ЖъоныгъуакIэм и 12-р — медицинэ сестрам и Дунэе маф. Мы мэфэкIым ылъапсэ чыжьэу къыщежьэ, ау жъугъэу къэралыгъо пчъагъэхэм ащыха­гъэ­унэфыкIыныр 1974-рэ илъэсым аублагъ.

Урысыем 1993-рэ илъэсым къыщегъэжьагъэу щагъэмэфэ­кIы. Медицинэ сестра сэнэхьатым епхыгъэ мэфэкIым ипэгъо­кIэу тыIукIагъ адэбз узхэм зы­щяIэзэхэрэ Адыгэ республикэ клиническэ диспансерым иIофышIэу Болэкъо Фатимэ.

ТигущыIэгъу 1956-рэ илъэсым къыщыхъугъ Блащэпсынэ ыкIи щеджагъ. Гурыт еджапIэм ыуж Мыекъопэ медицинэ училищым чIахьи 1976-рэ илъэсым къыухыгъ. А илъэс дэдэм IофшIэныр адэбз узхэм зыщяIэзэхэрэ диспансерым щыригъэжьагъ. Фатимэ унагъо ихьи сабыйхэр къызыпэфэхэм, мыщ IукIыжьынэу хъугъэ. Ау медицинэм еп­хыгъэу, кIэлэцIыкIу зыгъэпсэфыпIэу «Солнышко» зыфиIорэм Iоф щишIагъ. ИкIалэхэм зыкъы­заIэтым, 2007-рэ илъэсым дис­пансерым къыгъэзэжьыгъ. Врач гематологым медсестрау кIы­гъоу Iоф зишIэрэр илъэс 14 хъугъэ, медицинэм зыхэтыр пстэумкIи илъэс 47-рэ фэдиз.

— СицIыкIугъом къыщегъэ­жьагъэу медицинэм епхыгъэ сэнэхьатыр къызэрэхэсхыщтым сицыхьэ телъыгъ, — къеIуатэ Фатимэ. — НэмыкI лъэныкъо зызгъэзэнэу сыфэягъэп ыкIи джы къызнэсыгъэми ащ сырыкIэгъожьырэп. УгукIэ къыхэпхыгъэ сэнэхьатым Iоф рыпшIэныр насыпыгъ ыкIи сыд фэдизэу къин плъэгъуми, упшъырэп.

Болэкъо Фатимэ медицинэ сэнэхьатыр къыхихыным тез­гъэгушхуагъэхэм ащыщ ятэшэу Сэмэгу Тыркубый. Кощхьэблэ районым щызэлъашIэрэ врачэу ар щытыгъ. ТигущыIэгъу къызэрэхигъэщыгъэмкIэ, зыхэхьэгъэ лIакъоми врачхэр бэу хэтых. Ахэр хирургэу Болэкъо Мы­хьа­мэт, кардиологэу Болэкъо Ритэ, ежь инысэу (икIалэ ишъхьа­­гъус) Фатимэ терапевт.

Илъэс 47-рэ фэдиз хъугъэу Iоф зыщишIэрэм къыкIоцI ипшъэ­рылъхэр зэрифэшъуашэу зэригъэцэкIэщтхэм ыуж ит. Поликлиникэм Iут медсестрам иIоф­шIэнкIэ анахь шъхьаIэхэр —врачыр къызычIахьэкIэ сыма­джэм ытыгъэ анализхэр, нэмыкI уплъэкIунэу ышIыгъэхэр зэкIэ зыдэт карточкэр ыпашъхьэ рилъхьаныр ары.

— Врачымрэ сымаджэмрэ азыфагу медсестрар ит, — еIо Фатимэ. — Врачыр матхэфэ, медсестрам нэгушIоу гущыIэ фабэхэр сымаджэм зыпигъо­хыкIэ, хэпшIыкIэу ыгу къыдещае. Тхьапэ тхынэу врачыр зыхэтыр бэдэд, ышъхьэ къыIэтын мы­хъоу бэрэ къыхэкIы. Арышъ, амал зэриIэкIэ, тэ медсестрахэм, врач­хэм IэпыIэгъу тафэхъун фае. ЕтIани, тэ тисымэджэщкIэ тызы­фэгъэзэгъэ сымаджэхэр адрэ­хэм афэдэхэп. Адэбз узыр зиIэ цIыфыр дэим егупшысэ, ыгу лъэшэу мэкIоды. Арышъ, мыщ ипсихологие тылъэплъэ. Апэрэу къакIохэрэр ары анахь тынаIэ зытедгъэтыхэрэр. Ахэм гущы­Iэгъу тафэхъу, зэрэзекIощтхэр агурэтэгъаIо, игъорыгъозэ нахь къэIасэх, ищыкIэгъэ Iэзэгъур ятэгъэгъоты.

Болэкъо Фатимэ къызэриIуа­гъэмкIэ, ныбжь зэфэшъхьаф зиIэхэр мы кабинетым къекIуа­лIэх. Мыхэр нахьыбэу зыгъэгумэкIыхэрэр лъым адэбз узыр хэлъэу зэрагъэунэфыгъэр ары.

— Диспансерым игемотологическэ Гупчэ (ипащэр Лэгъуф Зарин) иучет 2022-рэ илъэсым нэбгырэ 782-рэ хэтыгъ. Сэ сызигъусэ врачхэу Iоф зыдасшIэхэрэр Джарымэкъо Анастасиерэ Ева Орионовамрэ. Мы кабинетэу сызычIэтым илъэсэу икIыгъэм нэбгырэ мини 7 фэдиз къеолIагъ. Шапхъэу щы­Iэм къызэрэдилъытэрэмкIэ, врачыр зы мафэм нэбгырэ 27-рэ зэплъынэу щытыр, ау нахьыбэ къакIоуи къыхэкIы. Сымаджэу къытэолIэгъэ пстэуми ящыкIэгъэ документхэр, тхьапэхэр къафисэтхыкIых. Сымаджэхэм афэгъэхьыгъэ къэбарыр зэкIэ электроннэ шъуашэм зэритлъхьэрэм дакIоу, тхьапэм тесэтхэх. Сыда пIомэ улъыхъункIэ нахь Iэрыфэгъоу къыхэкIы, — еIо медсестрам.

ТигущыIэгъу ипшъэрылъхэм ахэтэу кабинетым исанитарнэ-­эпидемиологическэ зытет пхъа­шэу лъэплъэ. Охътэ гъэнэ­фа­гъэм тетэу зэIуехы, кварце­вание ешIы.

Фатимэ пшъэдэкIыжь ин хэлъэу иIофшIэн зэригъэцакIэрэр, епIожьын имыщыкIагъэу ар зэригъэпсырэр, сымаджэхэм зэгурыIоныгъэ адыриIэу екIо­лIакIэ къызэрафигъотырэр иIоф­шIэгъухэм къыхагъэщы.

Адэбз узхэм зыщяIазэхэрэ Адыгэ республикэ диспансерым иврач шъхьаIэу АкIэгъу Заур Фатимэ ылъэныкъокIэ гущыIэ дэхабэ къыIуагъ:

— Илъэс пчъагъэ хъугъэу тиIэзапIэ щытхъу хэлъэу Iоф щызышIэхэрэм Болэкъо Фатимэ ащыщ. Исэнэхьат фэшъыпкъ, ар шIу зэрилъэгъурэм ишыхьат пшъэдэкIыжь ин хэлъэу иIоф­шIэн къызэрекIуалIэрэр. ГукIэгъуныгъэр, шъхьэкIэфэныгъэр, лъытэныгъэр ыпэ ригъэшъыхэзэ сымаджэхэм адэзекIо. НыбжьыкIэу IэзапIэм къыIухьэхэ- рэм щысэтехыпIэу яI, иIэпэIэсэныгъэкIэ ахэм адэгуащэ.

Врач-гематологэу Джары­мэкъо Анастасие Фатимэ пэблэгъэ шъыпкъэ зэрэхъугъэр къыхигъэщыгъ.

— Илъэситфым ехъоу Iоф зыщызэдатшIэрэм къыкIоцI Фатимэрэ сэрырэ гупсэ тызэфэ­хъугъ. Ар пшъэдэкIыжь зыхэлъ ыкIи зиIоф хэшIыкI фызиIэ цIыф. «Мыр ыгъэцэкIагъэп, мыр щыгъупшагъ, мыр къыштагъэп, мыщ риIуагъэп» зыфэпIощтхэр ащ епэсыгъэхэп. Анахьэу къыхэзгъэщыхэрэм ащыщ къытэолIэ- рэ сымаджэхэм Фатимэ хэу­шъхьафыкIыгъэ екIолIакIэ къызэрафигъотырэр, ар дэгъоу къызэрэдэхъурэр. ЩымыIэу ма­фэ горэ къызщыхэкIырэм, IофшIэгъу мафэр къин дэдэу къысщэхъу, — еIо Анастасие Николай ыпхъум.

ТизэдэгущыIэгъу икIэух Бо­лэкъо Фатимэ мэфэкIымкIэ иIоф­шIэгъухэм къафэгушIуагъ. ЯIофшIэн гухахъо хагъуатэу, гъэхъагъэхэр ашIыхэу ыпэкIэ лъыкIотэнхэу афэлъэIуагъ.

Iэшъынэ Сусан.