ЖъоныгъуакIэм и 9-м, Урысыем ишъо­лъыр пстэуми афэдэу, Хэгъэгу зэошхом ТекIоныгъэр къызщыдахыгъэр илъэс 78-рэ зэрэхъу­рэр Адыгеим щыхагъэунэфыкIыгъ.

Ащ фэгъэхьыгъэ Iоф­тхьэбзэ зэфэшъхьафыбэ республикэм икъэлэ шъхьа­Iэу Мыекъуапэ щыкIуагъ. Гупчэ саугъэт зэхэтым къэгъагъэхэр зэрэкIэралъхьагъэмкIэ ахэр рагъэжьагъэх.

Iофтхьабзэм хэлэжьа­гъэх АР-м и ЛIышъхьэу КъумпIыл Мурат, АР-м и Къэралыгъо Совет — Ха­сэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, министрэхэм я Кабинет хэтхэр, къулыкъу зэфэшъхьафхэм, общест­веннэ организа­циехэм ялIыкIохэр, нэ­мыкIхэр.

Пстэумэ апэу респуб­ликэм ипащэ мэфэкIымкIэ къэзэрэугъоигъэхэм къа­фэгушIуагъ. ТекIоныгъэм и Мафэ тихэгъэгу ис унагъо пэпчъкIэ мэхьэнэ ин зиIэ мэфэкIэу зэрэ­щытыр ЛIышъхьэм къыхигъэщыгъ.

— Нацизмэм ныбжьи къымыгъэзэжьыным фэшI а илъэс хъугъэ-шIагъэхэр тщымыгъупшэнхэу тятэ­жъхэу, тятэхэу Хэгъэгу зэ­о­шхом ТекIоныгъэр къы­­щыдэзыхыгъэхэм къыт­фагъэпытагъ. Ау, гухэкIми, тиблэкIыгъэ зыщыгъупшэ­хэрэр щыIэх, — къыIуагъ КъумпIыл Мурат. — Джыри мары тихэгъэгу ищы­нэгъончъагъэ, ишъхьафитныгъэ къыухъумэн фаеу хъугъэ. Урысыем идзэ­кIолIхэм лIыблэнагъэ ахэ­лъэу я Хэгъэгу къаухъумэ. Тарэгушхо тикIалэхэу, Адыгеим икIыгъэ дзэ­кIолIхэу, ежьхэм яшIои­гъоныгъэкIэ кIуагъэхэу хэушъхьафыкIыгъэ дзэ операцием хэлажьэхэрэм, щытхъу пылъэу зипшъэ­рылъхэр зыгъэцакIэхэрэм. ЕгъашIэм тыгу илъыщтых Хэгъэгу зэошхом хэлэжьагъэхэу, я Родинэ ишъхьафитныгъэ пае зыпсэ зытыгъэ тилIыхъужъхэр.

Хэгъэгу зэошхом хэ­кIодагъэхэм зы такъикърэ афэшъыгъуагъэх. Ащ ыуж дзэ ЕгъэджэкIо авиабазэм идзэкIолIхэр, УФ-м хэгъэгу кIоцI IофхэмкIэ ыкIи ошIэ-дэмышIэ IофхэмкIэ иминистерствэхэм, хьыкум приставхэм, бзэджэшIагъэ зезыхьагъэхэм пшъэдэ­кIыжь ягъэхьыгъэнымкIэ Федеральнэ къулыкъухэм якъутамэхэу АР-м щы­Iэхэм къулыкъу ащызы­хьыхэрэр, юнармейцэхэр сатырэу чIыпIэм къырыкIуагъэх. Нэужым зэхахьэм къе­кIолIагъэхэм «ЕгъэшIэрэ машIом» къэгъагъэхэр кIэралъхьагъэх.

Хэгъэгу зэошхом илъэ­хъан Адыгеим икIыгъэу нэбгырэ мин 80 зэуапIэм Iухьагъ, нэбгырэ мин пчъа­гъэ зэо кIыбым щыIэу пыим пэуцужьыгъ. ТичIыпIэгъу нэбгырэ 52-мэ Со­ветскэ Союзым и

ЛIы­хъу­жъыцIэ къафагъэшъошагъ, нэбгырэ 13-р Щытхъум иорден икавалер хъугъэх.

ХЪУТ Нэфсэт.