Адыгэ Республикэм щыпсэухэу лъытэныгъэ зыфэтшIыхэрэр! ТичIыпIэгъу лъапIэхэр! Унагъом и Мафэ фэшI тышъуфэгушIо!

Мы мафэм къегъэлъагъо цIыфым ищыIэныгъэкIи, обществэмкIи унагъом мэхьанэшхо зэриIэр. Об­ществэм хэлъ шэпхъэ дахэхэм япхыгъэ апэрэ де­сэхэр унагъор ары цIыфым ыIэ къызщихьэхэрэр. Унэ­гъо пытэ зэгурыIожьхэм лIэшIэгъубэ къызэпызычыгъэ цIыфыгъэ шэпхъэ дахэхэр арылъых, лъэпкъ хабзэхэр къащаухъумэх, зыщыпсэухэрэ лъэныкъоми, зэрэпсаоу хэгъэгуми янеущырэ мафэ лъапсэ фашIы.

Унагъом IэпыIэгъу етыгъэным, ныбжьыкIэхэм гъэсэныгъэ дэгъу ягъэгъотыгъэным, спортым пы­лъынхэм, ятворческэ амалхэм заушъомбгъуным, кIэлэцIыкIухэм япсауныгъэ къэухъумэгъэным, унагъом шIуагъэу къытырэм джыри нахь зыкъегъэIэтыгъэным Адыгеим лъэшэу анаIэ щатырагъэты. ЦIыфхэм ящыIакIэ нахьышIу шIыгъэным епхыгъэ Iофыгъохэр зэшIохыгъэнхэм, ащкIэ унэшъо гъэнэфагъэхэр штэгъэнхэм апае тфэлъэкIыщтыр зэкIэ тэшIэ ыкIи тапэкIи тшIэщт, унагъо пэпчъ щы­псэунымкIэ Адыгеир нахь Iэрыфэгъу, нахь гупсэфыпIэ зэрэхъущтым тыдэлэжьэщт.

Адыгеим щыпсэурэ пстэуми, анахьэу етIани кIэ­лэцIыкIухэр зыпIухэрэм е ны-тыхэр зышъхьарымытыжь кIэлэцIыкIухэр зыпIунэу зыштагъэхэм, сабыибэ зэрыс унагъохэм лъэшэу тызэрафэразэр мы мафэм къэтIонэу тыфай.

Ныбджэгъу лъапIэхэр, зэкIэми тыгу къыддеIэу тышъуфэлъаIо псауныгъэ пытэ, щыIэкIэшIу шъуи­Iэнэу, зэгурыIоныгъэ шъуазыфагу илъэу, шIоу щыIэр шъуапэкIэ къикIэу шъупсэунэу! Мафэ къэс гъэхъэгъакIэхэр шъушIыхэзэ шъуиунагъохэм язэте­гъэ­псыхьанкIэ, щыIэкIэ-псэукIэу ахэм арылъым зыкъе­гъэIэтыгъэнымкIэ шъуимурадхэр къыжъудэхъунхэу шъуфэтэIо!

Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат

Адыгэ Республикэм и Къэралыгъо Совет —Хасэм и Тхьаматэу Владимир Нарожнэр