Предпринимательхэм IэпыIэгъу ятыгъэнымкIэ АР-м и Гупчэ бизнес цIыкIум ыкIи гурытым апылъхэм я Урысые общественнэ организациеу «ОПОРА РОССИИ» зыфиIорэм и Адыгэ шъолъыр къутамэу зэхащагъэм зэхэсыгъо щыриIагъ.

[caption id="attachment_132477" align="aligncenter" width="1116"] Сурэтыр: гупчэм исайт. Сурэтыр: А. Гусев.[/caption]

Ащ хэлэжьагъ ыкIи тхьа­мэтагъор щызэрихьагъ организацием и Президиум хэтэу, Ростовскэ хэкумкIэ къутамэм ипащэу Аркадий Гершман.

Зэхэсыгъом зигъо Iоф зэ­фэшъхьафхэм щатегущыIагъэх, Адыгэ шъолъыр къутамэм ипащэ щыхадзыжьыгъ. Зэдаштэу мы пшъэрылъхэр фагъэзэжьыгъэх ыпэкIи ащ тетыгъэу На­талья Егоровам.

Джащ фэдэу къутамэм иотделениехэр Тэхъутэмыкъое ыкIи Мыекъопэ районхэм ащагъэ­псыгъэх, ахэм пэщэныгъэ адызезыхьащтхэр агъэнэфагъэх. Тэхъутэмыкъое районымкIэ Пщыпый Марзыет а пшъэрылъхэр ыгъэцэкIэщтых, Мыекъопэ районымкIэ отделением ипащэ ашIыгъ Николай Киселевыр.

Аркадий Гершман гущыIэгъу тызыфэхъум къызэрэтиIуагъэмкIэ, «ОПОРА РОССИИ» зыфиIорэ организациер гъэрекIо зэхащагъ ныIэп, ау ащ икъу­тамэхэр Урысыем ишъолъырхэм зэкIэми къащызэIуахыгъэх, Урысыем субъектыкIэу къы­хэ­хьажьыгъэхэми мыгъэ ащагъэ­псыгъ.

Организацием хэтхэр зэкIэ бизнес цIыкIум е гурытым апылъых. Ар мылъку къэкIуапIэу къыхэзыхыгъэхэр зэде­Iэжьхэзэ ябизнес зиушъомбгъу­ным зэдыдэлэжьэнхэр, Iофыгъоу яIэхэр зищыкIагъэм лъагъэIэсынхэр ары общественнэ организацием пшъэрылъ шъхьаIэу иIэр.

Мыщ и Адыгэ шъолъыр къутамэ непэ бизнесым пылъэу нэбгырэ 64-рэ хэт. Илъэсым ыкIэм нэс ар нэбгыри 100-м кIэхьаным ыуж зэритыщтхэм, предпринимательхэмкIэ ар федэ зэрэхъущтым Аркадий Гершман къыкIигъэтхъыгъ.

ХЪУТ Нэфсэт.