Ошъогу-космическэ кIуачIэхэм яглавнокомандующэу генералэу Сергей Суровикиным дзэ еджэпIэ гупчэ (ВУЦ) Мыекъопэ къэралыгъо технологическэ университетым къыщызэIухыгъэнымкIэ Iофтхьабзэу зэрахьащтхэр ыухэсыгъэх. Гупчэр къызэрэзэIуахыщтым ехьылIэгъэ унашъор АР-м и ЛIышъхьэу КъумпIыл Мурат Урысые Федерацием зыкъэухъумэжьынымкIэ иэкспертхэм гъэтхапэм адыриIэгъэ зэIукIэм щаштагъ.

УФ-м иошъогу-космическэ кIуачIэхэм апае сержантхэмрэ рядовойхэмрэ мы гупчэм къыщагъэхьазырыщтых. Ар къы­заухыкIэ, УФ-м и УIэшыгъэ КIуачIэхэм язапас хагъэхьащтых.

Мы гупчэм пае Шэуджэным иурам тет унэу N 356-р къызфагъэфедэщт. Автомобильхэм техникэмкIэ язытет зыуплъэкIурэ станциеу, автошколэу мы чIыпIэм щыIэхэр курсантхэм ягъэхьазырынкIэ къашъхьапэщтых.

— Гупчэм иэскизнэ проект къагъэ­хьазырыгъах. Мы охътэ благъэм унэм игъэцэкIэжьынкIэ IофшIэнхэр аублэщтых. Университетым игъэцэкIэ­жьынкIэ, ищыкIэгъэ оборудованиер къызIэкIэгъэхьэгъэнымкIэ джыдэдэм чанэу Iоф тэшIэ, — къыIуагъ Мые­къопэ къэралыгъо технологическэ университетым ипащэу Къуижъ Саидэ.

Урысые Федерацием и Президент иунашъокIэ 2023-рэ илъэсым ыкIэм ехъулIэу мыщ фэдэ гупчэхэр УФ-м ишъолъыр пстэуми къащызэIуахыщтых. 2024-рэ илъэсым щылэ мазэм и 1-м къыщегъэжьагъэу апэу рагъэджэщт сержантхэр а 1-рэ курсым ис студентхэм къахахыщтых. 2024-рэ илъэсым Iоныгъом и 1-м мыщ фэдэ гупчэм студентхэр щеджэхэу рагъэжьэщт.