Урысые физкультурнэ-спорт обществэу «Динамэр» зызэхащагъэр илъэси 100 зэрэхъурэм фэгъэхьыгъэ Iофтхьабзэ республикэ ста­дионым щыкIуагъ.

ХьакIэхэмрэ ащ хэлажьэ­хэ­рэмрэ шIуфэс къарихыгъ Адыге­им и ЛIышъхьэу КъумпIыл Му­рат. Республикэм и ЛIышъхьэ ипсалъэ къызэрэщыхигъэщы­гъэмкIэ, а организацие цIэрыIом гъогоу къыкIугъэр тихэ­гъэгу итарихъ епхыгъэ шъыпкъэу щыт. Обществэу «Динамэм» Урысыем спортымкIэ иамалхэм зау­шъомбгъуным, щыIэкIэ-псэу­кIэ тэрэзым цIыфхэр къыхэщэгъэнхэм, ныбжьыкIэхэр пIугъэнхэм ыкIи цIыфхэм япсауныгъэ гъэпы­тэгъэным иIахьышхо хишIы­хьагъ.

Зэрэхэгъэгу фэдэу динамовцэхэм Хэгъэгу зэошхом илъэ­хъан ти Родинэ ишъхьафитыныгъэ къэухъумэгъэным, зэоуж илъэсхэм хъызмэтыр зыпкъ игъэуцожьыгъэным яIахьышхо хашIыхьагъ. «Динамэм» ыпIу­гъабэхэр зэрэдунаеу цIэрыIо щыхъугъэх, лIэу­жыбэми ахэм шъхьэкIэфэшхо афашIы.

«НепэкIэ Урысыем ишъолъыр пстэуми Iоф ащызышIэрэ урысые общественнэ-къэралыгъо спорт организацие закъоу «Динамэр» щыт. Щынэгъончъэным ыкIи хэбзэухъумэным якъулы­къухэм яIофышIэхэм спортым ылъэныкъокIэ ухьазырыныгъэ дэгъу яIэным ар фэлажьэ, кIэлэцIыкIухэмрэ ныбжьыкIэхэмрэ жъугъэу зыхэлэжьэхэрэ спор­тым нахь зиушъомбгъуным, апшъэрэ гъэхъагъэхэр ашIынхэмкIэ спортым зышъхьамысыжьхэу зишIэныгъи, зикъулаиныгъи фэзыгъэIорышIэхэрэм ащ ифэмэ-бжьымэ ин атехьэ. Адыгэ Республикэм испортсмен анахь дэгъухэр «Динамэм» хэтых», — къыIуагъ Адыгеим и ЛIышъхьэ.

КъумпIыл Мурат къызэрэ­хигъэщыгъэмкIэ, спорт зэнэ­къокъу зэфэшъхьафхэу гъэхъагъэ хэлъэу республикэм щыкIохэрэм спортыр зисэнэхьат ыкIи ар зикIэсэ цIыфыбэ ахэлажьэ.

«Республикэм спортымкIэ хэбзэ шIагъоу иIэ хъугъэхэр гъэпытэгъэнхэмкIэ ыкIи ахэм нахь заушъомбгъунымкIэ, ныбжьыкIэхэр нахьыбэу спортым хэщэгъэнхэмкIэ ащ ишIогъэшхо къэкIо», — къыIуагъ респуб­ликэм и ЛIышъхьэ.

Джащ фэдэу мы Iофтхьабзэм къекIолIагъэхэм къафэгушIуа­гъэх Адыгэ Республикэм хэ-гъэгу кIоцI IофхэмкIэ иминистрэу Олег Безсмельницыныр, муниципальнэ образованиеу «Къалэу Мыекъуапэ» ипащэ игуадзэу Юрий Томчак.

Ащ нэужым медальхэу «Динамэм» ия 100-рэ илъэс», «Динамэм» иветеран» зыфи­Iохэрэр, обществэм ищытхъу ыкIи ирэзэныгъэ тхылъхэр афа­гъэшъошагъэх. КIэлэцIыкIу твор­чествэмкIэ зэнэкъокъоу «Динамо» глазами детей» зыфиIорэм щатекIуагъэхэм, Адыгэ рес­пуб­ликэ организациеу «Динамэм» испартакиадэу 2022-рэ илъэсым щыIагъэм щатекIуагъэхэми ахэр аратыгъэх.

Мы спорт мэфэкIым къулыкъу зэфэшъхьафхэм язэнэкъокъухэр щыкIуагъэх: Калашниковым иавтомат изэбгырыхын-зэхэлъхьажьын, зы IэмкIэ килограмм 24-рэ зионтэгъугъэ гирыр Iэтыгъэныр, кIапсэр зэпэкъудыи­гъэ­ныр, метрэ 1418-рэ къэ­чъы­гъэ­ныр, ащ нэмыкIэу футбол цIы­кIумкIэ зэнэкъокъухэр. Ахэр зэрэкIуагъэхэм фэгъэхьыгъэ тхыгъэ я 8-рэ нэкубгъом ит.