ХэушъхьафыкIыгъэ дзэ операциеу Украинэм щыкIорэм Адыгеим имобили­зованнэ дзэкIолIхэр хэлажьэх. Андырхъое Хъусен ыцIэ зыхьырэ дивизионым идзэкъулыкъушIэхэм япшъэрылъхэр щытхъу хэлъэу зэрагъэцакIэрэр зы­хэхьэхэрэ командованием ипащэхэм къыхагъэщы.

Ащ ишыхьатэу дзэкIолIхэм ыкIи офицерхэм ащыщыбэм къэралыгъо тын лъа­пIэхэр мы охътэ благъэ­хэм къаратынхэмкIэ ятхылъхэр афагъэхьазырыгъэх.

Джащ фэдэу дивизионым хэт дзэкъулыкъушIэ­хэр ТекIоныгъэм и Мафэ ипэгъокIэу Андырхъое Хъусен аужырэу зыщызэогъэ чIыпIэу ыпсэ зыщи­гъэтIылъыгъэм щыIагъэх, Советскэ Союзым и ЛIы­хъужъ ишIэжь агъэлъэ­пIагъ. Хъусен Борэжъ ыкъор зыщагъэтIылъыгъэ къош къэхалъэм изытет къулыкъушIэхэм агу римы­хьэу, ежь аугъоигъэ мылъкумкIэ зыпкъ рагъэуцожьыгъ, ащ итеплъэ зэрифэшъуашэм тетэу гур къыдищаеу зэтырагъэпсыхьажьыгъ.

Андырхъое Хъусен ыцIэ зыхьырэ дивизионым идзэ­къулыкъушIэхэу хэушъхьафыкIыгъэ дзэ операцием хэлажьэхэрэр мемориалым тетхэу республикэм щы­псэухэрэм закъыфагъэ­загъ: «Адыгэ Республикэм щыпсэухэу лъытэныгъэ зыфэтшIыхэрэр! Советскэ Союзым и ЛIыхъужъэу Андырхъое Хъусен Борэжъ ыкъом ишIэжь дгъэлъэпIэнэу мы чIыпIэм тыкъы­щызэрэугъоигъ.

ЛIыхъу­жъым ыцIэ тидивизион зэрихьырэм тырэгушхо.

Мы чIыпIэр ары 1941-рэ илъэсым шэкIогъум и 8-м ащ иаужырэ зэуапIэу хъу­гъэр ыкIи тикъэралыгъокIэ мэхьанэшхо зиIэ гущыIэхэр къызщиIуагъэхэр:«УРЫС­ХЭМ ЗЫКЪАТЫРЭП!»

ЛIыхъужъхэу Хэгъэгу зэ­о­шхом илъэхъан псэемыблэжьыныгъэ зэрахьэзэ ТекIоныгъэ къыдэзыхы­гъэхэм тырялIэуж.

Шъхьафитыныгъэу тя­тэжъхэм къытфыдахыгъэр зыфэмылъэгъухэрэ нацистхэм илъэс 80 фэдиз те­шIэжьыгъэу мыщ фэдэ зе­кIуакIэ къахэфэныр зы­ми ышIэныеп.

Тятэжъхэм яIоф пытыдзэжьыным иуахътэ непэ къэсыгъ, ар тэ дгъэцэ­кIэщт, ТекIоныгъэр къы­дэтхыщт!».

Хэгъэгур псэемыблэ­жьэу къэзыухъумэрэ тидзэ­кIолIхэм, нахьыжъхэм яхэ­бзэ шIагъохэр лъызыгъэ­кIуатэхэрэм щытхъур адэжь ыкIи ахэм тарэгушхо!

Iэшъынэ Сусан.