Республикэм икъэлэ шъхьаIэ щеджэрэ Ксения Атнишкинам литературэмкIэ Урысые олимпиадэу кIэлэеджакIохэм азыфагу щызэхащагъэм апэрэу текIоныгъэ къыщыдихыгъ.

Мэлылъфэгъум и 24-м къыщыублагъэу и 30-м нэс Москва хэкум ар щыкIуагъ. КIэух зэнэ­къокъухэм Урысыем ишъолъыр зэфэшъхьафхэм яеджэкIо 317-рэ ахэлэжьагъэх.

Я 19-рэ Мыекъопэ лицеим ия 11-рэ класс иеджакIоу Ксения Атнишкинам урысые олимпиадэм ишъолъыр ыкIи муниципальнэ уцугъохэм литературэмкIэ, инджы­лызыбзэмкIэ ыкIи урысыбзэмкIэ шIэныгъэ дэгъухэр къащигъэлъэгъуагъэх. Джащ фэдэу пшъэшъэ­жъыер гъэсэныгъэ гупчэу «Полярис-Адыгея» зыфиIорэм икружокэу «Классикэмрэ джырэ уахътэмрэ ялитературнэ зэдэгущыIэгъу» зыцIэм макIо, ишIэныгъэхэм ащыхегъахъо.