Джарэущтэу елъытэ илъэс 43-рэ зыныбжь Максим К-м. Ар илъэсрэ зэзэгъыныгъэ шIыкIэм тетэу къулыкъур ыхьынэу кIэт­хэгъэ къодыеу гущыIэгъу тыфэхъугъ ыкIи хэушъхьафыкIыгъэ дзэ операцием хэлэжьэнэу фаеу а унашъор зэришIыгъэр къытиIуагъ.

— Ушъхьагъу гъэнэфагъэ­хэм къапкъырыкIэу мы лъэ­бэкъур сшIыгъэ, — къеIуатэ Максим. — АпэрэмкIэ, т­ятэжъ пIашъэхэр илъэс пчъагъэкIэ узэкIэIэбэжьымэ пыеу зэбэныгъэхэм джы къытырагъэзэ­жьыгъэу къытпэуцух. Сиунагъо, сигупсэхэм ящыIэныгъэ, ярэхьатныгъэ, ти Хэгъэгу ищынэгъончъагъэ къэсыухъу­мэнхэм сыфэхьазыр. ЯтIо­нэрэмкIэ, синыбджэгъухэм азыныкъор хэушъхьафыкIыгъэ дзэ операцием щыIэх. Сэ зыщырэхьат чIыпIэм сыщыIэным сезэгъырэп, джы тиехэм сагоуцощт. Ахэм зы сатыр садыхэтэным сырэгу­шхо!

Максим къызэриIуагъэмкIэ, хэгъэгу кIоцI IофхэмкIэ къулыкъум хэтыгъ, Чэчэн заом хэлэжьагъ, пенсием щыI нахь мышIэми, тидзэкIолIхэм акIыгъуныр къыхихыгъ.

ЗэзэгъыныгъэкIэ къулы­къур зыхьыхэрэм ахъщэ ты­нэу къаратыхэрэм хэшIыкI фы­риIэмэ ащ теупчIыгъ. Мак­сим джыри зи къыратыгъэгоп. Ау иныбджэгъоу мэзэ пчъагъэ хъугъэу къулыкъур зыхьы­хэрэм къызэрэраIуагъэмкIэ, хэбзэгъэуцугъэм къызэрэди­лъытэрэм тетэу ахъщэ тынхэр зэкIэ мазэ къэс шIокI имыIэу къаратых ыкIи нэмыкI социальнэ фэгъэкIотэнэу яIэхэри къафагъэцакIэх. ТигущыIэгъу зыкIэтхэгъэ зэзэгъыныгъэр зиухыкIэ, ипенсие хэгъэхъон­хэр иIэщтых.

Максим янэ-ятэхэр иIэжьхэп, ау ишъхьэгъусэрэ икIэлэцIыкIуищрэ ежэщтых.

— ТидзэкIолIхэм ягъэхъагъэхэм сарэгушхо. ТекIоныгъэр къызэрэдэтхыщтым си­­цыхьэ телъ! — къыIуагъ Максим.