Апэрэ республикэ форумэу «Адыгеим иныб­жьыкIэхэр» зыфиIорэр непэ Мые­къуапэ щырагъэжьагъ.

Республикэм игурыт еджапIэхэм якIэлэеджэкIо, техникумхэм, колледжхэм, университетхэм ястудент 500-м ехъу, Iоф зышIэрэ ныбжьыкIэхэр, ныбжьыкIэ объединениехэмрэ общественнэ организациехэмрэ ахэт­хэр ащ икъызэIухын хэлэжьа­гъэх.

Адыгэ Республикэм и ЛIышъхьэу КъумпIыл Мурат, АР-м и Къэралыгъо Совет — Хасэм и Тхьаматэу Владимир Нарожнэр, АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец, АР-м гъэсэныгъэмрэ шIэныгъэмрэкIэ ими­нистрэ ипшъэрылъхэр зыгъэцакIэу Евгений Лебедевыр, Адыгэ Республикэм ныбжьыкIэхэм яIофхэмкIэ и Комитет итхьаматэу Максим Галушкиныр, Адыгэ къэралыгъо университетым иректорэу Мамый Даут, общественнэ организациехэм япащэхэр, ныбжьыкIэхэр Iоф­тхьабзэм хэлэжьагъэх.

Форумыр къызэIуахыным ыпэ­кIэ Адыгэ Республикэм и ЛIышъхьэ Iофтхьабзэм хэла­жьэхэрэмрэ хьакIэхэмрэ закъы­фигъэзагъ. КъумпIыл Мурат Iофтхьабзэр зэхэзыщагъэхэм зэ­рафэразэр къыIуагъ, ныб­жьыкIэхэм я Урысые Союз и Адыгэ шъолъыр организацие республикэм иныбжьыкIэ политикэ изехьан иIахьышхо зэрэхи­шIыхьэрэр хигъэунэфыкIыгъ.

Адыгеим и ЛIышъхьэ мыщ фэдэ Iофтхьабзэхэм мэхьа­нэшхо зэряIэр къыхигъэщыгъ, гъэпсын Iофхэм зэрахэлажьэ­хэ­рэм пае ныбжьыкIэ чанхэм зэрафэразэр, илъэс къэс форумыр зэхащэнэу зэращыгугъырэр КъумпIыл Мурат къыIуагъ.

«ГухэлъышIоу шъуиIэхэр къы­жъудэхъунхэмкIэ непэ зэкIэ амалхэр щыIэх. Яамалхэм ­икъоу зыкъызэIурагъэхынэу ныбжьыкIэхэр зэрэпылъхэм, цIыфхэм яшIуагъэ арагъэкIы зэрашIоигъом мэхьанэшхо яI. ЩыIэныгъэм чанэу зыкъызэрэщагъэ­лъагъорэм пае ахэм лъытэныгъэ афэтэшIы. Тикъалэ итеплъэ на­хьышIу шIыгъэным шъо чанэу шъухэлажьэ, тиреспубликэ ифе­дэ зыхэлъ Iофхэм шъуапылъ», — къыIуагъ КъумпIыл Мурат.

Республикэм хэхъоныгъэ ышIынымкIэ ныбжьыкIэ дви­жением мэхьанэшхо зэриIэм къытегущыIэзэ, Адыгеим и ЛIышъхьэ республикэм ис кIэлэцIыкIухэмрэ ныбжьыкIэхэмрэ IэпыIэгъу зэрафэхъухэрэм, ахэм гъэсэныгъэ дэгъу ягъэгъо­тыгъэнымкIэ, загъэпсэфынымкIэ амалышIухэр зэрарагъэгъотырэр къыIуагъ. Пандемием илъэхъан гуфакIохэм яшъыпкъэу Iоф зэрашIагъэр КъумпIыл Мурат агу къыгъэкIыжьыгъ. Республикэм ипащэ зэрэхигъэу­нэфыкIыгъэмкIэ, Адыгеим иныбжьыкIэхэр чанэу волонтер Iоф­тхьабзэхэм ахэлэжьагъэх, шъолъыр «плъыжь­хэм» ащыIэ врачхэм IэпыIэгъу афэхъугъэх, кол-гупчэхэм яшъыпкъэу Iоф ащашIагъ.

«Тинеущырэ мафэ зыфэдэщтыр шъоры зэпхыгъэр. ГугъуемылIэу шъущымыт, ти Адыгей гупсэ хэхъоныгъэ ышIыным шъуишъыпкъэу шъудэлажь. Гъэ­хъагъэ хэлъэу Iоф шъушIэнэу, текIоныгъакIэхэм шъуакъыфэ­кIонэу сышъуфэлъаIо», — къы­Iуагъ Адыгеим и ЛIышъхьэ.

Форумым ипащэу, ныбжьыкIэ­хэм я Урысые Союз и Адыгэ шъолъыр организацие итхьаматэу Мыгу Бислъан Iофтхьа­бзэм къыщыгущыIагъ. Ащ зэрэхигъэунэфыкIыгъэмкIэ, федеральнэ программэхэмрэ рес­публикэм и Правительствэ къаритырэ IэпыIэгъумрэ яшIуагъэкIэ Адыгеим иныбжьыкIэхэм социальнэ мэхьанэ зиIэ Iоф­тхьабзэхэм ягъэцэкIэнкIэ ама­лэу яIэр илъэс къэс нахьыбэ мэхъу. Мыгу Бислъан Адыгеим и ЛIышъхьэу КъумпIыл Мурат «тхьауегъэпсэу» риIуагъ ныбжьыкIэ движением изегъэу­шъомбгъун ышъхьэкIэ иIахь зэ­рэхишIыхьэрэм фэшI.

Адыгеим и ЛIышъхьэ ныбжьыкIэ организациехэмрэ ­объединениехэмрэ япащэхэм Адыгэ къэралыгъо университетым иактовэ зал ифойе ща­дэгущыIагъ. КъумпIыл Мурат ныбжьыкIэхэм зэрафэразэр къыIуагъ кол-гупчэ зыкIым дэгъоу зэрэщылэжьагъэхэм фэшI, ахэм гухэлъэу яIэхэм къа­кIэ­упчIагъ. НыбжьыкIэ объединениехэм япащэхэм форумхэм язэхэщэнкIэ гухэлъэу яIэхэр ащ къыфаIотагъ, республикэм щызэрахьэрэ Iофтхьэбзэ пстэуми ахэлэжьэнхэм зэрэфэхьазырхэр къаIуагъ.

КъумпIыл Мурат апшъэрэ еджапIэхэм ястудентхэм къя­джагъ гъэсэныгъэ дэгъу зэрагъэгъотыным анаIэ тырагъэтынэу, яIоф хэшIыкIышхо фыряIэ хъунэу. Адыгеим и ЛIышъхьэ къызэрэхигъэщыгъэмкIэ, АР-м и Къэралыгъо Совет — Хасэр, министрэхэм я Кабинет игъу­сэхэу гъэсэныгъэ языгъэгъотырэ организациехэм, социальнэ проектхэм тапэкIи IэпыIэгъу афэхъущтых.

«Адыгеим иныбжьыкIэхэр» зыфиIорэ форумыр жъоны­гъуакIэм и 12-м къыщегъэжьагъэу жъоныгъуакIэм и 14-м нэс республикэм иапшъэрэ еджэпIитIумэ ащыкIощт. НыбжьыкIэхэр гъэсэныгъэм епхыгъэ Iофтхьабзэхэм, джэгукIэхэм, социальнэ Iофтхьабзэхэм, мастер-классхэм ахэлэжьэщтых.

Президент грантхэм я Фонд иIэпыIэгъукIэ проектыр пхыращы. Форумым изэхэщакIохэр АР-м и Къэралыгъо Совет —Хасэр, АР-м IофшIэнымрэ социальнэ хэхъоныгъэмрэкIэ и Министерств, АР-м гъэсэны­гъэмрэ шIэныгъэмрэкIэ и Министерств, Адыгэ къэралыгъо университетыр, Мыекъопэ къэралыгъо технологическэ университетыр, обществэу «ШIэ­ныгъэм» и Адыгэ къутам, НыбжьыкIэхэм я Урысые Союз и Адыгэ шъолъыр организаций ары.

АР-м и ЛIышъхьэ ипресс-къулыкъу