Урысые зэнэкъокъоу «НыдэлъфыбзэмкIэ ыкIи литературэмкIэ кIэлэегъэджэ анахь дэгъу» зыфиIорэм изэфэхьысыжьхэр мы мафэхэм къэнэфагъэх. «Егъэджэн программэхэр ныдэлъфыбзэкIэ зыгъэцэкIэрэ кIэлэпIу анахь дэгъу» зыфиIорэ лъэныкъор мы илъэсым апэрэу къыхагъэхьагъ, ащ къыхэкIэу кIэлэпIухэри зэнэкъокъугъэх. Муниципальнэ уцугъом анахь дэгъоу зыкъыщызгъэлъэгъогъэ кIэлэегъэджи 7 ыкIи кIэлэпIуи 7 зэнэкъокъум хэлэжьагъ. Адыгабзэм изэгъэшIэнкIэ шIэныгъэу аIэкIэлъхэмкIэ ахэм заушэтыгъ. Сэнаущыгъэ ин зыхэлъ кIэлэ­егъаджэхэр ыкIи кIэлэпIухэр къыхэгъэщыгъэнхэр, ахэм яIоф­шIакIэ нэмыкIхэм щысэ афэ­хъуныр ары пшъэрылъ шъхьаIэу зэхэщакIохэм зыфагъэуцужьырэр. Зэфэхьысыжьхэм къызэра­гъэлъэгъуагъэмкIэ, Адыгэ рес­публикэ гимназием адыгабзэм­рэ адыгэ литературэмрэкIэ икIэ­лэегъаджэу Мыгу Анжелэ апэрэ чIыпIэр къыдихыгъ ыкIи «НыдэлъфыбзэмкIэ ыкIи литературэмкIэ кIэлэегъэджэ анахь дэгъу» зыфиIорэ цIэр къыфа­гъэшъошагъ. Кощхьэблэ рай­онымкIэ кIэлэцIыкIу IыгъыпIэу N 1-м икIэлэпIоу ШъэоцIыкIу ФатIимэт «Егъэджэн программэхэр ныдэлъфыбзэкIэ зыгъэцэкIэрэ кIэлэпIу анахь дэгъу» зыфиIорэр къылэжьыгъ. ХагъэунэфыкIырэ ятIонэрэ чIыпIэр къыдахыгъ Кощхьэблэ районымкIэ гурыт еджапIэу N 2-м адыгабзэр ыкIи адыгэ литературэр щязыгъэхьырэ Бжьэц Фатимэ, Мыекъуапэ дэт кIэлэцIыкIу IыгъыпIэу N 28-м икIэлэпIоу СтIашъу Аминэт. Ящэнэрэ чIыпIэр къафагъэшъошагъ Мыекъуапэ дэт гимназиеу N 5-м адыгабзэмкIэ ыкIи адыгэ литературэмкIэ икIэлэ­егъаджэу БрантI Мирэрэ Адыгэ­къалэ дэт кIэлэцIыкIу IыгъыпIэу N 4-м икIэлэпIоу Гъонэжьыкъо Саидэрэ. ТекIоныгъэ ыкIи ха­гъэунэфыкIырэ чIыпIэхэр къыдэзыхыгъэхэм дипломхэмрэ ахъщэ шIу­хьафтынхэмрэ афагъэ­шъошэщтых. Мыгу Анжелэрэ ШъэоцIыкIу ФатIимэтрэ Къэ­рэщэе-Щэрджэс Респуб­ликэм щыкIощт Урысые зэнэкъокъум хэлэжьэщтых. Мыгу Анжелэ илъэс 26-рэ хъугъэу ыгукIи, ыпсэкIи фэщагъэу адыга­бзэр кIэлэеджэкIо цIыкIухэм арегъашIэ. КIэлэегъэджэ пэрытым адыгабзэр аригъэшIэным пае хэушъхьа­фыкIыгъэ программэкIэ арегъашIэ. ДжэгукIэ шIыкIэм тетэу еджэгъу сыхьатхэр зэхещэх, IурыIупчъэхэр бэрэ егъэфедэх. Джащ фэдэу проектнэ IофшIэнхэр зэхещэх, гущыIэхэр сурэт­хэмкIэ зэхарегъэгъэуцох, ребусхэр арегъэшIых. Анжелэ гъэхъэгъэшIу­хэр иIофшIэнкIэ ешIых. «АдыгабзэмкIэ анахь кIэлэегъэджэ дэгъу» зыфиIорэ зэнэкъокъум 2020-рэ илъэсым хэлэжьэгъагъ ыкIи ха­гъэунэфыкIырэ чIыпIэр къыщыдихыгъагъ. Джащ фэдэу илъэс заулэкIэ узэ­кIэIэбэжьымэ, «Видео­урок анахь дэгъу» зы­цIэгъэ зэнэкъокъум апэрэ чIыпIэр къыщыфагъэ­шъошэгъагъ. ГъэрекIо Темыр-Кавказ федеральнэ шъолъырымкIэ ны­дэлъфыбзэр языгъэхьырэ кIэлэегъаджэхэм азыфагу щызэхащэгъэгъэ я XII-рэ зэнэкъокъум иаужырэ уцугъоу Черкесскэ щыкIуагъэм хэлэ­жьагъ. «Тызэфэшъхьаф, ау тызэфэд» зыфиIорэ лъэныкъом я 2-рэ чIыпIэр къыщыдихыгъ. Ащ нэмыкIэу, конференциехэм ренэу ар ахэлажьэ, «зэ­Iухыгъэ урокхэр», мастер-классхэр къетых.