъэхэм къащыдэлъытагъэхэм ягъэцэкIэн пстэумэ апшъэ зэрашIыгъэр ащ къыхигъэщыгъ.

Министрэм къызэриIуагъэмкIэ, зэхэт бюджетыр хахъо­хэмкIэ сомэ миллиард 44,2-рэ хъущтыгъ, хъарджхэр ащ сомэ миллиони 172-кIэ нахьыбагъэх. Бюджетым щыщэу сомэ миллиард 22-м ехъур республикэм иахъщ, миллиард 28,1-р зэрамыгъэзэжьыщт мылъкоу къы­хэлъхьагъэ хъугъэ, хэбзэIахьэу ыкIи мыхэбзэIахьэу къыхэхъуа­гъэр сомэ миллиард 16,6-м ехъу.

Илъэсым ыкIэм нэс зэхэт бюджетым ихахъохэмрэ ихъардж­хэмрэ зэхъокIыныгъэхэр афэхъугъэх. Хахъохэр сомэ миллиарди 3,7-кIэ, хъардж­хэр миллиарди 5,3-кIэ нахьыбэ хъугъэх.

Нэужым лъэныкъо пэпчъ, культурэм, гъогушIыным, псэупIэ-коммунальнэ хъызмэтым, физкультурэм, спортым, нэмыкI­хэм апэIухьагъэхэм министрэр игъэкIотыгъэу къатегущы­Iагъ. Идоклад икIэухым рес­пуб­ликэм чIыфэ темылъэу пшъэ­ры­лъэу иIэхэр, зэзэгъыныгъэу ышIыгъэхэм къащыдэ­лъы­тагъэ­хэр зэкIэ гъэцэкIагъэ зэ­рэ­хъу­гъэр, финансовэ зыпкъитыныгъэр къызэрэзэтыригъэнагъэр къыIуагъ.

Доклад ужым «едэIунхэм» ахэлэжьагъэхэм яупчIэхэм министрэм джэуапхэр къариты­жьыгъ. Республикэ бюджетым къыхэхыгъэ субсидиеу муниципальнэ образованиехэм афа­тIупщыхэрэм апае ахэм ялIыкIоу къэгущыIагъэхэм ярэзэныгъэ къыраIотыкIыгъ.