Top.Mail.Ru

Пшъэрылъ инхэр зыфашIыжьых

Image description

ТекIоныгъэм и Мафэ ихэгъэунэфыкIын епхыгъэу республикэ общественнэ движениеу «Адыгэ Хасэр», Адыгеим иобществэу «Шыу Хасэр» кIэщакIо зыфэхъугъэхэ шы спортымкIэ мэфэкI зэхахьэу «Адыгэ шыу джэгу — Тэхъу­тэмыкъуай 2023» зыфиIорэр зэхащэ.

Iофтхьабзэр неущ, жъоныгъуакIэм и 13-м, Тэхъу­тэмыкъуае ишыгъэчъапIэу «Щагъдыим» щыкIощт.

Обществэу «Шыу Ха­сэм» итхьаматэу Тхьапшъэ­къо Альберт тызэрэщигъэ­гъозагъэмкIэ, «Адыгэ шыу джэгу» зыфиIорэ зэнэкъо­къур мыгъэ ятIонэрэу Тэхъутэмыкъуае щыкIощт. ЗэхэщакIохэм пшъэрылъ инхэр зыфашIыжьых. Темыр Кавказым, Къыблэ шъолъырым, Адыгэ Респуб­ликэм шы спортым зыщаушъомбгъуным, лъэпкъ шэн-хабзэхэр къэухъумэгъэнхэм, лъэпкъ шIэжьым зыкъырагъэIэтызэ, ныбжьыкIэхэм япатриотическэ пIуныгъэ лъэхъаным ди­штэу зэхэщэгъэным, лъэпкъ­хэм ыкIи лIэужхэм язэфыщытыкIэхэр гъэпы­тэ­гъэнхэм зэхэщакIохэр пы­лъыщтых.

— Мы Iофтхьабзэр Хэгъэгу зэошхом ТекIоны­гъэр къызыщыдахыгъэм ихэгъэу­нэфыкIын епхыгъ. Тятэжъхэу, тилIыхъужъхэу зэуагъэхэр тыгу къэтэгъэкIы­жьых, яшIэжь тэгъэлъапIэ. Шым мэхьанэшхо ритэу адыгэ лъэпкъыр къырэкIо. Ижъырэ адыгэ шэн-ха­бзэхэр тиныбжьыкIэхэм ядгъэшIэнхэм ар фэIоры­шIэщт. Шыу джэгу зэнэкъо­къур едзыгъо зэфэшъхьафхэмкIэ зэтеутыгъэщт: шыухэр къызэдэчъэщтых, ащ нэмыкIэу быракъ зехьанымкIэ зэнэкъокъущтых, щабзэмкIэ ощтых, шым уанэр теплъхьаным, зэ­Iу­кIэгъум фэбгъэхьазырыным, нэмыкIхэм шыухэм яIэпэIэсэныгъэ къащагъэлъэгъощт. Джащ фэдэу Iэпшъэ бэнэнымкIэ зэнэ­къокъущтых, — къыIуагъ Альберт.

Шыу Хасэм итхьаматэ къызэриIуагъэмкIэ, гъэре­кIо фэдэу зэнэкъокъум хэлэжьэщтых Адыгеим ыкIи Къэрэщэе-Щэрджэс Рес­пуб­ликэм къарыкIыщт купхэр. Шыгъачъэм имыза­къоу, ахэр нэмыкI зэнэ­къокъухэми ахэлэжьэнхэ амал яIэщт. ТекIоныгъэ къыдэзыхыгъэхэм медальхэр, кубокыр афагъэшъошэщтых.

ОсэшIхэм ахагъэхьащтых республикэ общест­веннэ движениеу «Адыгэ Хасэм» хэт нахьыжъхэм ащыщхэр, Къэрэщэе­-Щэр­джэсым илIыкIо ыкIи Адыге­им иобществэу «Шыу Хасэм» хэтхэр.

Илъэс 18-м къыщегъэ­жьагъэу 50-м нэс зыныбжь­хэу шIоигъоныгъэ зиIэхэр зэнэкъокъум хэлэжьэнхэ алъэкIыщт. Неущ, жъоныгъуакIэм и 13-м, сыхьатыр 10-рэ такъикъ 30-м ар рагъэжьэщт.

КIАРЭ Фатим.