ГандболымкIэ Урысые зэнэкъокъум ифинал едзыгъо Московскэ хэкум щэкIо. Зыныбжь илъэс 13-м шIомыкIыгъэ пшъашъэхэр ащ хэлажьэх. ХэшыпыкIын уцугъохэм апхырыкIыгъэ командэ 12-мэ зэнэкъо­къум зыщаушэты. Финалым ихьагъэхэм ащыщ Мыекъуапэ олимпийскэ резервымкIэ испорт еджапIэу С.М. Джэнчатэм ыцIэ зыхьырэм икомандэ. Къалэу Протвино щыкIорэ Iофтхьабзэм Адыгеир къыщагъэлъагъо тренерхэу Валерий Гончаррэ Дарья Силантьевамрэ агъэсэрэ пшъа­шъэхэм. Командэхэр купитIоу гощыгъэх. Зэнэкъокъум къыдыхэлъытэгъэ апэрэ ешIэгъоу Мыекъуапэ ип­шъашъэхэм яIагъэм гандбол ака­демиеу «Бибирево» зыфиIорэм илIыкIохэм щаIукIагъэх, пчъагъэр 19:8-у ашIуахьыгъ. Волгоград икомандэу «Динамэм» зыIокIэ-хэм, пчъагъэр 11:11-у ешIэгъур аухыгъ. Ащ ыуж Самарэ хэкум иятIонэрэ командэ текIуагъэх, пчъагъэр — 18:17. Джырэ уахътэм Адыгеим икомандэ очкоуи 3 ригъэкъугъ, купэу «Б-м» ятфэнэрэ чIыпIэр щиIыгъ. Типшъашъэхэм мэхьанэшхо зиIэ ешIэгъуитIу яIэщт, Краснодар ыкIи Астрахань якомандэхэм аIукIэщтых. БЗЭШIУ Асхьад.