ЩынэгъончъэнымкIэ федеральнэ къулыкъум и ГъэIорышIапIэу Адыгэ Республикэм щыIэм цIыфхэм макъэ арегъэIу, Урысыем и Уголовнэ кодекс къызэригъэнафэу, наркотик зыхэлъ, психикэм егоорэ веществохэр ыкIи ахэм яхьщырхэр хэбзэнчъэу къэзыгъэкIыхэрэм, IузыгъэкIыхэрэм, къезыгъэкIокIыхэрэм уголовнэ пшъэдэкIыжь арагъэхьын зэралъэкIыщтымкIэ. Опсауфэхэ ахэр хьапсым чIэсынхэу ащ къегъэнафэ.

«Наркотик зыхэлъ ыкIи цIы­фым ипсихикэ егоорэ ве­ществохэр, джащ фэдэу ахэм яхьщырхэр къэзыгъэ­кIыхэрэм» къикIырэр химическэ е нэмыкI веществохэр зыхэлъхэр къэбгъэкIынхэр ары. «Хэбзэнчъэу наркотик зы­хэлъ ыкIи психикэм егоорэ веществохэр, ахэм яхьщырхэр IузыгъэкIыхэрэр» къызэрэбгурыIощтыр къызэкIагъэкIожьынэу ыкIи къызэкIамыгъэкIожьынэу щыт шIыкIэхэр гъэфедэгъэнхэр (нэмыкI цIыфхэм япщэныр, яптыныр, чIыфэм ычIыпIэ къыуатыныр, товарым ыкIи щы­гъыным ачIыпIэ къэпхъожьыныр) ары.

ЦIыфым иахъщэ, имылъку къызIэкIигъахьэ шIоигъоу наркотик зыхэлъ ыкIи психикэм егоорэ веществохэр, ахэм яхьщырхэр IузыгъэкIыхэрэм гъэпцIагъэ зыхэлъ бзэджэшIагъэ зэрахьагъэу плъытэн плъэкIыщт. Мыщ фэдэ веществохэр хэбзэнчъэу бэу къызIэкIигъэхьаным тенэцIыхьаныр ащ къекIы.

«Наркотик зыхэлъ ыкIи психикэм егоорэ веществохэр, ахэм яхьщырхэр хэбзэнчъэу къезыгъэкIокIыхэрэр» къызэрэбгурыIощтыр почтэмкIэ, багажымкIэ е цIыфым ышIэзэ ежьыр хэмытэу гъэхьыгъэныр ары.

Уголовнэ Iофым зыхэплъэхэ нэуж бзэджэшIагъэр зэфашIы­жьыгъэу алъытэщт. ГущыIэм пае, хэбзэнчъэу наркотик зы­хэлъ ыкIи психикэм егоорэ веществохэр, ахэм яхьщырхэр къыгъэкIын, IуигъэкIын ыкIи къыригъэкIокIын мурад зиIэм ар тапэкIэ зэрищэщтым пылъэу, ау ежьым емылъытыгъэу мы зигугъу къэтшIыгъэ веществохэр щэфакIом IэкIэмыхьагъэ хъумэ, уголовнэ пшъэдэкIыжь рагъэ­хьыщт.

Наркотикхэм япхыгъэ бзэджэшIагъэ зезыхьагъэм ыныбжь илъэс 16 хъугъэмэ, пшъэдэкIыжь рагъэхьыщт.

БзэджэшIагъэр зыщызэрахьагъэр, зэрэзэрахьагъэр зэрэзэтефыгъэхэр: а) следственнэ изоляторым, хьапсым, административнэ унэм, гъэсэныгъэ организациехэм, спорт псэуа­лъэхэм, мэшIоку, ошъогу, хы ыкIи псы транспортым, дзэ частым, общественнэ транспортым е псэупIэм, б) къэбар жъугъэм иамалхэр е интернетыр къызфагъэфедагъэмэ.

БзэджэшIагъэ зезыхьагъэхэр лъэныкъо зэфэшъхьафхэмкIэ зэтефыжьыгъэх: пэшIорыгъэ­шъэу зэдэзыштэгъэ купыр, зэ­хэщэкIо купыр, иIэнатIэ къыз­фэзыгъэфедэгъэ цIыфыр, нэмыкIхэри.

ЩынэгъончъэнымкIэ федеральнэ къулыкъум и ГъэIорышIапIэу Адыгэ Республикэм щыIэм ипресс-къулыкъу.