Адыгэ Республикэм и ЛIышъхьэу КъумпIыл Мурат кIэтхэжьыгъ АР-м ныбжьыкIэхэм яIофхэмкIэ и Коми­тет итхьаматэ IэнатIэ Максим Галушкиныр Iугъэхьэгъэным фэгъэ­хьыгъэ Указым.

Непэ КъумпIыл Мурат ащ зыIокIэм республикэм ихэбзэ къулыкъухэм яподразделе­ниякIэу зэхащагъэм иIофшIэн епхыгъэ пшъэрылъхэр къыфигъэнэфагъэх.

Мы зэдэгущыIэгъум хэлэжьагъэх АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженецрэ ащ игуадзэу Къонэ Зауррэ.

Адыгеим и ЛIышъхьэ агу къыгъэкIыжьыгъ ыпэкIэ къэралыгъо ныбжьыкIэ политикэр пхырыщыгъэнымкIэ Iофыгъоу къэуцухэрэр АР-м гъэсэны­гъэмрэ шIэныгъэмрэкIэ и Министерствэ зэрэзэшIуихыщты­гъэхэр. Ау а лъэныкъомкIэ Iофэу агъэцакIэрэм нахь шIогъэ ин къегъэтыгъэным пае хабзэм икъулыкъоу шъхьафэу Iоф зы­шIэщтыр зэхащагъ.

«НыбжьыкIэхэм IэпыIэгъу ятыгъэным, ягукъэкIхэм ыкIи ахэр кIэщакIо зыфэхъухэрэм нахь зягъэушъомбгъугъэным лъэшэу тынаIэ тетэгъэты, а лъэныкъор анахь мэхьанэ зэттыхэрэм ащыщ. УФ-м и Президентэу Владимир Путиным Урысые Федерацием ныбжьыкIэ политикэмкIэ и Стратегие пхырыщыгъэным пае къыгъэуцугъэ пшъэрылъхэр гъэцэкIэ­гъэнхэмкIэ Iофышхо къытпыщылъ. Непэ хэгъэгум социальнэ, федеральнэ программэ зэфэшъхьафхэр иIэх ныбжьыкIэ пэпчъ зыкъызэIуихын ылъэ­кIыным иамал къатэу. Тэ зэ­кIэхэми тиIофшIэнкIэ тынаIэ зы­тедгъэтын фаер а лъэны­къомкIэ къэралыгъо IэпыIэгъум къыдилъытэрэ шIыкIэ-амалхэу щыIэхэр нахь икъоу гъэфедагъэ хъунхэр, ныбжьыкIэхэм щыIакIэр нахьышIу, нахь гъэшIэгъон хъуным телъытэгъэ Iофтхьабзэу къырахьыжьэхэрэр щыIэныгъэм щыпхыры­щыгъэнхэмкIэ тадеIэныр», — къыIуагъ КъумпIыл Мурат.

НыбжьыкIэ движениехэм, общественнэ орга­низациехэм хэхъоныгъэ ашIынымкIэ, шIушIэ, пат­риотическэ ыкIи социальнэ мэхьанэ зиIэ проектхэр пхырыщыгъэнхэмкIэ IэпыIэгъоу аратырэм джыри нахь хагъэхъонэу Адыгеим и ЛIышъхьэ пшъэрылъ афишIыгъ.

Максим Галушкиныр къызэгущыIэм къыхигъэщыгъ пшъэрылъэу къафагъэнэфагъэхэр зэшIохыгъэ хъунхэм ыкIуачIэ зэрэрихьылIэщтыр, анахь мэхьанэшхо зэтыгъэн фэе лъэныкъохэр иIофшIэнкIэ къызэригъэнэфэщтхэр, джащ фэдэу анаIэ зытырагъэтыпхъэхэр къызэрэдилъытэщтхэр.

Адыгэ Республикэм ныбжьыкIэхэм яIофхэмкIэ и Комитет кIэу хэтыщтхэм пшъэрылъхэу къафагъэуцугъэхэр зэшIуахын, гу­пшысэ гъэшIэгъонхэр ыкIи дэгъухэр пхыращынхэ, ныбжьыкIэхэр зэкъуагъэуцон зэралъэкIыщтым проект зэфэшъхьафхэр щы­Iэныгъэм пхыращынхэм анаIэ зэрэтырагъэтыщтым ицыхьэ зэрэтелъыр КъумпIыл Мурат къыIуагъ.

Галушкин Максим Сергей ыкъор 1986-рэ илъэсым мэлылъфэгъум и 26-м къалэу Мыекъуапэ къыщыхъугъ. 2008-рэ илъэ­сым сэнэхьатэу «юрис­пруденциемкIэ» Адыгэ къэралыгъо университетыр къыухыгъ. Еджэныр къызэриухыгъэм лъыпытэу Урысые Федерацием и УIэшыгъэ КIуачIэхэм зэзэгъыныгъэ шIыкIэм тетэу къулыкъур ащихьыгъ. Социальнэ IэпыIэгъум фытегъэпсыхьэгъэ организациехэм юрисконсультэу IофшIэныр ащыри­гъэжьагъ. 2015-рэ илъэсым Адыгеим IофшIэнымрэ социальнэ хэхъоныгъэмрэкIэ и Министерствэ Iоф щишIэнэу аштэгъагъ. АР-м ныбжьыкIэхэм яIофхэмкIэ и Комитет итхьамэтэ IэнатIэ Iуагъэ­хьафэ нэс кIэлэцIыкIухэу зылъыплъэн зимыIэхэм яIофхэмкIэ къалэу Мые­къуапэ иадминистрацие и ГъэIорышIапIэ пэщэныгъэ дызэрихьагъ.

Адыгэ Республикэм и ЛIышъхьэ ипресс-къулыкъу

Сурэтхэр: А. Гусев.